Read Toraja-Sa'dan ROMA 16 Bible Online

ROMA 16 - Toraja-Sa'dan bible

ROMA 16

¹Kupa’peingkoran lako kalemi tu Febe siulu’ta baine, tu to ma’kamayana kombongan dio Kengkrea.

²Tarima marampa’i belanna Puang, susitu sipato’na siamo lako to masallo’ sia tundui tu naninna mekatulung lako kalemi. Belanna budamo tau natundui sia kaleku duka.

³Parampoanna’ salama’ku lako Priskila sola Akwila, sangayokangku lan pengkaranganNa Kristus Yesu;

⁴tu mangkamo ussorong sunga’na sola duai belanna penaangku; tangia aku manna ma’kurre sumanga’ lako kalena, sangadinna mintu’ duka tu mai kombongan dio lu to’ to kapere’.

⁵Parampoan dukana’ salama’ku lako kombongan lan banuanna. Salama’ku lako Epenetus, pa’kaboro’ku, tu bunga’ bua dipopennolo lako Kristus dio tana Asia.

⁶Salama’ku lako Maria, tu mangka tang umpomata’ka’ tongankomi.

⁷Salama’ku lako Andronikus sia Yunias, sangsukungku sia sibangku lan pa’tarungkuan, tu kabilangan lako padanna rasulu’, sia dolo ia umpatongan Kristus na aku.

⁸Salama’ku lako Ampliatus, pa’kaboro’ku diona Puang.

⁹Salama’ku lako Urbanus, sangayokangki lan pengkaranganNa Kristus, sia Stakhis pa’kaboro’ku.

¹⁰Salama’ku lako Apeles, tu payanan lantuk lako Kristus tonna ruai petoba, sia lako rurananna Aristobulus.

¹¹Salama’ku lako Herodion, sangsukungku. Salama’ku lako rurananna Narkisus tu umpatonganna Puang.

¹²Salama’ku lako Trifena sia Trifosa, tu baine tang mekata’ka’ lan alukNa Puang. Sia lako Persis, tu baine dipakaboro’, tu tang mekata’ka’ tongan lan alukNa Puang.

¹³Salama’ku lako Rufus, tu to ditonno’ diona Puang, sia lako indo’na, tu indo’ku duka.

¹⁴Salama’ku lako Asinkritus sia Flegon, na Hermes na Patrobas, na Hermas sia mintu’ tu mai siulu’ nasisolan.

¹⁵Salama’ku lako Filologus sia Yulia, sia lako Nereus, sia iatu mai siulu’na baine, sia lako Olimpas, sia mintu’ tu mai to masallo’ nasisolan.

¹⁶Pada sisalama’komi mipasituru’i pangudung masero. Salama’na mintu’ kombonganNa Kristus naparampo lako kalemi.

¹⁷Kupakilalakomi, e mintu’ siulu’ku, la mikanandai tu mintu’ to umpabu’tu kasisakkan sia patumang tu sisalanna pangadaran mipelada’i. Toyangangkomi kalemi dio mai tau iato.

¹⁸Belanna iatu to susito, tangia to mekapuang lako Puangta Kristus, sangadinna umpopuang tambukna; sia mamming bang kadanna sia male’so’ untua’ ba’tangi to mai to ma’inaa sangkaloloan.

¹⁹Belanna lelemo lako mintu’ tau tu kamengkaolammi. Iamoto angku poparannukomi, apa kuporai ke kinaakomi diona melona sia masero dio mai kadakena.

²⁰Na Puang Matuamora, tu oto’na kamarampasan, urru’puk-ru’pukki madomi’ tu deata bulituk diong to’ lentekmi. Denno upa’ anna pa’kamaseanNa Puangta Yesu urrondongkomi!

²¹Salama’na Timotius, sangayokaku lan pentoeangku, lako kalemi, sia salama’na sangsukungku Lukius na Yason anna Sosipater.

²²Akumo Tertius, tu ussura’i te sura’ umparampo salama’ lako kalemi tete dio Puang.

²³Sia Gayus, tu untoratuna’ sola mintu’ to lan kombongan, umparampo salama’na lako kalemi. Salama’na Erastus sandan uainna tondok, sia Kwartus, siulu’ta.

²⁴(Denno upa’ anna pa’kamaseanNa Puangta Yesu Kristus urrondongkomi sola nasang! Amin.)

²⁵Anna lako Puang unnampui kakuasan umpabatta’komi situru’ Kareba-kaparannuan kupa’pangadaran sia situru’ kadipa’peissananna Yesu Kristus, susi kadipapayananna rasia tang dipatia’tik tempon dio mai,

²⁶apa totemo te dipapayanmo sia dipa’peissanan lako mintu’ bangsa, situru’ tu parentaNa Kapenomban matontongan, napamanassa sura’na nabi, unnanta’i lako kapengkaolan kapatonganan,

²⁷lako Kapenomban unnampui misa kakinaan, den kamala’biran tontong sae lakona, tete dio Yesu Kristus. Amin.