Read Toraja-Sa'dan ROMA 2 Bible Online

ROMA 2 - Toraja-Sa'dan bible

ROMA 2

¹Iamoto tae’ mubelai undakaran posanga kalemu, e iko, minda-mindako tu umpasala tau; belanna lan tu kaumpasalammu to senga’, iko kalenamo umpakannai ukungan kalemu; belanna iko ma’pasala na iko duka umpogau’i.

²Taissan kumua iatu ukunganNa Puang Matua dipakannai melo tu to umpogau’i tu iannato.

³E iko tu umpasalanna to ma’gau’ susito anna iko kalena umpogau’i, musangaraka la tilendokko dio mai ukunganNa Puang Matua?

⁴Ba’tu tae’raka muangga’i tu kamasokanan tang dilambi’Na sia kama’tananNa sia pesuka’ kalandoNa sia tae’ muissanni, kumua iatu kamasokananNa Puang Matua urrendenko lako katobaran?

⁵Apa kamakarrasanna penaammu sia noka mengkatoba’, ammu rampunanni kasengkean tu kalemu sae lako allo kasengkeanNa Puang Matua sia kapayananna ukungan malambu’Na,

⁶tu la umpapakkanni simisa’i lako tau, tu sitinayanna penggauranna,

⁷iamotu katuoan sae lakona Napapakkananni tu to umpengkaolai kameloan undaka’i tu kamala’biran sia kadipangkeran sia apa tang narandanna kasanggangan,

⁸apa kasengkean sia kamagi’giran Napapakkananni tu to basisi inaa sia tang mengkaola lako kamanapparan sangadinna mengkaola lako kakelokan.

⁹Parri’ sia kasanggangan urrampoi penaanna mintu’ tolino tu umpogau’na kakadakean, ondonganna to Yahudi sia to Yunani duka;

¹⁰apa kamala’biran sia kadipangkeran sia kamarampasan urrampoi mintu’ to umpogau’ kameloan, ondonganna to Yahudi sia to Yunani duka.

¹¹Belanna tae’ Namentiro lindo tu Puang Matua.

¹²Belanna pira-pira tu to tang untandai Sukaran aluk umpogau’ kasalan, dipasalianna duka ia Sukaran aluk la disanggangi; anna pira-pira tu to umpentionganni Sukaran aluk umpogau’ kasalan, la narua ukungan Sukaran aluk.

¹³Belanna tangia to urrangi bangri Sukaran aluk tu la malolo dio oloNa Puang Matua, sangadinna iaritu to umpogau’ sukaran aluk tu la dibilang malolo.

¹⁴Belanna iake to kapere’ tu tang ma’sukaran aluk, anna lalan inaanna kalena umpogau’i susitu natuntunna Sukaran aluk, iamo to umposukaran aluk kalena to, te to tang ma’sukaran aluk.

¹⁵Napa’pekitanan, kumua iatu gau’ natuntun Sukaran aluk tioki’ lan penaanna, anna katottongi penaa ma’pakilalanna susito, sia iatu tangnga’na sipasala ba’tu sitongananni

¹⁶to ke allo Nanii Puang Matua umpaolai salunna tu mintu’ tangnga’ tang dikita dio tolino, tete dio Kristus Yesu, situru’ tu Kareba-kaparannuan kupa’peissanan.

¹⁷Iake umpentoeiko katoyahudiammu, sia umposande’ Sukaran aluk sia ussattuan kalemu diona Puang Matua,

¹⁸sia unnissan pa’porainNa sia umpasisengaranni tu kapuanna patunna, belanna diada’iko Sukaran aluk,

¹⁹sia iake ungkanappa’iko kalemu kumua perenden to buta sia patutungan bia’ lako to lan kamalillinan,

²⁰to mangada’na to baga, gurunna pia tang paissanpa, belanna unnampuiko indo’na kapaissanan sia kamanapparan lan Sukaran aluk.

²¹Iake susito, e iko tu unnada’ina to senga’, tae’raka muada’i tu kalemu? Iko umpa’pangadaranni, kumua dana bako tu tau, anna bokorokoka?

²²Iko umpokadai kumua: da nama’gau’ sala tau anna ma’gau’ salarokoka? Iko ungkagi’gi’ mintu’ deata, anna ikoraka unnala banua deata?

²³Iko ussattuan kalemu diona Sukaran aluk, anna untapa’rokoka Puang Matua, belanna untengkaiko Sukaran aluk?

²⁴Apa ia sia napa’kada solangi to kapere’ tu sanganNa Puang Matua tu belanna kamu, susitu mangka disura’.

²⁵Belanna iatu sunna’ den sia patunna, ke umpogau’ko Sukaran aluk, apa iake untengkai bangko Sukaran aluk, pada bang sia tang disunna’.

²⁶Iamoto, iake ungkanannangi tuntunan Sukaran aluk tu to tang disunna’ tang dipapadaraka to disunna’?

²⁷Sia iatu to inang tang disunna’, apa ungkaritutui Sukaran aluk, tae’raka nala umpasalako tu to untengkai bang Sukaran aluk, moi muampui sura’ sia disunna’.

²⁸Belanna iatu to Yahudi tongan, tangia salianna manna Yahudi, sia iatu sunna’ tae’ na ia manna tu salianna dio kale;

²⁹sangadinna iatu Yahudi tongan, iamo Yahudi lanna lu, sia iatu massang sunna’ iamotu lanna ba’tang tete dio Penaa, tangia tete dio sura’. Iamoto iatu kadipudianna tae’ nalu dio mai tolino, sangadinna lu dio mai Puang Matua.