Read Toraja-Sa'dan ROMA 3 Bible Online

ROMA 3 - Toraja-Sa'dan bible

ROMA 3

¹Iake susito, apara napolosong to Yahudi? ba’tu apara patunna tu sunna’?

²Buda, ma’rupa-rupa napolosong. Ma’pempissanna kumua mintu’na kadanNa Puang Matua mangkamo dipakambiranni.

³Belanna umbara nakua? Iake tang ma’patonganni tu tau pira, ma’dinraka tu tang ma’patonganna undampa katanglelukanNa Puang Matua?

⁴Inang tae’ ia to! Sangadinna inang tonganna susitu dipokada kumua tongan Ia tu Puang Matua, apa mintu’na tolino buttok, susi tu disura’ kumua: AmMi payanan tongan dio kadamMi sia pataloKomi ke dipasalaKomi.

⁵Apa iake kakelokanta umpamanassai tu kamalamburanNa Puang Matua, apara la takua? Kelokraka tu Puang Matua umpata’pa kasengkeanNa? iate aku ma’kada te, ma’kada tolinona’.

⁶Inang tae’ ia to! Belanna iake susito, umbamo la Nakua tu Puang Matua umpaolai salunna te lino?

⁷Apa iake sakendek-kendeknai tu kamanapparanNa sia kamala’biranNa Puang Matua napamanassa kabuttokangku, ma’apapi kudipakannai ukungan susito kasalan?

⁸Nama’apari kitang ma’kadara — susito kada naanggarangkan tau, kumua kikua: — Da’ito anta pogau’ kakadakean, anna bu’tu melona? Tau iato dipasisurung lindo alukna.

⁹Dadi umba nakua? Denraka tapolosong? Inang tae’ ia to; belanna pirambongi’ mangkamokan umpasala to Yahudi sia to Yunani duka kumua mengkanorong nasangi lako kasalan;

¹⁰susitu disura’ kumua: Tae’ tau misa’ malolo, moi misa’ tae’ duka,

¹¹tae’ tau misa’ manarang, tae’ tau misa’ undaka’ Puang Matua;

¹²sepang nasangmo lako senga’na, tae’ nasangmo patunna; tae’mo tau misa’ umpogau’ kameloan, moi misa’ tae’ dukamo;

¹³iatu gora-gorana susi liang tungangnga’, lilana umpana’ta’ kapa’pakenan, ipo ula’ dio randan pudukna,

¹⁴dio pudukna ponno tampak ropu sia kada layuk.

¹⁵Lentekna maleke umpato’do rarana tau;

¹⁶kasanggangan manna sia kamatilakan dio lalanna;

¹⁷sia iatu lalan kamarampasan tae’ natandai;

¹⁸tae’ kamatakuran lako Puang Matua dio pentirona.

¹⁹Apa taissan kumua samami dipokada lan Sukaran aluk, iamoto tu dipokadan to mengkanorong lako Sukaran aluk, dikua anna titutu’ nasang pudukna sia mintu’ issinna lino sipatu Napakannai ukungan Puang Matua.

²⁰Apa iatu umpogau’ Sukaran aluk, tae’ tau misa’ dibilang malolo dio oloNa Puang Matua, belanna lan mai tu Sukaran aluk nanii bu’tu tu dininna untandai kasalan.

²¹Apa totemo manggi’opara ma’tete Sukaran aluk inang mangka payanmo ia tu kamaloloanNa Puang Matua, tu nakatottongi Sukaran aluk sia nabi,

²²iamotu kamaloloanNa Puang Matua tete dio kaumpatonganan Yesu Kristus umpatu sia tang umpasalian rinding mintu’ to ma’patongan; belanna tae’ silaenanna.

²³Apa umpogau’ nasang bangmo kasalan sia sisayuran kamala’biranNa Puang Matua,

²⁴sia dikamasei bangri nadibilang malolo tete dio pa’kamaseanNa Puang Matua, belanna pangla’bakNa Kristus Yesu.

²⁵Tu Napatingo Puang Matua mendadi pemala’ kasikaeloan diona raraNa, tete dio kapatonganan anNa papayanni tu kamalamburanNa belanna tae’ Naukungi tu mintu’na kasalan tonna dolona tonna pama’tanampi penaa Puang Matua,

²⁶la umpapayan kamalamburanNa te attu iate, kumua inang To malambu’ Ia, moi umbilang malolo to umpatongan Yesu.

²⁷Iake susito, umbami nii tu kapassattuan? Ditibemo. Umbanna atoran dituru’? Atoran umpogau’raka kameloan? Tae’, sangadinna diona atoran kapatonganan.

²⁸Belanna kisanga kumua iatu tau dibilang malolo diona kapatonganan, tangia diona umpogau’ tuntunan Sukaran aluk.

²⁹Ba’tu iatu Puang Matua Puangna mannaraka to Yahudi? Tang Puangna dukaraka to kapere’? Tonganna, Puangna dukato kapere’.

³⁰Belanna misa’ri tu Puang Matua, tu la umbilang malolo to disunna’ diona kapatonganan, sia to tang disunna’ tete dio kapatonganan.

³¹Iake susito, umpadamparakannika Sukaran aluk belanna kapatonganan? Inang tae’ ia to; sangadinna untonganangkan Sukaran aluk.