Read Toraja-Sa'dan ROMA 4 Bible Online

ROMA 4 - Toraja-Sa'dan bible

ROMA 4

¹Apara la takua? Naposenderaka Puang Matua diona a’gan kale tolino tu Abraham, ambe’ta?

²Belanna iake dibilang maloloi tu Abraham diona penggauranna, den sia kadisattuanna, apa tang dio oloNa Puang Matua.

³Belanna apara nakua tu Sura’ Madatu? Iatu Abraham umpatongan Puang Matua, iamo disanga napomalolo to.

⁴Iatu to mengkarang, den sarona, tangia disanga pa’kamasean, sangadinna sonda ra’ta’na.

⁵Apa iatu to tang mengkarang, sangadinna umpatongan tu To umbilang malolo to tang mekaaluk, iamo umpomalolo kapatongananna.

⁶Susitu napokada Daud kumua maupa’ tu to nareken Puang Matua unnampui kamaloloan, tang tete dio penggauran, nakua:

⁷Maupa’ tu mintu’ to dipa’dei kakadakeanna sia disamboi kasalanna;

⁸maupa’ tu to tang la Narekenmo Puang kasalanna.

⁹Iake susito, to disunna’ mannaraka napatu tu kada diona kamauparan iato, ba’tu to tang disunna’ dukaraka? Belanna mangkamo kipokada, kumua direken umpomalolo kapatongananna tu Abraham.

¹⁰Apa umbara nakua umpomaloloi? Iaraka tonna mangkamo disunna’, ba’tu iaraka tonna tae’pa? Tangia tonna mangkamo disunna’, sangadinna tonna tae’pa.

¹¹Na iatu tanda sunna’ natarima butung toding kamaloloan diona kapatongananna tonna tang disunna’pa. Susiri lalanna to anna poambe’i mintu’ to ma’patongan tu tang disunna’na, anna direken lako kalena tu kamaloloan.

¹²Sia napoambe’ dukai to disunna’ tu to tangia manna disunna’ sangadinna unturu’ lalan kapatongananna ambe’ta Abraham, tonna tang disunna’pa.

¹³Belanna tangia tete dio Sukaran aluk anna rampoi pangallu’ tu Abraham ba’tu tarukna, kumua ia umpomana’i te lino, sangadinna tete dio kamaloloanna kapatonganan.

¹⁴Belanna iake to umposande’ Sukaran aluk umpomana’i to, manassa torro sala tu kapatonganan sia diputtai tu pangallu’.

¹⁵Belanna iatu napabu’tu Sukaran aluk, iamotu kasengkean, apa umba-umba tu tang nanii Sukaran aluk, inde to tae’ duka kauntengkaian Sukaran aluk.

¹⁶Iamoto namenggaronto’ dio kapatonganan tu mana’ iato anna siolanan pa’kamasean sia anna matontongan tu pangallu’ lako mintu’ tarukna, tangia manna to umposande’na Sukaran aluk, sangadinna ia duka tu umposande’na kapatonganan susi Abraham, tu tapoambe’ sola nasang,

¹⁷susitu disura’ kumua: Kupabendanmoko napoambe’ buda bangsa — dio oloNa tu Puang napatongan Abraham, Iamotu Puang umpatuo to mate sia untambai manna apa tae’, anna denmo.

¹⁸Belanna tonna ka’tu rannumo tu Abraham, inang narannuammo lan kapatonganan, kumua la napoambe’ buda bangsa, susitu dipokada kumua: La susimoto tu tarukmu undinna.

¹⁹Sia tae’ namoro’ kapatongananna, natiro tu kalena butung to matemo, belanna agi-agimo saratu’ taunna dadinna, sia iatu inan taunna Sara butung mate dukamo;

²⁰apa belanna ungkilalai pangallu’Na Puang Matua, tae’mi nabata butung to tanggan ma’patongan, sangadinna sadipamatoto’-toto’na lan kapatongananna umpakala’bi’ Puang Matua,

²¹sia nakanappa’i tongan, kumua kuasa tu Puang Matua ussundunni tu apa Naalluranni.

²²Ia (dukamo) napobannang to anna direken umpomalolo kapatongananna.

²³Apa iatu kada direken umpomalolo tangia diona manna Abraham disurasan,

²⁴sangadinna diona duka kita tu la direken umpomaloloi tu belanna tapatongan tu To mangka umpamalimbangun Yesu, Puangta, dio mai to’ to mate,

²⁵tu mangka disorong belanna kasalanta sia dipamalimbangun belanna la umbilang maloloki’.