Read Toraja-Sa'dan ROMA 5 Bible Online

ROMA 5 - Toraja-Sa'dan bible

ROMA 5

¹Tu belanna dibilang malolomoki’ diona kapatonganan, anna den kasikaeloanta Puang Matua tete dio Puangta Yesu Kristus,

²sia dio dukaRi, anta ma’din tama te pa’kamasean iate (tete dio kapatonganan) tu tanii bendan; anta massattuan belanna rannunta diona kamala’biranNa Puang Matua.

³Apa tangia manna to, sangadinna la ussattuan dukaki’ kamaparrisan, belanna taissan kumua iatu kamaparrisan umpabu’tu penaa kalebu,

⁴na penaa kalebu umpabu’tu kabattaran penaa, na kabattaran penaa umpabu’tu kapa’rannuanan;

⁵anna iatu kapa’rannuanan tae’ namepakasiri’, belanna mangkamo ditua’ tu kamamaseanNa Puang Matua tama penaanta tete dio Penaa Masallo’ tu dikamaseangki’.

⁶Belanna iatonta langga’pa sia tonna lambi’i allu’na, matemi tu Kristus belanna to tang mekaaluk.

⁷Apa masuli’ tongan tau morai mate belanna misa’ to malolo. Umbai den sia tau barani mate belanna to melo penaanna.

⁸Apa napakitammoki’ Puang Matua kamamasean diona tu napomatena Kristus belanna kita, tonna taloipiki’ kasalan.

⁹Anna totemo dibilang malolomoki’ tete dio raraNa, ondong pissanpi la Nakarimmanniki’ dio mai kasengkean.

¹⁰Belanna iake dipasikaeloki’ Puang Matua tete dio kamateanNa AnakNa, tonta kabiri’pa Puang Matua, ondong pissan, tonta mangkamo dipasikaelo, la ungkabu’tuiki’ kadikarimmanan diona katuoanNa.

¹¹Sia tangia manna to, sangadinna ussattuan poleki’ Puang Matua tete dio Puangta Yesu (Kristus), apa belanna Iari anta kabu’tui kasikaeloan totemo.

¹²Iamoto tumbai tu kasalan mangkamo tama te lino, belanna misa’ tau, sia kamatean belanna kasalan, sia susi duka tu rampona kamatean lako mintu’ tolino, iamoto anna kasalan nasang mintu’ tolino — ,

¹³belanna tae’pa Sukaran aluk, nainang lanmo lino tu kasalan; apa tae’ nadireken tu kasalan, tonna tae’pa Sukaran aluk.

¹⁴Apa iatu kamatean pasau’ randuk tonna Adam sae lako tonna Musa, sama bang sia lako to tang umpogau’ kasalan susitu kauntengkaianna pepasan Adam, tu butung rapang-rapangna Tu la saena.

¹⁵Apa iatu pa’kamaseanNa Puang Matua tae’ nasusi katobangan tama kasalan. Apa iake budami tau mate diona kasalanna misa’ tau, ondong pissanpi tu pa’kamaseanNa Puang Matua sia pamengan napabu’tu pa’kamaseanNa misa’ Tau, iamotu Yesu Kristus malleanmo lako buda tau.

¹⁶Iatu pamengan iato silaenan a’ganna tu bannang diona kasalanna misa’ tau. Belanna iatu umpaolai salunna tu napobua’ misa’ tau mebaa lako kadiukungan, apa iatu pa’kamaseanNa Puang Matua tu bannang dio kabudanna kasalan mebaa lako kadibilangan malolo.

¹⁷Belanna iake katobanganna misa’ tau tama kasalan anna pasau’mo tu kamatean diona tu tau misa’, ontong pole’pi tu mai to mallean pa’kamasean sia pamengan kamaloloan naappa’, la pasau’ lan katuoan tete dio misa’ Tau, iamotu Yesu Kristus.

¹⁸Iamoto, tumbai tu diona misa’ katobangan tama kasalan narampoi kadiukungan tu mintu’ tolino, tenmoto bannang dio misa’ penggauran malolo, anna mintu’ tolino dibilang malolo kumua anna appa’ katuoan.

¹⁹Belanna susitu diona katangmengkaolanna misa’ tau, nabuda tau bendan dipopendadi to kasalan, susi dukamoto tu belanna kamengkaolanna Misa’ Tau, anna bendan tu budanna tongan dipopendadi to malolo.

²⁰Undinna tamaomi tu Sukaran aluk, kumua nasakerangngan-rangnganna tu kasalan; apa umba-umba nanii sakerangngan-rangnganna kasalan, indemoto nanii samallean-leanna pa’kamasean,

²¹kumua anna tumba tu kasalan pasau’ lan kamatean, susi dukamoto tu pa’kamasean pasau’ tete dio kamaloloan landa’ lako katuoan sae lakona diona Yesu Kristus, Puangta.