Read Toraja-Sa'dan ROMA 6 Bible Online

ROMA 6 - Toraja-Sa'dan bible

ROMA 6

¹Iake susito apa la tapokada? La la’ka’ lanriki’ka kasalan, anna sakerangngan-rangnganna tu pa’kamaseanNa Puang Matua?

²Inang tae’ ia to! Iatu kita mangkannamo mate tilendok dio mai kasalan, umbapa la takua tuo lan?

³Ba’tu tae’raka miissanni kumua padamoki’ didio’ tama Kristus Yesu, pada didio’ tama kamateanNa?

⁴Iamoto mangkamoki’ dipasilamun tete dio pa’dioran tama kamatean, kumua anna tumba tu Kristus mangkamo dipamalimbangun dio mai to’ to mate tete dio kamala’biranNa Ambe’, susi dukamoto tu kita la unnolai katuoan ba’ru.

⁵Belanna iake misa’ garonto’moki’ sola lan rapang-rapang kamateanNa, la susi dukaki’ lan rapang-rapang kamalimbangunanNa.

⁶Belanna taissan kumua iatu a’gan pa’kalean masainta mangkamo dipasia’ta’ dikua anna disabu’i tu kale kasalan, da tanenne’ umpopengkaunan kaleta lako kasalan;

⁷belanna iatu to matemo, dibilang torro to makakamo dio mai kasalan.

⁸Iake inang pada matemoki’ Kristus, takanappa’i kumua la pada tuo dukaki’ sola;

⁹belanna taissan kumua iatu Kristus, tu mangkamo dipamalimbangun dio mai to’ to mate, tae’mo Namate len; tae’mo nakuasai lenNi kamatean.

¹⁰Belanna iatu diona kamateanNa, pissanri mate umpa’dei kasalan, apa diona katuoanNa, tuo mengkaola lako Puang Matua.

¹¹Susi dukamoto la urrekenkomi kalemi mate tilendok dio mai kasalan, apa tuo mengkaola lako Puang Matua lan Kristus Yesu.

¹²Iamoto da nama’parenta tu kasalan lan kale tang marendengmi, naurunganni miparundu’i tu lalan pa’poraianna,

¹³sia da misorongi tu lesoan kalemi lako kasalan napoparea kakelokan, sangadinna sorongi tu kalemi butung to mate tuo sule, sia iatu lesoan kalemi lako Puang Matua napopareai kamaloloan.

¹⁴Belanna iatu kasalan tae’mo nakuasaikomi, apa tangiakomi to umpentionganni Sukaran aluk, sangadinna umpentionganni pa’kamasean.

¹⁵Umbamo la nakua? La umpogau’moriki’ka kasalan, belanna tangiaki’ to umpentionganni Sukaran aluk, sangadinna umpentionganni pa’kamasean? Inang tae’ ia to!

¹⁶Tae’raka miissanni, kumua minda-minda minii ussorong kalemi butung kaunan la unturu’i pa’poraianna, mengkaunanmokomi lako tu to mituru’ pa’poraianna, la lako kasalan mebaa lako kamatean, la lako kamengkaolan mebaa lako kamaloloan?

¹⁷Apa kurre sumanga’na lako Puang Matua: tu dolona mengkaunankomi lako kasalan, apa totemo masorok tonganmo penaammi umpengkaolai atoran pangadaran diadarangkomi.

¹⁸Iatommi mangka dipopentorro to makaka dio mai kasalan, dipopengkaunanmokomi lako kamaloloan.

¹⁹— Ma’kada to linona’ umpokadai te iannate tu belanna kalanggaranna pa’kaleammi. — Belanna susitu kamangkammi umpopengkaunan lesoan kalemi lako kamaruttakan sia kabulitukan umpabu’tu kabulitukan, susi dukamoto totemo popengkaunammi tu lesoan kalemi lako kamaloloan umpabu’tu kamaseroan.

²⁰Belanna tonna pokaunankomi kasalan, tang mengkaolakomi lako kamaloloan.

²¹Attu iato, apara buanna mikabu’tui? Iamotu apa mipomasiri’ totemo, belanna iatu ma’katampakanna kamatean bangsia.

²²Apa totemo iammi mangka dipopentorro to makaka dio mai kasalan, sia dipopengkaunan lako Puang Matua, la unnappa’komi bua umpabu’tu kamaseroan, nama’katampakanna katuoan sae lakona.

²³Belanna iatu napassaroan kasalan iamotu kamatean, apa iatu pa’kamaseanNa Puang Matua, iamotu katuoan sae lakona tete dio Kristus Yesu, Puangta.