Read Toraja-Sa'dan ROMA 7 Bible Online

ROMA 7 - Toraja-Sa'dan bible

ROMA 7

¹Tae’raka miissan, e sangsiulurangku — apa iate kadangku to untamai atoran Sukaran aluk napatu — kumua iatu atoran umparenta tau sae lako matena?

²Belanna misa’ baine untanan dapo’ naarra’i atoran lako muanena, ke tuopi tu muanena; apa iake matemi tu muanena, tilendokmo tu baine dio mai atoran unnarra’i lako muanena.

³Iamoto iake umpomuanei to senga’, ke tuopi tu muanena, nasanga tau baine pasandak salu lako rampanan kapa’, apa iake matemi tu muanena, tilendokmo tu baine dio mai atoran iato, naurunganni tangia baine pasandak salu lako rampanan kapa’, ke umpomuanei to senga’.

⁴Susi dukato, e sangsiulurangku, kamu te dipamatekomi mitilendok dio mai Sukaran aluk tete dio batang kalena Kristus, kumua anna to senga’ umpoissankomi, iamotu To mangka dipamalimbangun dio mai to’ to mate, anta pabu’tuanni Puang Matua tu buanna.

⁵Iatonta tuo lanpa a’gan pa’kalean tolino, mintu’ tu kamoraian ponno kasalan, tu napakedo Sukaran aluk, kedo lan lesoan kaleta la umpabu’tuanni bua tu kamatean.

⁶Apa totemo tilendokmiki’ dio mai tu Sukaran aluk, anna mangkamiki’ mate tilendok dio mai atoran iato, tu ussalungkuki’ taurunganni mengkaola unnolai lalan ba’ru, tu pengkaolan Penaa, tangia unnolai lalan dolo, tu pengkaolan sura’.

⁷Apara la tapokada totemo? Dosaraka tu Sukaran aluk? Inang tae’ ia to. Sangadinnari tae’ kutandai tu kasalan, kenna tang Sukaran aluk, belanna tae’ kutandai tu kamailuan, kenna tae’ Sukaran aluk kumua: Da mumailu.

⁸Apa iatonna kabu’tuimo lalan pa’posangan, tu kasalan bannang diomi atoran nanii umpakedoi lan kaleku tu ma’rupa-rupa kamailuan; belanna iake tae’i Sukaran aluk, putta duka tu kasalan.

⁹Dolona tuo tang untoena’ Sukaran aluk, apa iatonna sae tu atoran, tuomi sule tu kasalan,

¹⁰apa aku te matena’; na iatu atoran mebaa lako katuoan, payanan umpalulakona’ kamatean.

¹¹Belanna iatonna kabu’tuimo lalan pa’posangan tu kasalan, iami nanii untua’ ba’tangna’ sia lalan susito nanii umpateina’.

¹²Dadi iatu Sukaran aluk masero sia ia duka tu atoran, masero sia malambu’ sia melo.

¹³Iake susito, iatu melona la napasaeanra’ka kamatean? Inang tae’ ia to! Sangadinna ia bangsiamo tu kasalan, anna payanan kumua iamo kasalan, tu umpake kameloan umpasaeanna’ kamatean, anna bannang dio atoran nanii payan tu kakapuanna tongan kasalan.

¹⁴Belanna taissan kumua iatu Sukaran aluk mempenaa, apa aku te lanna’ a’gan pa’kalean, dibaluk sia ma’taloan lako kasalan.

¹⁵Belanna iatu kupana’ta’na, tae’ kutandai apa tangia kuporainna tu kupogau’, sangadinna kukagi’gi’na, tu kupogau’.

¹⁶Apa iake umpogau’na’ tang kuporainna, kukatonganni kumua iatu Sukaran aluk melo.

¹⁷Iake susito, totemo tangiamo aku umpogau’i tu iannato, sangadinna iatu kasalan lan kaleku.

¹⁸Belanna kuissan, kumua tae’ lan kaleku iamotu lan pa’kaleangku, tu melona misa’ duka; belanna iatu pa’poraian den sia dio kaleku, apa iatu umpogau’i tu melona, tae’.

¹⁹Belanna iatu melona tu kuporainna, tae’ kupogau’i, sangadinna kadakena, tu tang kuporainna, iamo kupana’ta’.

²⁰Dadi iake umpogau’na’ tang kuporainna, tangiamo aku umpogau’i tu iannato, sangadinna iatu kasalan lan kaleku.

²¹Na susito kukanassami te lalan biasa iate kumua: iangku la morai umpogau’ melona, inang dolo diomo kaleku tu kadakena.

²²Belanna kukaringnganan tu Sukaran alukNa Puang Matua ke diona a’gan penaa,

²³apa den pole’o tu lalan biasa senga’ kutiro lan lesoan kaleku tu sirari lalan biasanna tangnga’ku, anna baana’ lako pangrampan dinii mengkaunan lako lalan biasanna kasalan lan lesoan kaleku.

²⁴A’a to masolangna’ aku te! Mindamo la urrampananna’ tassu’ lan mai te kale kamatean?

²⁵Ma’kurre sumanga’na’ langngan Puang Matua tete dio Yesu Kristus, Puangta! — Na susito, iate aku te iatu penaangku mengkaolana’ lako Sukaran alukNa Puang Matua, apa iatu pa’kaleangku mengkaola lako lalan biasanna kasalan.