Read Toraja-Sa'dan ROMA 8 Bible Online

ROMA 8 - Toraja-Sa'dan bible

ROMA 8

¹Iamoto totemo tae’mo ukunganna tu to lan Kristus Yesu.

²Belanna iatu lalan biasanNa Penaa tu umpa’kamasean katuoan lan Kristus Yesu mangkamo umpopentorro to makakana’ dio mai lalan biasanna kasalan sia kamatean.

³Apa iatu tang nalambi’na Sukaran aluk, belanna langga’ diona pa’kalean, Napasundun Puang Matua, tu ussua AnakNa kaleNa unnala a’gan pa’kalean mengkaola lako kasalan, tu belanna iamoratu kasalan, anNa pakannai ukungan tu kasalan, lan pa’kalean,

⁴kumua anna iatu natuntunna Sukaran aluk dipasundun lan kaleta, tu tang unturu’na pa’poraian pa’kalean, sangadinna unturu’ pa’poraian Penaa.

⁵Belanna iatu tau umpengkaolai pa’kalean umparinaa sibaanna pa’kalean, apa iatu tau umpengkaolai Penaa, umparinaa memPenaanna.

⁶Belanna iatu naparinaa pa’kalean iamotu kamatean, apa iatu naparinaa Penaa iamotu katuoan sia kamarampasan.

⁷Apa iatu umparinaa pa’kalean iamo kasiualian Puang Matua, belanna tang umpengkaolai Sukaran alukNa Puang Matua, sia tang nabela duka.

⁸Iatu to umpengkaolai pa’kalean inang tae’ nama’din Naporai Puang Matua.

⁹Apa kamu te tangiakomi umpengkaolai pa’kalean, sangadinna umpengkaolai Penaa to ke torroi tu PenaanNa Puang Matua lan kalemi. Apa iake denni tau tae’ PenaanNa Kristus dio, tangia taunna Kristus.

¹⁰Apa iake denni lan kalemi tu Kristus, iatu batang kale inang mate belanna kasalan, apa iatu penaa tuo belanna kamaloloan.

¹¹Apa iake PenaanNa tu To umpamalimbangun Yesu dio mai to’ to mate torro lan kalemi, iamotu To umpamalimbangun Kristus Yesu dio mai to’ to mate, la umpatuo dukai tu batang kale tang marendengmi tete dio PenaanNa tu torro lan kalemi.

¹²Iamoto e sangsiulurangku, kita te tangia kaindanangki’ lako pa’kalean tuo umpengkaolai pa’kalean.

¹³Belanna iake tuo umpengkaolaikomi pa’kalean, la matekomi; apa iake tete dio Penaa, ammi pamatei tu penggauran kale, la tuokomi.

¹⁴Apa padami tau Narenden PenaanNa Puang Matua, padami anakNa Puang Matua.

¹⁵Belanna tangia unnappa’komi penaa kakaunanan naurunganni mataku’pokomi, sangadinna unnappa’mokomi Penaa umpadadikomi to dianak, tu tabannang metamba kumua: Abba, o Ambe’!

¹⁶Belanna Ia kalena tu Penaa umpamanassai sola penaanta, kumua anakNaki’ Puang Matua.

¹⁷Iake anakki’, ma’mana’ dukaki’, iamotu mana’ dio mai Puang Matua sia pada ma’mana’ki’ Kristus, ke umperasaiki’ kamaparrisan sola, anta pada dipakala’bi’duka.

¹⁸Belanna kukanappa’i, kumua iatu kamaparrisan lan te attu iate tang sitinaya ke dipasitintii tu kamala’biran la dipaombo’ lako kaleta.

¹⁹Belanna mintu’na angge maritik mamali’ tongan umpeagi kapayananna anakNa Puang Matua.

²⁰Belanna mintu’na angge maritik mangkamo dipopengkanorong lako tae’na gai’na, tangia lalan penaanna kalena, sangadinna lalan pa’poraianNa tu To umpopengkanorongi, apa den rannunna,

²¹belanna mintu’na tu angge maritik la dipopentorro to makaka dio mai kakaunanan kasanggangan, anna tama katomakakan kamala’biranNa anakNa Puang Matua.

²²Apa taissan kumua mintu’na angge maritik pada sumarro sia pada ussa’dingi susito mangurria’ sae lako te totemo.

²³Sia tangia manna to, sangadinna kita duka tu unnappa’namo bunga’ pamengan — , iamotu Penaa, kita duka sumarroki’ lan kaleta umpeagi kadianakanta, iamotu katilendokanna batang kaleta.

²⁴Belanna mangkamoki’ dipamakarimman situang kapa’rannuanan; apa iatu kapa’rannuanan mempayan tangia kapa’rannuanan, belanna iatu apa nakita tau, apapa patunna dirannuan?

²⁵Apa iake urrannuangki’ apa tang mempayan lako kaleta, batta’ penaanta umpeagii.

²⁶Susi dukamoto tu Penaa ussande’ki’ lan kalanggaranta. Belanna iatu apa la tapalaku susi sipato’na, tae’ taissanni; sangadinna Ia kalena tu Penaa umpa’kadangki’ sisola sarro tang dilambi’ dipokada.

²⁷Anna Puang, tu ussudi penaanna tolino, Natandai tu apa Natungkanan Penaa, belanna iatu Penaa umpa’kadan mintu’ to masero situru’ pa’poraianNa Puang Matua.

²⁸Apa taissan kumua mintu’na apa situru’ umpasaeanni kameloan tu to ungkamali’ Puang Matua, iamotu to ditambai situru’ tanan penaanNa Puang Matua.

²⁹Belanna iatu to tempon dio mai Natandai, tempon dio dukapa mai Nalampakki la sangrupa a’ganna AnakNa, kumua anna Ia pa’bunga’ dio tu to budai sangsiuluran.

³⁰Na iatu to Nalampak tempon dio mai, ia dukamo Natambai, sia iatu to Natambai, ia dukamo Nabilang malolo, sia iatu to Nabilang malolo, ia dukamo Napamala’bi’.

³¹Totemo apara la takua diona tu mintu’nato? Iake sisolaki’ Puang Matua mindapa la umbaliki?

³²Ia duka Ia tang umbudanan AnakNa sangadinna Nasorong belanna kita sola nasang, ma’apai Nala tang umpa’kamaseanni tu mintu’na sisola tu AnakNa lako kaleta?

³³Mindara la umpasala to Natonno’ Puang Matua? Anna Puang Matua Ia umbilang maloloi.

³⁴Mindara umpakannai ukungan? AnNa Kristus Yesu Ia tu mangka mate, ontongpi mangka dipamalimbangun sule, sia dio kananNa Puang Matua, sia umpa’kadangki’.

³⁵Mindara tu ma’din la ussarakkiki’ dio mai pa’kaboro’Na Kristus? kamasussanraka ba’tu kamaparrisanraka, ba’tu kadipakario-rioanraka, ba’tu katangdiaranraka, ba’tu kama’kambelanganraka, ba’tu kasangganganraka, ba’tu la’bo’raka?

³⁶Susitu disura’ kumua: Tu belanna Kamumora angki dipatei tu’tu’ allo; dipasusikan domba la ditunu.

³⁷Apa lan mintu’nato sapatalo-talota tu belanna iatu To umpakaboro’ki’.

³⁸Belanna kukatappa’i, kumua la kamatean, ba’tu katuoan, la malaeka’ ba’tu to paa, la denna totemo ba’tu mane la saena, ba’tu misa’ kamawatangan,

³⁹la malangka’ ba’tu mandalan, ba’tu misa’ senga’na tu panampaNa Puang Matua tae’ nabelai ussarakkiki’ dio mai pa’kaboro’Na Puang Matua bannang dio Kristus Yesu, Puangta.