Read Toraja-Sa'dan ROMA 9 Bible Online

ROMA 9 - Toraja-Sa'dan bible

ROMA 9

¹Tonganna te kupokada tete dio Kristus, tae’ angku kamorang-morang sia situru’ Sukaran inaangku ungkatottongi diona Penaa Masallo’,

²kumua lendu’ masussangku sia tae’ natore kamapa’diran lan penaangku.

³Kenna la ma’din kukaringnganan aku te kaleku narua tampak ropu diali’ dio mai Kristus diona mintu’ siulu’ku, sangdadiangku tu mai sangrara sangbukungku,

⁴iamotu mai to Israel tu unnampui kadianakan sia kamala’biran sia basse sia Sukaran aluk sia kamenomban sia mintu’ pangallu’,

⁵tu umponene’i tu mai to dolo, dio duka mai to Israel nanii bu’tu Kristus diona a’gan kale tolinoNa, Kapenomban sipatu dipudi sae lakona! Amin.

⁶Apa tangia kumua butung to tae’ nadadi tu kadanNa Puang Matua. Belanna tae’ na to Israel nasang tu to bu’tu dio mai Israel,

⁷sia tangia kumua mintu’i tu tarukna Abraham tu anakna, sangadinna: Bu’tu lu diona mai Ishak la dinii ussangai tarukmu.

⁸Battuananna: tangia anak rara buku tu mai anakNa Puang Matua, sangadinna anak pangallu’ iamo ia dibilang tarukna.

⁹Belanna susite tu kada pangallu’: Agi-agi susi pole’ to angKu sae, na iatu Sara la denmo anakna misa’, pia’-pia’ muane.

¹⁰Apa tae’ na ia mannato, sangadinna ia duka tonna ma’tambuk tu Ribka tu sibali misa’ tau, iamotu Ishak nene’ta.

¹¹Belanna iatonna tae’pa nadadi tu pia sia tae’pa naumpogau’ melona sia kadakena, — kumua anna tang leluk tu tanan penaanNa Puang Matua situru’ pa’tonno’Na kaleNa,

¹²tu tangia tuo dio penggauran tolino, sangadinna tuo dio petambaNa Puang Matua — , anna rampo tu kada lako Ribka kumua: Iatu pa’bunga’na la napokaunan bongsunna,

¹³susitu disura’ kumua: Kupakaboro’ tu Yakub, apa iatu Esau Kukagi’gi’.

¹⁴Apara la tapokada? Denraka kabimbanganNa Puang Matua? Inang tae’ ia to!

¹⁵Belanna Nakua Puang Matua ma’kada lako Musa kumua: La maturu-turuNa’ untiro to Kukaturu-turui sia mamaseNa’ untiro to Kukamasei.

¹⁶Iamoto, iatu iannato tangia tuo dio pa’poraianna tau, ba’tu kasarasanna tau, sangadinna tuo dio Puang Matua tu ungkaturu-turui tau.

¹⁷Belanna nakua lan Sura’ Madatu lako Firaun: Iamoto angKu pabendanko, dikua nadio kalemu Kunii umpa’pekitanan kuasangKu sia dikua anna dipakalelean tu sangangKu lan mintu’ lino.

¹⁸Iamoto anNa katuru-turui Puang Matua minda-minda tu Naporai, sia Ia umpabattukki tu penaanna minda-minda Naporai.

¹⁹Umbai la ma’kadako lako kaleku kumua: Ma’apai Nanenne’ bangpa pasayu? Belanna minda ia la unneai tu pa’poraianNa?

²⁰Apa aku pissan mekutanana’: E tolino, mindako la umbali Puang Matua? Ma’dinraka tu apa ditampa la ma’kada lako to untampai kumua: Ma’apari ammu tampa susira’ te?

²¹Tang umpoinaaraka inaanna tu to tumampa kurin unggaragai tu losso’ pitti’, sanglemun napopennapa keangga’ na iatu senga’na napopennapa tang keangga’?

²²Naumba nakua, ke Puang Matua, moi Nala umpa’pekitanan kasengkeanNa sia umpapayan kuasanNa, apa Napama’tanan tonganpa penaa tu apa nanii kasengkean, tu diparandanan kasanggangan.

²³Iamo Napogau’i susito kumua la Napa’peissanan tu kasugiran kamala’biranNa lako apa nanii kamaturu-turuan, tu Naparandanan dolomo kamala’biran?

²⁴Na iatu iannato susimo tu kita Natambainna, tangia lan manna mai to Yahudi sangadinna lan duka mai to kapere’.

²⁵Susitu kadanNa lan sura’na Hosea, Nakua: Iatu tang taungKu la Kusa’bu’ taungKu; sia iatu tang dipakaboro’na la Kusa’bu’ pa’kaboro’Ku.

²⁶La dadi dio tu inan mangka dinii umpokadanni kumua: Kamu te tangia taungKu, indemoto la dinii ussangai anakna Kapenomban matontongan.

²⁷Sia napetamban duka Yesaya tu diona to Israel nakua: Moi anna susi bungin diong tasik tu bilanganna to Israel, torrona manna la dikarimmanni.

²⁸Belanna la Nalampak Puang tu kadanNa lan te lino sia la Nasundunni madomi’.

²⁹Sia susitu napokada dolomo Yesaya, nakua: Iakenna susinna natae’ Natampeangki’ Puang Zebaot (Puangna mintu’ ma’dandan maritik) taruk, manassa susimiki’ Sodom, sia tae’mo silaenanta Gomora.

³⁰Apaomo la tapokada? Inde sia: kumua iatu to kapere’, tu tang untuntun kamaloloan, unnappa’mo kamaloloan, tu kamaloloan tete dio kapatonganan.

³¹Apa iatu to Israel tu unnula’ atoran kamaloloan, tae’ nalambi’i tu atoran iato.

³²Matumbari? belanna tae’ natete dio kapatonganan nanii unnula’i, sangadinna butung to nasanga la tuo dio penggauranna kalena, Titodomi lako batu katitodoan.

³³Susitu disura’ nakua: Tiromi, Kupalan Sion tu misa’ batu katitodoan sia misa’ buntu batu ma’pamatana’, naminda-minda umpatonganni tae’ nala kasirisan.