Read Toraja-Sa'dan 1 KORINTUS 10 Bible Online

1 KORINTUS 10 - Toraja-Sa'dan bible

1 KORINTUS 10

¹E kamu siulu’ku, tae’ kuporai, ke tang miissanni, kumua iatu nene’ to dolota naonganni salebu’ sia ullamban tasik sola nasangi;

²sia mangka nasangmo umpopedio’ kalena tama Musa tonna onganni salebu’ sia tonna lan tasik,

³sia mangkamo sola nasangi pada dandan ungkande kande mempenaa sanguluanri,

⁴sia mangkamo sola nasangi pada dandan unniru’ apa mempenaa sanguluanri. Belanna mangkamo nairu’i tu batu mempenaa undi unturu’i, na iatu batu iato, Iamotu Kristus.

⁵Apa budai tu tang Naporai Puang Matua. Iamoto anna mangsan lan padang pangallaran.

⁶Apa mintu’nato mendadi sangka’ lako kaleta, kumua da anta kaduangi tu apa kadake susi tau iato.

⁷Da ammi dadi to umpenombai deata, susitu tau iato pira, susitu mangka disura’ kumua: Iatu tau iato mangka unno’ko’ kumande sia mangiru’, anna ke’de’ maningo.

⁸Da duka tapogau’ gau’ sala susitu tau iato pira, anna sangallori natibambang duangpulo ntallu sa’bu mate.

⁹Sia da anta sandak-sandak Puang, susitu tau iato pira mangka ussandakKi, anna mangsanni ula’.

¹⁰Sia da mima’nuku-nuku susitu tau iato pira ma’nuku-nuku, anna mangsanni kalamau’.

¹¹Mintu’nato, mangkamo urrampoi tu tau iato la dadi misa’ sangka’ sia mangka disura’ la mendadi pa’pakilala lako kaleta, tu kita to nalambi’ tiparanta’na lino.

¹²Iamoto minda-minda tu ussanga kalena bendan, la napengkilalai da’ anna tobang.

¹³Belanna ia manna tu petoba biasa urrampoi tolino tu mangka urrampoikomi. Apa maruru’ tu Puang Matua, tae’ Napopa’elo’nakomi dipatondonni petoba, sangadinna la pada Napabu’tu petoba tu katilendokan, kumua ammi batta’ umpengkanannangi.

¹⁴Iamoto, e mintu’ pa’kaboro’ku, pallaiangkomi kalemi dio mai kamenomban lako deata.

¹⁵Iate aku te ma’kada susina’ to umpa’kadai to kinaa. Timbang kalenai te kupokadanna.

¹⁶Iatu irusan pa’kurre sumangasan tu takurre sumanga’i, tang iaraka to tu umpasirapuki’ raraNa Kristus? Sia iatu roti tatepu-tepu, tangiaraka umpasirapuki’ Kalena Kristus?

¹⁷Belanna iatu roti misa’ri, na iate kita budaki’ namisa’ri kale tapokale, apa mintu’ki’ unnala taata lan mai tu roti misa’.

¹⁸Tiroi tu ada’ biasanna to Israel tete rara tete buku! Tang sikambi’raka inan kapemalaran tu to ungkande kande pemala’?

¹⁹Umbara nakua kadangku? La mepatumbari tu apa dipemalaran lako deata? Ba’tu la mepatumbari tu deata?

²⁰Sangadinna inderi tu kadangku, kumua iatu apa napemalaran, napemalaran lako mintu’ deata masussuk, tangngia lako Puang Matua. Apa tang kuporai ke sirapukomi tu deata masussuk.

²¹Tae’ mima’din unniru’i irusanNa Puang ammi iru’io irusanna mintu’ deata masussuk. Sia tae’ mima’din tama kumande dao medaNa Puang ammi tamao kumande dao medana mintu’ deata masussuk.

²²Ba’tu la untimbariki’ka oloNa Puang? Kitaraka la matoto’ anna Puang?

²³Mintu’na tu apa tae’ napemali, apa tae’ naden nasang bua’na. Mintu’na tu apa tae’ napemali lako kaleku, apa tae’ namintu’ umpabatta’ kapatonganan.

²⁴Melo ke tae’i misa’ tau untiroan misa la napomelona kalena, sangadinna la napomelona to senga’.

²⁵Apa-apa tu dibalukan dio pa’balukan duku’, kandei, da mimanggi’ umparessai, belanna pa’pasirundunan penaa,

²⁶belanna Puang ampunna te lino sola mintu’ issinna.

²⁷Iake denni misa’ to kapere’ untambaikomi mimorai lao, kandei tu apa nabenkomi, da mimanggi’ umparessai, belanna pa’pasirundunan penaa.

²⁸Apa iake nakua tau ungkuangkomi kumua: Kande deata te, da mikandei, belanna diona tu to ungkuangkomi, sia diona pa’pasirundunan penaa;

²⁹battuananna: tangia sukaran inaammi kalena, sangadinna sukaran inaanna to senga’. Belanna ma’apari tu kataeranna kumakadonton anna la umpaolai pa’timbangan sukaran inaanna to senga’?

³⁰Iake ma’kurre sumanga’na’ ungkandei, ma’apai anna sura’na’ tau diona tu apa kupa’kurre sumanga’i?

³¹Iamoto, la iake kumandekomi, ba’tu mangiru’, la diona umba-umba misa’ penggaurammi, pogau’i tu mintu’nato situru’ tu la Napomala’bi’na Puang Matua.

³²Da mipabu’tui tu la napotitumbunna, la lako to Yahudi, la lako to Yunani, ba’tu lako kombongan to SaraninNa Puang Matua,

³³susi aku umpopa’lalan penaanna mintu’ tau lan mintu-mintu’na, tae’ kudakaran la napomelona misa kaleku, sangadinna la napomelona to buda, kumua anna makarimman.