Read Toraja-Sa'dan 1 KORINTUS 12 Bible Online

1 KORINTUS 12 - Toraja-Sa'dan bible

1 KORINTUS 12

¹E kamu siulu’ku, iatu pa’kamase mempenaa, tae’ kuporai ke tae’i miissanni.

²Miissan kumua iatommi kapere’pa, mangkamokomi direnden lako deata mamang, susitu kanasolammi.

³Iamoto angku pamanassangkomi, kumua mintu’na tu to ma’kada-kada tete dio PenaanNa Puang Matua, tae’ misa’ tu umpokadai kumua tampak ropu tu Yesu, sia tae’ duka misa’ umpokadai kumua, Puang tu Yesu, sangadinna tete diopi Penaa Masallo’.

⁴Ma’rupa-rupa tu pa’kamase dipasserongan, apa misa’ri tu Penaa.

⁵Sia ma’rupa-rupa tu toean dipasserongan, apa misa’ri tu Puang.

⁶Sia ma’rupa-rupa tu penggauran matoto’, apa Misa’ri tu Kapenomban unnato’i tu mintu’nato lan lu mintu’ tau,

⁷apa iatu kapayananna tu Penaa pantan dipa’kamasean lako tau, kumua anna pabu’tuan kameloan mintu’ tau.

⁸Belanna den tu tau kada Kinaa, Nakamaseanni Penaa na iatu senga’na kada paissan, tuo dio duka mai Penaa iato.

⁹Na iatu to senga’, kapatonganan tete dio duka Penaa iato; na senga’na, pa’kamase ma’pamaleke tete dio duka bangsia tu Penaa misa’.

¹⁰Iatu to senga’ penggauran kalle-kallean, na senga’na pa’nubua’, na senga’na umboronganni mintu’ penaa, na senga’na ma’rupa-rupa pa’kamase diona basa, na senga’na kamanarangan umbattuananni tu basa.

¹¹Apa mintu’nato, Ia bangsia tu Penaa misa’ unnato’i, Naserongi simisa’i situru’ pa’poraianNa.

¹²Belanna susi kale misa’, anna buda lesoan kalena, anna iatu lesoan kalena moi anna buda, misa’ bangsiari kale, susi dukamoto tu Kristus.

¹³Belanna misa’ri Penaa mangka dinii undio’ki’ sola nasang anta mendadi misa’ kale, la to Yahudi, la to Yunani, la kaunan, la to makaka; mintu’ki’ dipatamai tu Penaa misa’.

¹⁴Belanna iatu kale tae’ namisa’ri lesoan kalena, sangadinna buda.

¹⁵Dadi iake la nakua tu lentek kumua: Belanna tae’ naaku tu lima, tae’ duka naalana’ bilanganna kale, tangngia la napobannang to anna tang la unnalai bilangan kale tu lentek.

¹⁶Sia iake la nakua tu talinga: Belanna tae’ naaku tu mata, dadi tae’ naalana’ bilanganna kale, tangngia la napobannang to anna tang la unnalai bilangan kale tu talinga.

¹⁷Na iake la mendadi mata nasangi tu mintu’ kale, umbapa tu la ma’perangi? Sia iake la ma’perangi nasangi, umbapa tu la manguduk?

¹⁸Apa inang mangkamo ia Napapatui simisa’ Puang Matua tu mintu’ lesoan kale dio kaleta, situru’ lalan pa’poraianNa.

¹⁹Na iake la mendadi misa’mira lesoan kale tu mintu’nato, umbamo ia tu kale?

²⁰Inang buda ia tu lesoan kale, apa misa’ri kale.

²¹Tae’ nama’din tu mata la ma’kada lako lima kumua: Tae’ patummu lako kaleku, ba’tu ulu ma’kada lako lentek kumua: Tae’ patummi lako kaleku.

²²Ontong pissan na iatu disanganna kumua iamo langga’na dio kale, iamo kapua patunna.

²³Sia iatu lesoan kaleta, tu tasanganna tang mala’bi’, tamandu ungkasiri’i taparerungi tamangkale, sia iatu lesoan kale tu dipomasiri’na mandu dipomasiri’.

²⁴Apa iatu mai lesoan kaleta tu tang dipomasiri’na, tae’ namanggi’ dipakala’bi’, apa inang Napapatuimo Puang Matua susito tu kale, anNa pa’kamaseanni losong kamala’biran lako tu tang mala’bi’na,

²⁵kumua da naden kasisalan lan kale, sangadinna mintu’na lesoan kale pada-pada sikaritutuan.

²⁶Iake misa’ lesoan kale mapa’di’, mintu’i ussa’dinganni, sia iake misa’ lesoan kale dipakala’bi’, mintu’i pada-pada parannu.

²⁷Na kamumo te tu kaleNa Kristus, sia kamumo sola nasang tu mai lesoan kaleNa.

²⁸Napamanassamo Puang Matua ba’tu pira-pira tu tau lan kombongan, bunga’na rasulu’, ma’penduanna nabi, ma’pentallunna guru, namane penggauran kalle-kallean, namane pole’ pa’kamase ma’pamaleke, pentoean pa’tunduan, pentoean ma’parenta, ma’rupa-rupa pa’kamase diona basa.

²⁹Rasulu’ nasangraka to mai? Nabi nasangraka? Guru nasangraka? Umpogau’ nasangraka penggauran kalle- kallean?

³⁰Unnappa’ nasangraka pa’kamase ma’pamaleke? Manarang nasangraka ma’kada susitu pa’kamase diona ma’rupa-rupa basa? Manarang nasangraka umbattuananni basa?

³¹Pengkaolai tonganni tu ma’kalolokanna pa’kamase. Angku pakitangkomi lalan ma’iringanna tongan.