Read Toraja-Sa'dan 1 KORINTUS 15 Bible Online

1 KORINTUS 15 - Toraja-Sa'dan bible

1 KORINTUS 15

¹E kamu siulu’ku, kupakaleso lako kalemi tu Kareba-kaparannuan kupa’peissanan lako kalemi, tu mangka mitarima sia manda’ minii bendan,

²ia dukamo mipomakarimman, podo ammi toe manda’i, susitu kupa’peissanan lako kalemi, boko’ ke unnola salai tu kauntarimammi kapatonganan.

³Belanna bunga’-bunga’na kusorong lako kalemi tu apa mangka duka kutarima, tu kumua iatu Kristus mangka mate belanna kasalanta, susitu dipokadanna lan Sura’ Madatu,

⁴sia mangkamo dipeliang, naallo ma’pentallun Nadipamalimbangun sule, susitu dipokadanna lan Sura’ Madatu,

⁵sia mangkamo umpa’pekitanan Kalena lako Kefas, na undinna lako tu to sangpulo dua;

⁶na undinna to umpa’pekitanan pole’omi Kalena lako siulu’ la’bi limaratu’ napissanri nanii untiroI, budapi tu tau iato tuopa sae lako totemo, apa ba’tu pira-piramo tu mangka mate.

⁷Undinna Napa’pekitanan Kalena lako Yakobus, na undinna pole’o lako mintu’ rasulu’.

⁸Na ma’katampakanna umpa’pekitanan dukami Kalena lako kaleku, butung lako misa’ pia dadi mangura.

⁹Belanna iatu mintu’na rasulu’, akumo tu madionganna, tang sipatuna’ la digente’ rasulu’, tu belanna mangkamo’ umpakario-rio kombonganNa Puang Matua.

¹⁰Apa belanna pa’kamaseanNa Puang Matua angku dadi susite totemo; sia iatu pa’kamaseanNa lako kaleku, tae’ anna tae’ bua’na, belanna ondongmo aku mara’takku na iatu mintu’i; apa tangngia aku, sangadinna pa’kamaseanNa Puang Matua tu urrondongna’.

¹¹Iamoto, la aku, la ia sola nasangi, susimo kipa’peissanan to sia susi dukamo mipatongan.

¹²Iake dipa’peissananni tu diona Kristus kumua mangkamo dipamalimbangun dio mai to’ to mate, umba nakua ammi den ba’tu pira-pira tu ma’kada kumua tae’ ia tu kamalimabangunanna to mate?

¹³Apa iake tae’i tu kamalimbangunanna to mate, manassa tae’ Nadipamalimbangun tu Kristus.

¹⁴Na iake tae’i Nadipamalimbangun tu Kristus, torro sala tu kipa’peissananna sia torro sala duka tu kapatonganammi.

¹⁵Sia payanangkan sa’bi tang tongan dio Puang Matua, belanna ungkatottongikan silekoranna dio Puang Matua kumua mangka umpamalimbangun Kristus anna tae’ Napamalimbangunni, ke la tongannai tu to mate tang dipamalimbangun.

¹⁶Belanna iake tae’i nala dipamalimbangun tu to mate, manassa inang tae’mo Nadipamalimbangun tu Kristus.

¹⁷Apa iake tae’i Nadipamalimbangun tu Kristus, tae’ bua’na tu kapatonganammi, sia tontongkomi lan kasalammi.

¹⁸Susi dukato tu mintu’ to ussalaimo lino lan Kristus, sanggangmo.

¹⁹Iake lan manna te katuoan iate tanii urrannuan Kristus, kitamo tu mandunna masolang na iatu mintu’na tolino.

²⁰Apa manassa mangkamo dipamalimbangun dio mai to’ to mate tu Kristus, mendadi bua pa’bunga’ lako mintu’nato ussalaimo lino.

²¹Belanna susitu kamatean tete dio misa’ tau, ten dukamo tu kamalimbangunan dio mai to’ to mate tete dio misa’ tau.

²²Belanna susitu diona Adam anna ma’lalan mate mintu’ tolino, ten dukamoto, diona Kristus anna la dipatuo nasang sule.

²³Apa pantan den atoranna sia siono’ attunna; iatu bua pa’bunga’ Iamotu Kristus, na undinna iatu mai taunNa Kristus ke attu kasaeanNai sule.

²⁴Undinna na iato saemi tu ma’katampakanna, to ke Nasorongmi tu parenta lako Puang Matua, Ambe’, ke mangkami Naputtai tu mintu’ parenta sia kapaan sia kakuasan.

²⁵Belanna inang sipato’ ma’parenta susi datu, sae lako Napadiongna nasang Puang Matua to’ lentekNa tu mintu’ uali.

²⁶Iatu uali ma’katampakanna la disabu’i, iamotu kamatean.

²⁷Belanna mintu’na angge maritik Napopengkanorongmo Puang Matua diong to’ lentekNa. Apa iatonna pokadai kumua mintu’na angge maritik dipopengkanorongmo, manassami kumua iatu To umpopengkanorongi tu mintu’ angge maritik, disangadi.

²⁸Iatonna mangkamo dipopengkanorong lako Kalena tu mintu’ angge maritik, attu iato la umpopa’taloan duka Kalena tu Anak lako tu To mangka umpopengkanorong mintu’ angge maritik lako Kalena, kumua anNa Puang Matua ussalokoi sia umpoissanni tu mintu’na.

²⁹Iake susito apa patunna anna popedio’ kalena tu tau belanna to mate? Iake tae’ liui nadipamalimbangun tu to mate, apa patunna anna popedio’pa kalena tu tau belanna to mate?

³⁰Sia ma’apa dukai te kami te, anna luangkan kasanggangan lan mintu’na attu?

³¹E siulu’ku, kusisalamora kapassattuangku diona kamu tete dio Yesu Kristus, Puangta, ke la tang keallo-keallo narandannina’ kamatean.

³²Iake pentiro tolino, angku mangka sibobo’ olo’-olo’ masuru dio Efesus, apara gai’na lako kaleku? Iake tae’i nadipamalimbangun tu to mate, da’ito takumande-mande bangmo sia mangiru’, masiang matemiki’.

³³Da mipusa: iatu ulelean ma’kapettok untumang gau’ melo.

³⁴La mengkilalamokomi situru’ sipato’na sia da’mo mipengkaolai kasalan: belanna denkomi pira tu tang untandai Puang Matua. Ia sia kupokadai te kumua ammi masiri’.

³⁵Apa den tu tau kumua: Umbara dipakuanni tu to mate dipamalimbangun?, sia umbara la susinna tu kalena ke saei?

³⁶E to baga! iatu apa miambo’, tae’ natuo, ke tang matepi dolo.

³⁷Sia iatu apa muambo’, tangngia tu batang la tuo diong mai tu muambo’, sangadinna lise’na manna, ba’tu lise’ gandung, ba’tu senga’na.

³⁸Apa Puang Matua umpakebatangi susitu Naporainna, sia pantan Napasibatang batangna.

³⁹Iatu kepenaanna tae’ nainang sanguluan kalena, sangadinna senga’ kalena tolino, senga’ patuoan, senga’ manuk-manuk, senga’ bale.

⁴⁰Den tu panampa dao langi’, den tu panampa lan lino; apa senga’ kamala’biranna to panampa dao langi’, nasenga’ kamala’biranna to panampa lan lino.

⁴¹Senga’ kamala’biranna allo, senga’ kamala’biranna bulan, senga’ kamala’biranna bintoen; belanna iatu bintoen napantan sisengaran kamala’biranna.

⁴²Ten dukamoto tu kamalimbangunanna to mate. Diambo’ sangindo’ a’gan kasanggangan, dipamalimbangun sangambe’ a’gan tang kasanggangan;

⁴³diambo’ sangindo’ a’gan kamadiongan, dipamalimbangun sangambe’ a’gan kamala’biran; diambo’ sangindo’ a’gan kalanggaran, dipamalimbangun sangambe’ a’gan kamatotoran.

⁴⁴Kale tang mempenaa diambo’, kale mempenaa dipamalimbangun. Iake denni kale tang mempenaa, den duka kale mempenaa.

⁴⁵Susi dukato den disura’, nakua: Iatu bunga’na tolino iamotu Adam unnala a’gan tuo. Na iatu Adam undi mendadi penaa ma’patuo.

⁴⁶Apa tae’ na iatu bunga’na tu mempenaanna, sangadinna tang mempenaanna, namane tu mempenaanna.

⁴⁷Iatu bunga’na tau, lu dio mai lino, iamo a’gan litak, na iatu tolino ma’penduan lu dao mai suruga.

⁴⁸Tumba tu lu diona mai lino, ten dukamoto tu mintu’ to lu dio mai lino. Natumba tu lu dao mai suruga, ten dukamoto tu mintu’ to lu dao mai suruga.

⁴⁹Naumba tapakua unnangkaranni a’ganna tu lu diona mai te lino, ten dukamoto la tapakuanni umpakei tu lu daona mai suruga.

⁵⁰Apa inde sia tu kadangku, e kamu siulu’ku, kumua iatu kale tolinona tae’ nama’din umpomana’ ParentaNa Puang Matua; sia iatu apa la sanggang tae’ nala umpomana’ apa tang la sanggang.

⁵¹Pengkilalai, kupaissanangkomi rasia kumua: iate kita sola nasang, tae’ tala ussalai lino, apa dipopembali nasangki’,

⁵²sattu’ri, sangpekkappidian mata, to ke ma’katampakanna oni tarompe’ pua; belanna la dipannoni tu tarompe’ pua, nadipamalimbangun tu mintu’ to mate, umpotampa tampa tang la sanggang, na kita te la dipopembaliki’.

⁵³Belanna tae’ nasalai te tampa la sanggang tang la unnangkaran tang la sanggangna, sia iate tampa la mate tae’ nasalai tang la unnangkaran tang la matena.

⁵⁴Apa ianna angkarammi tampa la sanggang tu tang sanggangna, sia ianna angkarammi tampa la mate tu tang la matena, maneri nalambi’ te kada disura’, nakua: Naampello’mo kapataloan tu kamatean.

⁵⁵E kamatean, umbamira tu kapataloammu? E kamatean, umbamira tu pasui’mu?

⁵⁶Iatu pasui’na kamatean, iamotu kasalan, na iatu kamatotoranna kasalan, iamotu Sukaran aluk.

⁵⁷Apa kurre sumanga’na langngan Puang Matua, tu umpa’kamaseanni lako kaleta tu kapataloan tete dio Puangta Yesu Kristus.

⁵⁸Iamoto, e kamu siulu’ pa’kaboro’ku, batta’komi da naleluk penaammi, sia bassa’komi umpengkali-kalii mengkarang lan pengkaranganNa Puang, belanna miissan kumua iatu kamara’tasammi tae’ nala torro sala lan Puang.