Read Toraja-Sa'dan 1 KORINTUS 16 Bible Online

1 KORINTUS 16 - Toraja-Sa'dan bible

1 KORINTUS 16

¹Iatu diona kadidurukanna doi’ tu mai to masallo’, tumba tu mangkanna kupepasanan lako mintu kombongan dio Galatia, ten dukamoto la mipogau’.

²Ianna lambi’omi allo minggu pantan la misapean dio banuammi umpopatu patummi minannanni, da kumanggi’opa la sae mati’, mimane la undurukanni.

³Iangku sae mati’ minda-minda tu misanga manappa’, iamo kusua angku pakaloli’i sura’, lao umbai tu pa’kamaseammi lako Yerusalem.

⁴Sia iake inang denni tu la kutungkananna lao, kulaomora sola.

⁵Apa iapi kumane male mati’, ke mangkapa’ lendu’ dio Makedonia, belanna la lendu’pa’ dolo dio Makedonia.

⁶Apa umbai angku torro iti’ ba’tu sangapa-apa, ba’tu sipeupu’na’ attu kamadinginan, ammi parandananna’ tu la kubanna umba-umba kunii male.

⁷Iate pissan te tae’ angku la lendu’ manna mati’, sangadinna kusanga la torrona’ iti’ ba’tu sangapa-apa, ke NaeloranNi Puang.

⁸Apa la torro diona’ Efesus sae lako nalambi’na allo Pentakosta.

⁹Belanna dibungkarammo’ misa’ ba’ba kapua nanii katiakkaran penaa, sia buda bali dio.

¹⁰Ianna sae tu Timotius, karitutui, da anna tigiang misisolan, belanna umpogau’ pentoeanNa Puang, susi bangsia te aku.

¹¹Iamoto da naden misa’ tau umbelle’i. Apa la miparandanan melo tu la nabanna, anna pellambi’ina’, belanna ma’peagina’ sola tu to sangsiuluran untayanni.

¹²Iatu siulu’ta Apolos, mangkamo kuada’i tongan, kumua anna mati’ umpellambi’ikomi sola tu mai sangsiuluranta, apa inang tae’pa nalan penaanna la male mati’ totemo te, ia kumua la male sia mati’, ke denni palambi’na.

¹³Mareakomi, tontongkomi tumanan umposissarean kapatonganan, umpapiamuanekomi kalemi, sia mawatangkomi.

¹⁴La naturu’ pa’kaboro’ tu mintu’ penggaurammi.

¹⁵E kamu siulu’ku, kupalaku lako kalemi: miissan sia tu to lan banuanna Stefanus, kumua iamo bua pa’bunga’ dio Akhaya, sia ia kalena ussorong kalena untiroanni melo tu mai to masallo’.

¹⁶Ammi mengkaola lako tu to susito sia lako tu mai mintu’ to patunduan sia to mara’ta’.

¹⁷Kupomarannu tu kasaeanna Stefanus sia Fortunatus sola Akhaikus, belanna napasundunmo tu kakurangangku diona kamu.

¹⁸Belanna mangkamo umpakatana penaangku sia penaammi. Iamoto bilangi tu to susito.

¹⁹Iatu mintu’na kombongan dio Asia umparampo salama’na lako kalemi. Akwila sola Priskila umparampo salama’ tang liu-liunna diona Puang sisola tu mintu’ to tama kombongan lan banuanna.

²⁰Mintu’na tu siulu’ umparampo salama’na lako kalemi. Pada sisalama’komi mipasituru’i pangudung masero.

²¹Na iamote tu salama’ku, Paulus, limangku kalena unnoki’i.

²²Iake denni misa’ tau tang ungkamali’ Puang, nake narampoi tampak ropu. Maranata!

²³Denno upa’ anna pa’kamaseanNa Puang Yesu urrondongkomi.

²⁴Anna pa’kaboro’kumora urrondongkomi sola nasang tete dio Kristus Yesu.