Read Toraja-Sa'dan 1 KORINTUS 2 Bible Online

1 KORINTUS 2 - Toraja-Sa'dan bible

1 KORINTUS 2

¹Susi dukamo’to, tongku sae lako kalemi, e mintu’ siulu’ku, tae’ kurampo umpa’peissanan apa Napamanassa Puang Matua lako kalemi diona kamalutean ma’kada ba’tu diona kakinaan.

²Belanna kukanassaimo lan penaangku kumua tae’ senga’na la morai kuissan dio kalemi, sangadinna diona mannari Yesu Kristus tu mangka dia’ta’.

³Lanmo’ kalanggaran sia kamatakuran sia lendu’ ma’parondoku ussisolangkomi.

⁴Iatu kadangku sia pangadarangku, tangia diona kada kakinaan tolino umpatilao penaanna tau, sangadinna diona tanda pa’patudunNa PenaanNa sia kamatotoranNa Puang Matua,

⁵kumua da’ anna umpoparandangan kakinaan tolino tu kapatonganammi, sangadinna kamatotoranNa Puang Matua.

⁶Iatu kakinaan kipokada duka dio lu to sundun kapatongananna. Apa tangia kakinaanna te lino sia tangia kakinaanna pangulunna te lino, tu la diputtai undinna,

⁷sangadinna umpokadakan kakinaanNa Puang Matua, tu dirasian sia tang paan, tu Nalampakmo Puang Matua tempon dio mai, la tapomala’bi’,

⁸tu moi misa’ pangulunna te lino tae’ untandai. Belanna iake la natandaimi, manassa tae’ naa’ta’i tu Puang, tu oto’na mintu’ kamala’biran.

⁹Sangadinna susitu disura’, nakua: Iatu apa tang nakitapa mata, sia tang narangipa talinga, sia tang saena lan penaanna tolino, iamoto tu Naparandananni Puang Matua tu to ungkamali’I.

¹⁰Apa iatu kita Napasombomo Puang Matua lako kaleta tete dio PenaanNa, belanna Iamotu Penaa tu umpelalan mintu’na angge maritik, moi anna apa mandalanNa Puang Matua.

¹¹Belanna mindara la untandai tu lanna ba’tengna tau, sangadinna penaa inang lan tau iato? Ten dukamoto tae’ misa’ tau untandai tu lanna ba’tengNa Puang Matua, sangadinna PenaanNa Puang Matua.

¹²Apa kita te, tangngia penaanna a’gan lino tu taappa’mo, sangadinna Penaa lu dio mai Puang Matua, kumua anta tandai tu apa Napa’kamasean Puang Matua lako kaleta.

¹³Iamoto iatu apa kipokada tangngia kada napa’pangadaran kakinaanna tolino, sangadinna kada napa’pangadaran Penaa, naurunganni kipasitende’ tu apa mempenaa.

¹⁴Apa iatu to umbudanan mentolinona tae’ natarimai tu apa lu dio mai PenaanNa Puang Matua, belanna iatu apa iato nasanga pa’popetaa lako kalena, sia tae’ nabelai untandai, belanna apa iato la ditimbang dio a’gan mempenaa.

¹⁵Apa iatu to umbudanan mempenaanna untimbang mintu’ apa, na moi misa’ tau tae’ untarru’i tu penaanna.

¹⁶Belanna mindara tu unnissan lalan penaanNa Puang, naurunganni umpatudu Puang? Apa iatu kita te unnampuiki’ lalan penaanNa Kristus.