Read Toraja-Sa'dan 1 KORINTUS 6 Bible Online

1 KORINTUS 6 - Toraja-Sa'dan bible

1 KORINTUS 6

¹Denrokomika misa’ barani, ke denni misikara-karai to senga’ lan kombongan, la lao ma’popera’ta’ lako to mangra’ta’na to tang malolo, na tae’ nadio olona to masallo’?

²Ba’tu tae’raka miissanni kumua iate lino la napaolai salunna to masallo’ undinna? Na iake mipaolai salunna te lino, tang sipaturokomika umpaolai pangra’ta’ tu apa madiongan liu?

³Tae’raka miissan kumua kita la umpaolai salunna tu malaeka’ undinna? Ontong pissanpiraka tu diona kara-karana te lino?

⁴Iamoto iake dipaolaikomi pangra’ta’ diona kara-karana te lino, la mipennoloanraka tu iannato lako to tang naala bilangan tama kombongan?

⁵Ia sia kupokadai te, dikua ammi masiri’. Tae’ bangrokomika misa’ tu manarang, umpaolai pangra’ta’ tu kara- karana siulu’mi?

⁶Apa pada to siulu’komi ammi lao siparapa’, ontong pissanpi tu lu lakokomi to tang ma’patongan.

⁷Tonganna bang iatu iannato inang iamo mipotalo, tu pada kamu siparapa’. Ma’apari ammi tang ulla’biranri ma’taloan? Ma’apari ammi tang ulla’biranri dirugii?

⁸Apa kamu kalena umpogau’ tang malambu’na sia parugian, ontong pissanpi tu mai siulu’mi!

⁹Tae’raka miissanni kumua iatu to kelok penaanna tae’ naumpomana’ ParentaNa Puang Matua? Da mipusa. Iatu to ma’gau’ sala sia umpenombai deata, sia to paola boko’ sia muane diposangmatua sia to umposangmatua muane,

¹⁰sia to boko sia to maduang lako ianan sia to pa’malangoan sia to manura’ sia to pakira-kira, mintu’nato tae’ nala umpomana’ ParentaNa Puang Matua.

¹¹Den dukakomi pira pirambongi’ susito, apa mangkamokomi dibasei, sia mangkamokomi dipamasero sia mangkamokomi dibilang masero tete dio sanganNa Puang Yesu sia tete dio PenaanNa Kapenombanta.

¹²Mintu’na tu apa tae’ napemali lako kaleku, apa tae’ naden nasang bua’na. Mintu’na tu apa tae’ napemali lako kaleku apa tae’ kueloranni tu kaleku ma’taloan lako misa’ duka tu mintu’na.

¹³Iatu kande kandena tambuk, sia iatu tambuk tambukna kande, apa iatu iannato la Nasabu’i dua Puang Matua. Apa iatu kale tangia la napoparea gau’ sala, sangadinna la Napoparea Puang, sia iatu Puang oto’ kameloanna kale.

¹⁴Mangkamo Napamalimbangun Puang Matua tu Puang sia la Napamalimbangun dukaki’ situru’ kamatotoranNa.

¹⁵Tae’raka miissanni kumua iatu kalemi lesoan Kalena Kristus? Sipaturaka la kubaa tu lesoan Kalena Kristus, angku popendadii lesoan kalena baine sala’ kedo? Tae’ maro’ ia to.

¹⁶Ba’tu tae’raka miissanni kumua iatu to sisola to sala’ kedo, sisangkale? Belanna Nakua Puang: La mendadi sangkale sola duai.

¹⁷Apa iatu to la’ka’ lako Puang la mendadi sangpenaa Puang.

¹⁸Toyangangkomi kalemi dio mai gau’ sala! Iatu mai kasalan senga’, tu napogau’na tau, salianna sia ia kale; apa iatu to ma’gau’ sala, ia kalena kasalan lako kalena.

¹⁹Ba’tu tae’raka mitandai kumua iatu kalemi, iamo banuanNa Penaa Masallo’ untorroikomi, tu mangka miappa’ dio mai Puang Matua, sia tangia apammi kalena tu kalemi?

²⁰Belanna mangkamokomi dialli melolo. Iamoto la mipake tu kalemi umpakala’bi’ Puang Matua.