Read Toraja-Sa'dan 1 KORINTUS 7 Bible Online

1 KORINTUS 7 - Toraja-Sa'dan bible

1 KORINTUS 7

¹Iatu balinna kada pekutana lan sura’mi, melo ke da mirumbu baine,

²apa iamira tu gau’ sala, anna pantan la den bainena tu muane sia pantan la den muanena tu baine.

³Iatu muane la napogau’ tu sipatunna muane lako bainena, susi dukato tu baine lako muanena.

⁴Iatu baine tae’ naumpoissan misa kalena, sangadinna muanena. Ten dukato tu muane, tae’ naumpoissan misa kalena, sangadinna bainena.

⁵Da mima’pasitanan, bokoranna ke pada elo’mi patomalimmi ba’tu sangapa-apa, anna den kapalambirammi massambayang, mimane sisola sule, da anna rosokomi deata bulituk, apa tae’ mibelai untaloi kalemi.

⁶Apa iate kupokada tangia parenta, sangadinna kupatimbangirokomi.

⁷Iatu kuporainna, kukua kenna mintu’ tau susite aku te, apa pantan sisengaran tu pa’kamasena Puang Matua lako kaleta, misa’ susite, misa’ susito.

⁸Apa iatu to belang sia to balu kukua lako, melo ke ten bangmito, susite aku.

⁹Apa iake tae’i nabelai untaloi kalena, melo ke rokkoi rampanan kapa’, apa la’bi’ ia rokko rampanan kapa’ na iake naballai kamoraianna.

¹⁰Apa lako to rokkomo rampanan kapa’ kupakare’na — apa tangia aku te sangadinNa Puang — kumua: da namentantang dio mai muanena tu baine.

¹¹Apa iake mentantangi, la belang bang, ba’tu sisuleanni muanena; sia iatu muane da’ natantang bainena.

¹²Na lako tu to senga’ akumo ia tu ma’kada te, tangia Puang: iake denni siulu’ta misa’ umpobaine to tang ma’patongan, anna porai tu baine sikari’pian da natampei muanena.

¹³Sia iatu baine umpomuane to tang ma’patongan, anna porai tu muane sikari’pian, da natampei tu muanena.

¹⁴Belanna iatu muane tang ma’patongan dipamasero diona bainena, sia iatu baine tang ma’patongan dipamasero diona tu siulu’ iato. Iake tae’i nasusito, inang la kasarembangan tu mai anakmi, apa totemo maseromo.

¹⁵Apa iake mentantangi tu tang ma’patonganna, da’ito namentantang. Iatu siulu’ muane ba’tu baine tae’mo apa ussangkinni lan tu iannato. Apa mangkamokomi Natambai Puang Matua tama kasikaeloan.

¹⁶Belanna, e baine, umbara mukua unnisanni kumua ba’tu la umpamakarimman siako muanemu? ba’tu, e muane, umbara mukua unnisanni kumua ba’tu umpamakarimman siako bainemu?

¹⁷Iake tae’ nasusito, melo ke pantan napogau’ bangmi tu napapatuanni Puang, sia iatu kanatambaianna Puang Matua. Tenmoto tu pa’pana’ta’ku lan lu mintu’ kombongan.

¹⁸Iake denni tau ditambai anna mangkamo disunna’, da napatae’i tu sunna’na. Sia iake ditambai anna tae’pa nadisunna’, damo napogau’i.

¹⁹Iatu disunna’ tae’ patunna, sia iatu tang disunna’ tae’ patunna, sangadinna iari tu ungkanannangi parentaNa Puang Matua.

²⁰Pantan la manda’komi lan tu torroan mangka dinii untambaikomi.

²¹Iake lanko torroan kaunan ammu ditambai, da mupomasussai; apa susinna ke dipopentomakaka siako, la samukaritutu-tutuinna tu kaditambaiammu.

²²Belanna iatu to torroan kaunan ditambai tama Puang, iamoto makakanNa Puang. Susi dukato iatu to torroan to makaka ditambai, iamo kaunanNa Kristus.

²³Na iatu kamu mangkamokomi dialli melolo; damo mimengkaunan lako tau.

²⁴E sangsiulurangku, pantan la manda’komi lan tu torroan dinii untambaikomi tama sirondong Puang Matua.

²⁵Iatu diona anak dara, tae’ kada kuappa’ dio mai Puang, apa kupatimbangi tu diongna penaangku susito maruru’ diona kamamaseanNa Puang.

²⁶Iake timbangangku: melo ke susi bangito, tu belanna iamote kamaparrisan totemo, sia melo ke susi bangmi to tu tau.

²⁷Iake mari’piko dio bainemu, da mudaka’ lalan la mentantang. Iake belangko, da mukebaine.

²⁸Apa iake inang la kebaineko, tae’ra mukasalan, sia iake kemuanei tu anak dara, tae’ra nakasalan. Apa iatu to susito la narampoi kamaparrisan tu batang kalena. Na iate aku te kukua kenna da narampoikomi kamaparrisan.

²⁹Nainde sia tu kadangku, e kamu siulu’ku, to kumua: samareke’-reke’namo tu attu. Ia mannamira te: iatu to kebaine la butung to tang kebaine;

³⁰sia iatu to tumangi’ la butung to tang tumangi’, sia iatu to parannu la butung to tang parannu, sia iatu to mangalli la butung to tae’ apa naala;

³¹sia to umpobeloi te lino la butung to tang sundun umpobeloi. Belanna iatu a’ganna te lino la pa’de.

³²Apa iatu diongna penaangku da ammi selang. Iatu to tang kebaine ungkaritutui apa lu dio mai Puang, kumua umba la napakuanni anNa porai Puang Matua.

³³Apa iatu to kebaine ungkaritutui apa lan lino, kumua umba la napakuanni anna porai bainena,

³⁴sia mentangke patomali tu penaanna. Iatu baine tang kemuane sia anak dara ungkaritutui ParentaNa Puang kumua anna masero, la kalena la penaanna. Apa iatu baine kemuane ungkaritutui apa lan lino, kumua umba la napakuanni anna porai muanena.

³⁵Na iate kupokadanna te den bua’na lako kalemi, tae’ kumua la kutanannikomi poya, sangadinna la kupasirundunan ammi pogau’i tu sipato’na sia tang bata-bata tontong mengkaola lako Puang.

³⁶Apa iake denni tau ussangai tangia sipato’na napogauran anakna baine sae lako naliuinna siku, ianna sangai sipatu la napakemuane, da’ito napogau’i tu pa’poraian penaanna. Tae’ napokasalanni, ke napakemuanei; ma’din sibali.

³⁷Apa minda-minda tu matu’tun diong penaanna, tae’ umpatundukki sangadinna ma’lalan inaanna umpogau’ kalenai, sia napamatu’tunmo lan penaanna la umpatongkoi tu anakna baine, melo duka sia to tu napogau’na.

³⁸Iamoto iatu to umpakemuane anakna baine, melo tu napogau’na sia iatu to tang umpakemuanei samelo-melona tu napogau’na.

³⁹Iatu baine kemuane manda’pa sangkinna, ke tuopi muanena; apa iake matemi muanena, tilendokmo, ma’inaannamo kemuane minda-minda naporai, podo natete dio Puang.

⁴⁰Apa iake penaangku, maupa’ ia, ke susi bangi to. Na kusanga den sia PenaanNa Puang Matua dio kaleku.