Read Toraja-Sa'dan 2 KORINTUS 11 Bible Online

2 KORINTUS 11 - Toraja-Sa'dan bible

2 KORINTUS 11

¹Pama’tananna’ penaa diona tu kabagangku sidi’; pama’tanan tonganmo’ penaa.

²Belanna mangimburuna’ lako kalemi umpopangimburu kapangimburuanNa Puang Matua, apa mangkamokomi kupasitumaean misa’ muane, la kupatingo butung misa’ anak dara masero lako Kristus.

³Apa mataku’na’ susi manii ula’ umpakena Hawa napalaoi tangnga’na, susi duka manii to dipatangma’rundunan penaammi sia dipasepang dio mai kamalamburan sia kamaseroan ma’palulako Kristus.

⁴Belanna iake denni tau punala bang sae umpa’peissanan pole’o pangadaran senga’ diona Yesu, tu tangianna kipa’peissanan, ba’tu iake narampoikomi penaa senga’ na iatu mangkannamo mitarima, ba’tu Kareba-kaparannuan senga’ na iatu miakunnamo, ammi ma’tan penaa bangmo untarima punalai.

⁵Apa kusanga moi misa’ tae’ kunii kurang na iatu mai rasulu’ disanganna.

⁶Tonganna tang ganna’ matarru’ lan buangan kadangku, apa tang susito tu diona kapaissanan, sangadinna lan mintu’ passalan mangkamo kipa’pepayanan tu kapaissanan iato lako kamu sola nasang.

⁷Kasalanra’ka tongku umpamadiongan kaleku kumua anna kamu dipakalangka’, belanna kupa’peissanan punala bangsia lako kalemi tu Kareba-kaparannuanNa Puang Matua.

⁸Kurugiimo tu mai kombongan senga’, ia kunii unnala bua kamara’tasangku, angku ma’din ungkamayaikomi.

⁹Iatonta sisola angku kakurangan, moi misa’ tau tae’ kupamatana’, belanna iatu kakurangangku natutu’ sangsiuluranta tu sae dio mai Makedonia. Mintu’na kunii umpenandai kaleku tu la umpamatana’komi, sia susi dukamo la kupenandainna to tu kaleku.

¹⁰Tonganna tongan katongananna Kristus tu lan kaleku, angku tang dibela diampangi dio mai te kapassattuan iate lan mintu’ lili’na Akhaya.

¹¹Matumbari’? Belannaraka tae’ kupakaboro’komi? Na Puang Matuamora unnissanni.

¹²Apa iatu mangkanna kupogau’ la kupogau’ dukapa, angku puttai tu lalanna to undaka’ lalan, anna tiroi lan kapassattuanna kumua pada-pada bangsiakanni.

¹³Belanna iatu to susito rasulu’ mengkona tu mengkarang lando pa’du sia unna’ga rasulu’Na Kristus kalena.

¹⁴Iatu iannato tangngia memangngai, belanna deata bulituk duka unna’ga kalena susito malaeka’ marorrong.

¹⁵Iamoto tangngia apa makalaen-laen, ke iatu mai pesuanna unna’ga kalena butung to ma’kamayanna kamaloloan; ma’katampakanna tau iato dipapakkanni susitu penggauranna kalena.

¹⁶Sia kukua pole’pa: Da naden misa’ tau ussangana’ baga; apa iake misangai susito, tarima susi duka bangmo’ to baga, angku massattuan duka sidi’.

¹⁷Iatu kupokadanna to, tangngia kupokada situru’ pa’poraianNa Puang, sangadinna butung to baga dio kaussanganna ma’dinna’ ussattuan kaleku.

¹⁸Tu belanna buda tau ussattuan kalena situru’ kapassattuan lino, la ussattuan dukana’ kaleku.

¹⁹Belanna morai siakomi kamu umpama’tananni penaa tu to baga, tandami to kinaa.

²⁰Belanna mipama’tanan sia para’ penaa, ke napokaunankomi tau, ke nakandekomi tau, ke nakale’ke’ikomi tau, ke umpamadaoanni kalena tu tau, ke nasala’pai tau tu lindomi.

²¹Kupomasiri’ umpokadai te, butung to tangganmokan batta’. Apa apa-apa nanii tau barani — ma’kada to baga bangmo’ te — ia duka kunii barani tu iannato.

²²To Ibraniraka tu mati’? Aku to Ibrani dukana’. To Israelraka tu mati’? Aku to Israel dukana’. Taruknaraka Abraham tu mati’? Aku duka taruknana’ Abraham.

²³PesuanNaraka Kristus tu mati’? — ma’kada to tang ma’runduanan bangmo’ te — ondong pissanpi tu aku. Diona kamara’tasan losongna’, diona kaditarungkuan losongna’, diona kadibamban mandu losongna’ sia pembudana’ lan kasanggangan kamatean.

²⁴To Yahudi napellimana’ nabamba, sipempissanmora natang pempatangpulo ke pissanoi;

²⁵pentallunna’ diongkan ue, pissanna’ ditumbui batu, pentallun malammu’ tu kappala’ kunii, sangallo sangbongina’ unnaang lan lu tasik mandalan.

²⁶Pembudana’ lan kalingkan, pembudana’ lan kasanggangan diong lu salu, lan kasanggangan dio mai pa’gora’, lan kasanggangan dio mai bangsaku, lan kasanggangan dio mai to kapere’, lan kasanggangan lan lu kota, lan kasanggangan dio lu padang pangallaran, lan kasanggangan diong lu tasik, lan kasanggangan dio mai sangsiuluran mengkona.

²⁷Lan kamara’tasan sia kamasussan, pembudana’ maroya, lan katangdiaran sia kama’rangan, pembudana’ mangelo, naalana’ sangkang sia tang ma’tamangkale.

²⁸Sia — boko’pato tu mintu’na tang tamanna — tu ussussaina’ keallo-keallo, iamotu unninaa-naa diona mintu’ kombongan.

²⁹Mindara tu to langga’, tang kusolan? Mindara dipatitumbu penaanna, anna tae’ napomalallangi penaangku?

³⁰Iake inang la massattuanna’, la ussattuanna’ apa umpapayan kalang- garangku.

³¹KapenombanNa sia Ambe’Na Puangta Yesu, tu sipato’ dipudi sae lakona, unnissanni kumua tae’ angku buttok.

³²Dio Damsyik napesuan to marayanna datu Aretas urronda’i tu tondok Damsyik la untingkanna’.

³³Angku dirorro’ lan buria’ rokko tembo’ dao mai pentiroan, anna susito tilendokmo’ dio mai limanna.