Read Toraja-Sa'dan 2 KORINTUS 2 Bible Online

2 KORINTUS 2 - Toraja-Sa'dan bible

2 KORINTUS 2

¹Kupamatu’tunmo lan penaangku susite, kumua tae’mo kula mati’ situang kamasussan.

²Belanna iake kupamasussakomi, mindapa tu la umpamarannuna’, ke tang iatu to mangka kupamasussa?

³Iari patunna to tu mangka kusura’, to kumua saena’ manii mati’ anna pamasussana’ tu to sipatu la kupomarannu, belanna kurannuangkomi sola nasang, kumua iatu kaparannuangku mipomarannu duka sola nasang.

⁴Belanna lendu’ masussangku sia matanna’na penaangku umpakatu sura’ mati’, sia sitana’takan uai matangku, tae’ kumua angku sussaikomi, sangadinna kumua ammi issanni tu pa’kaboro’ku tang liu-liu tongan lako kalemi.

⁵Iake denni tau umpabu’tu kamasussan, tae’ naaku manna ussa’dingi, sangadinna, — kumua da angku pamasang bangi tu kadangku — , misa’ding duka pira’ sola nasang.

⁶Iatu to susito silasamo tu pelo’bo tu budakomi ullo’boi.

⁷Sangadinna sipatu la mipagarri’ kasalanna sia mipakatana, da anna bonnongi kamasussan kapuana.

⁸Iamoto kupakilalakomi ammi pamatu’tunni lan penaammi tu pa’kaboro’mi lako.

⁹Ia dukamirato, angku pakatu sura’ lako kalemi, kumua angku nii untandaikomi, ba’tu mengkaola tongankomi lan mintu’na.

¹⁰Minda-minda tu mipagarri’ kasalanna, kupagarri’ duka kasalanna, belanna apa-apa tu mangkamo kupagarri’, ke denni tu sipato’na la kupagarri’, kupagarri’ diona kamu dio oloNa Kristus,

¹¹kumua da’ nasau’ tangnga’ki’ deata bulituk, apa tang taissanpiraka tu lalan penaanna.

¹²Iatongku saemo lako Troas la umpa’peissanan Kareba-kaparannuanNa Kristus, tongku dibungkaran lalan misa’ tete dio Puang,

¹³tae’mi namatana penaangku, belanna tae’ kusitiro siulu’ku Titus. Iamoto, iatongku mangka messiman lako tu tau, malemo’ lako Makedonia.

¹⁴Apa kurre sumanga’na langngan Puang Matua, tu tontong umpasonglo’kan lan mai pa’telangan la male lumiling tama tondok belanna kapataloan tete dio Kristus sia umpatitantan busarungngu’na kaditandaianna Kristus diona kadangki dio lu mintu’ inan.

¹⁵Belanna napobau busarungngu’kan Kristus lako to la dipamakarimman sia to la disanggang napomala’bi’i Puang Matua;

¹⁶ma’bau kamateangkan ke lako to la disanggang umpatu kamatean, apa ianna lako to la dipamakarimman umpatu katuoan ma’bau katuoangkan. Namindara tu la umbelai tu iannato?

¹⁷Belanna kami te tae’ kisusitu tau pira tu umpopandakaran kadanNa Puang Matua, sangadinna malambu’ tongankan ma’kada-kada, susitu lu diona mai Puang Matua, sia dio oloNa Puang Matua kinii umpokadai tete dio Kristus.