Read Toraja-Sa'dan 2 KORINTUS 3 Bible Online

2 KORINTUS 3 - Toraja-Sa'dan bible

2 KORINTUS 3

¹Randukomorakannika untendeng kaleki? Ba’tu undaka’rakannika sura’ umpa’petandan kaleki susitu tau pira, la kipa’pekitanan lako kalemi, ba’tu sura’ dio mai kalemi la kipa’pekitanan lako tau?

²Kamu bangsiamo tu sura’ki, tu tioki’ lan penaangki, tu natandai sia nabasa mintu’ tau.

³Dadi iatu kamu, manassa sura’Nakomi Kristus, buanna pentoeangki, tu disura’ tang tinta, sangadinna penaanNa Puang Matua matontongan, tangngia lako papan batu, sangadinna lako batu ba’tangna tolino.

⁴Puang Matua kirannuan angki katappa’i kumua kilambi’ tu iannato tete dio Kristus.

⁵Tangngia duka kumua kami te nalambi’ kamanarangangki kalena angki sangai kumua manarangkan umpogau’ misa’ apa, sangadinna iatu kamanarangangki lu dio mai Puang Matua.

⁶Ia dukamo umpamanarangkan mendadi to ma’kamayana basse ba’ru, tae’ duka na diona sura’, sangadinna diona Penaa, belanna iatu sura’ ma’pamate, apa iatu Penaa ma’patuo.

⁷Apa iake nakabu’mi kamala’biran tu toean umbaa kamatean, tu dioki’ lako papan batu, naurunganni tang nasau’mo tu to Israel umpemaranga lindona Musa, belanna arrang kamala’biranna lindona, tu kamala’biran tae’ nasalai tang pa’de,

⁸tae’raka nala ondong pole mala’bi’na tu toean Penaa?

⁹Belanna iake mala’bi’i tu toean umpasae ukungan, ondong polepa tu toean umpasae kamaloloan tang la mallean kamala’biranna.

¹⁰Belanna inang tonganna tae’ nadipakala’bi’ lan te iannate tu mangkanna dipakala’bi’, apa iamo iate tu kamala’biran pasau’na.

¹¹Belanna iake denni kamala’biranna tu la pa’dena, ondong polepa tu tontongna tang la nakabu’ kamala’biran.

¹²Belanna den rannungki susito, angki barani ma’kada-kada,

¹³sia tae’ kima’pasusi Musa membungku’, kumua da anna pemarangai to Israel tu ma’kalolokanna apa la pa’de.

¹⁴Apa dipamakarra’mo penaanna tu tau iato belanna sae lako te totemo tontongpa den tu pebungku’, tae’pa natilendok, ke umbasaoi sura’ basse dolo, belanna Kristus manna umpa’dei tu pebungku’ iato.

¹⁵Sae lako te totemo, ianna dibasa tu sura’na Musa, nasamboi pebungku’ iato tu penaanna.

¹⁶Apa ianna tibalik lako Puang tu penaanna, dilendokan tu pebungku’ iato.

¹⁷Iatu Puang, Penaa, na umba-umba nanii den tu PenaanNa Puang, indemo to nanii katilendokan.

¹⁸Apa kita sola nasang te tang membungku’na, nanii bayo-bayo kamala’biranNa Puang butung misa’ sammin, sia membaliki’ susitu rupa iato nasakendek-kendekna kamala’biranta, susitu lu diona mai PenaanNa Puang.