Read Toraja-Sa'dan 2 KORINTUS 4 Bible Online

2 KORINTUS 4 - Toraja-Sa'dan bible

2 KORINTUS 4

¹Tu belanna sikambi’kan te toean iate, anna tete dio kamamasean mangka dipakitangkan, natae’ kisoso’ penaa,

²sangadinna kirampanammo tu mintu’ apa kabunian, tu umpabu’tunna kamasirisan, sia tae’ kipogau’i tu pakira-kira ba’tu untuka’i kadanNa Puang Matua, sangadinna umpamanassakan tonganna, angki pa’petandan kaleki lako sukaran inaanna mintu’ tau dio oloNa Puang Matua.

³Apa iake kasamboanni tu Kareba-kaparannuangki, kasamboan lakomira to la sanggang,

⁴tu mangka napabuta datunna lino tu mata penaanna to tang ma’patongan, kumua da anna kita arrang kamala’biranNa Kristus iamotu rupanNa Puang Matua.

⁵Belanna tangia kaleki kipa’peissanan, sangadinna Kristus Yesu, kumua Iamotu Puang, na kami te kaunanmikan tu belanna Yesu.

⁶Belanna Puang Matua mangka ma’kada kumua: La parrang, tu arrang lan mai malillinna, Ia dukamo parrang lan penaangki umpaarrangikan kapaissanan kamala’biranNa Puang Matua lan rupanNa Kristus.

⁷Apa iate apa mala’bi’ iato den dio kaleki lan misa’ pa’pannian litak, anna manassa tu kalosongan kuasanna kumua lu dio mai Puang Matua, tangngia lu dio mai kaleki.

⁸Disilatukki tikukanni sae, apa tae’ angki disirimpi’i, dipaselangkan, apa tae’ anna ka’tu rannungki;

⁹dipakario-riokan apa tae’ angki disa’biangan; dipemparrakangkan apa tae’ angki sanggang.

¹⁰Tontong bangkanni umperasai tu kamaparrisan kamateanNa Yesu lan kaleki umba-umba kinii male, kumua anna payan duka lan kaleki tu katuoanNa Yesu.

¹¹Belanna iate kami tuona te tontong bangkanni disorong lako kamatean tu belanna Yesu, kumua anna payan duka lan te kale la mate tu katuoanNa Yesu.

¹²Iamoto iatu kamatean mengkuaro lan kaleki, apa iatu katuoan lan kalemi.

¹³Apa belanna den dio kaleki tu Penaa kapatonganan, susitu disura’, nakua: Kupatonganmo, iamoto angku mangka ma’kada; susi dukamoto te kami kipatongan, iamo napobannangto angki ma’kada-kada duka.

¹⁴Belanna kiissan kumua iatu Puang Matua mangka umpamalimbangun Puang Yesu la umpamalimbangun dukakan sola tu Yesu sia umpopennolokan sola kamu.

¹⁵Apa mintu’nate iannate dadi tu belanna kamu, kumua anna iatu pa’kamasean tu sakerangngan-rangnganna belanna sabuda-budanna bilanganna tu tau, umpopemba’ka’i tu pa’kurre sumanga’ Napomala’bi’ Puang Matua.

¹⁶Iamoto anna tae’ nasoso’ tu penaanta, belanna moi disanggang tu a’gan kale tang marendengta, apa iatu a’gan ba’tengta diba’rui keallo-keallo.

¹⁷Belanna iatu kamaparrisanta tu maringngan bangsia sia tae’ nasangapa, umpabu’tuangki’ misa’ ma’kalolokanna kamala’biran matontongan,

¹⁸belanna tae’ tamentiro lako apa natiro mata, sangadinna mentiro lakoki’ tang natirona mata, belanna iatu natirona mata sattu’ri, apa iatu tang natirona mata tontong sae lakona.