Read Toraja-Sa'dan 2 KORINTUS 5 Bible Online

2 KORINTUS 5 - Toraja-Sa'dan bible

2 KORINTUS 5

¹Belanna taissan kumua iake dirondonnimi tu tenda tanii torro lan te lino, la unnappa’ki’ misa’ banua lu dio mai Puang Matua dao suruga, la tanii torro, tu tangngia panggaraga lima, sangadinna tontong sae lakona.

²Iamoto anta sumarro indete kumua mamali’ki’ la umperrampangi tu banua lu daota mai suruga.

³Iake merrampangki’, tae’ tadikabu’tui ma’kale-kale.

⁴Belanna iake lanpaki’ te tenda iate, sumarroki’, apa magasa pamaanta, belanna tang taporai dipopa’kale-kale, sangadinna la ditamangkaleiriki’, kumua anna kapu’i katuoan tu la matena.

⁵Na iatu umpasakka’ki’ tama tu iannato, iamotu Puang Matua, tu mangka duka umpa’ba’gian Penaa lako kaleta butung pa’petamben.

⁶Iamoto anta tontong umpabatta’ penaanta, belanna taissan kumua iake lanpiki’ te kale iate, sikambelaki’ Puang.

⁷Belanna lumingka kapatonganangki’, tangngia lumingka pentiroki’.

⁸Apa batta’ tu penaanta sia tala’biran untampei te kale iate, anta tama banuanNa Puang.

⁹Ia dukamoto anta pengkullei, la torro lannaki’ lu, la torro saliannaki’, kumua Naalaki’ penaanNa Puang.

¹⁰Belanna tae’ nasalai tang payan nasangki’ dio tingo isungan pangra’tasanNa Kristus, anta pantan untarimai tu pakkanna, tumba tu mangkanna tapogau’ tonta lanpa batang kaleta, la melo la kadake.

¹¹Tu belanna kiissan tu diona ungkataku’ Puang, iamoto angki ada’i tu tau anna ma’patongan, apa lako Puang Matua inang payan bangmokan, kurannuan angki payan duka lan sukaran inaammi.

¹²Tae’mo kila umpa’petendengan kaleki lako kamu, sangadinna la kibenkomi tu bannangna la minii ussattuangkan, anna den mipebalian lako to ussattuan kalena diona apa natiro mata, na tangngia diona apa lan lu ba’tang.

¹³Belanna iake butungkan to katamataman, napomala’bi’ Puang Matua, apa iake malinokan mipomaupa’.

¹⁴Belanna napatundukkan tu pa’kaboro’Na Kristus, tu kikanassai kumua matemo tu Tau misa’ tu belanna iatu mintu’ tau, iamora bannangnato anna matemo sola nasangi.

¹⁵Sia mateMo tu belanna mintu’ tau, kumua anna iatu to tuopa, da anna untuoan kalena, sangadinna la untuoanni tu To mangkamo mate sia malimbangun belanna iatu mai tau iato.

¹⁶Iamoto randuk te totemo tae’ misa’ duka tau kitandai diona a’gan tolinona. Ke susinna kitandaimi tu Kristus diona a’gan tolinona, apa totemo te tae’mo kitandai susito.

¹⁷Iamoto iake denni misa’ tau tuo lan Kristus, iamo pa’padadi ba’ru; iatu mai apa malaun pa’demo; na tonganna dipopendadi ba’rumo.

¹⁸Apa mintu’na tu iannato lu dio nasang mai Puang Matua, tu mangka umpasikaeloki’ Kalena tete dio Kristus sia umpa’kamasean toean kasikaeloan lako kaleki.

¹⁹Belanna tete dio Kristus Nanii Puang Matua umpasikaeloi Kalena tu issinna te lino, sia tae’ Narekenni lako kalena tau tu kasalanna sia Napatu’gunnikan tu kareba kasikaeloan.

²⁰Iamoto kidadi pesuanNa Kristus sia kiissan, kumua Naposumbungan pudukkan Puang Matua ma’pakilala; angki ma’kada dio Kristus umpalakui kumua: Sangapaoi upa’ ammi dipasikaelo Puang Matua!

²¹Anna Ia tu tang narandan kasalan, mangkamo Napopendadi kasalan ussondaki’, kumua anna kita mendadi kamaloloanNa Puang Matua diona Ia.