Read Toraja-Sa'dan 2 KORINTUS 6 Bible Online

2 KORINTUS 6 - Toraja-Sa'dan bible

2 KORINTUS 6

¹Apa iatu kami pada mengkarangna, kipalaku duka lako kalemi, da ammi tarima tang keangga’i tu pa’kamaseanNa Puang Matua.

²Belanna susite tu kadanNa: Iake attu dipopaiman Kuperangiimoko, na iake allo kamakarimmanan Kutunduimoko. Tonganna iamote totemo tu attu Napopaiman Puang Matua, tonganna iamote totemo tu allo kamakarimmanan.

³Tae’ angki pabu’tu katitumbuan diona misa’ duka apa, da anna disayu tu toeangki.

⁴Sangadinna lan mintu’na apa, kami kalena umpa’petandan kaleki mendadi to mengkarangNa Puang Matua, diona kabattaran penaa sia lan kadipakario-rioan, lan kamasussan lan kasumpuan,

⁵lan kadibamban, lan kaditarungkuan sia kamarukkan, lan kamara’tasan, sia kamaroyan sia kamangeloan;

⁶lan kamasalloran, lan kapaissanan, lan pesuka’ kalando, lan kamasokanan, lan Penaa Masallo’, lan pa’kaboro’ tang balle-balle,

⁷lan kapa’peissanan lambu’ lan kamatotoranNa Puang Matua, sitetang pa’buno kamalamburan lan lima kairi sia kanan,

⁸lan kamala’biran sia kamadiongan, lan kadipalele-bekoan sia kadipudian, sitinti to pakira-kira anna manappa’,

⁹butung to tang katandan, apa katandan duka; susito mate, apa tonganna tuokan, butung to dipakario-rio, apa tae’ nalanda’ dipatei;

¹⁰butung to masussa, apa tontong parannu; susito kalala’, apa umpasugi’ buda tau; susito tang unnampui misa’ apa, apa unnampui mintu’na.

¹¹E kamu to Korintus, tang mari’pi tu pudukki mati’ sia tibungka’ tu penaangki.

¹²Tae’ ammi pangkun lan penaangki, apa pangkunkanni lan penaammi.

¹³Totemo la sisonda-sondaki’ — butungna’ to umpa’kadai anakku te kumua: la tibungka’ duka tu penaammi.

¹⁴Da mimisa’ ayoka sola to tang ma’patongan; belanna apara tu kasiduluanna kamaloloan na kabattukan? ba’tu umbara nakua sita’pa masiangna tu malillinna?

¹⁵Sia apara tu kasiduluanNa Kristus na Belial? ba’tu apara tu ba’gi nasidului to ma’patongan na to tang ma’patongan?

¹⁶Sia apara nasikandei banuanNa Puang Matua tu deata? Belanna kitamote tu banuanNa Puang Matua matontongan, susitu kadanNa Puang Matua, Nakua: La torroNa’ sia la sumalongNa’ dio lu naninna tau iato, sia la mendadiNa’ Puangna tau iato, anna tau iato la mendadi taungKu.

¹⁷Iamoto tassu’komi dio mai to’ to kapere’, sia messarakkomi, susimoto tu kadanNa Puang, sia da mirumbui tu apa maruttak; na Aku umpaalaikomi bilangan,

¹⁸sia angKu mendadi Ambe’mi, ammi dadi anakKu muane sia anakKu baine, susimoto tu kadanNa Puang tu Umpoissan angge maritik.