Read Toraja-Sa'dan 2 KORINTUS 8 Bible Online

2 KORINTUS 8 - Toraja-Sa'dan bible

2 KORINTUS 8

¹E kamu siulu’ku, kipokadangkomi tu pa’kamaseanNa Puang Matua Napa’kamasean lan mintu’na kombongan Makedonia.

²Apa belanna moi sangtumbanna tu kamaparrisan kadisudianna, payan duka tu kabattaranna, anna iatu kaparannuan tang puranna sia kamakario-rioan masangna umpalempan kasugiran kamasokananna.

³Belanna — aku ungkatottongi — napa’bengan angge nabelanna, ontongpi losong na iatu nabelanna,

⁴sia kamasorokanna anna mengkamoya-moya lako kaleki diona tu pa’kamasean la untamai umposara’i tu mai to masallo’.

⁵Sia tae’ nasusi manna tu kisanganna, sangadinna inang ussorongmo kalena dolo lako Puang, namane lako kaleki situru’ pa’poraianNa Puang Matua,

⁶naurunganni kipalaku lako Titus, susitu naparandukmo dolona, susi dukato la napalanda’ lako kalemi tu toean kamamasean.

⁷Susitu kala’biammi diona mintu’na, la diona kapatonganan, la diona kada, la diona kapaissanan na mintu’ sara’mi sia kamipakaborosangki pa’kaboro’ kitadoangkomi, palattu’i pakala’bian dukai te diona pentoean kamamasean.

⁸Tae’ kulaoan susii parenta te iannate, sangadinna sara’na to senga’ la kusudian kamalamburan kamamaseammi.

⁹Belanna miissan tu pa’kamaseanNa Puangta Yesu (Kristus) kumua iatu Ia, moi anNa sugi’, apa mendadi kalala’ tu belanna kamu, kumua anna kamu umposugi’i tu kakalalaranNa.

¹⁰Indemote kunii umpokadangkomi passangangku. Belanna iatu iannato den patunna lako kalemi, tu kumua randuk dio mai taun lendu’, kamumo tu bunga’na umparandukki, tae’ kumua mipogau’ mannai, sangadinna pa’poraiammi duka.

¹¹Palanda’ dukami totemo te tu penggauran iato, anna susitu diongna penaammi, susi dukato la mipalanda’ tu sitinayanna daka’mi.

¹²Belanna iake denni diong penaa iamoto nadikaringnganan sitinaya tu apa den dio kalena, tangia sitinaya apa tae’ dio kalena.

¹³Belanna tangia kumua anna manaman tu to senga’ ammi masussa kamu.

¹⁴Apa dikuari ammi pada dandan, iatu mallebana dio kalemi lan te attu iate, la ungganna’i tu tang palambi’na dio kalena, na iatu mallebana dio kalena ungganna’i tu tang palambi’na dio kalemi, dikua ammi pada-pada.

¹⁵Susitu disura’, nakua: Iatu to unnalai buda tae’ nala losong, na iatu to unnalai sidi’, tae’ nala kakurangan.

¹⁶Apa kurre sumanga’na langngan Puang Matua, tu mangka umpa’kamaseanni tu kamatutturan iato tama penaanna Titus tu belanna kamu.

¹⁷Tu napasiola tu pa’pakilalangki, sia kamatutturanna tongan namaringngan penaanna mati’ umpellambi’ikomi.

¹⁸Angki suai te siulu’ki male mati’ sola, tu dipudinna lan mintu’ kombongan diona kaumpalolanganna Kareba-kaparannuan.

¹⁹Sia tae’ na ia manna tu iannato, sangadinna mangka dukamo napamatu’tun mintu’ kombongan la kisisolan lan te pentoean kamamasean iate, tu kipalingka lako kamala’biranNa misa Puang sia la napomanassa duka kamaringnganan penaangki.

²⁰Angki ma’ta’tan dikua da na sura’- kan tau lan te pentoean nanii pame- ngan kapua.

²¹Belanna ungkaritutuikanni sanga, tangia dio manna oloNa Puang, sangadinna dio duka tingayona tolino.

²²Angki suai sola tinde tau sola duai tu siulu’ki, tu pembudamo mangka kitiro tu sara’na lan ba’tu pira-pira penggauran; na totemo sakendek-kendekna kamatutturanna, belanna nakanappa’i tongankomi.

²³Iatu diona Titus, iamo sibangku sia to umbaliina’ umposara’komi, na diona tu siulu’ta da’dua, iamo nasua mintu’ kombongan sia kamala’biranNa Kristus.

²⁴Iamoto pa’pekitananni tu tanda pa’kaboro’mi lako dio tingayona mintu’ kombongan, sia kakisattuanammi.