Read Toraja-Sa'dan 2 KORINTUS 9 Bible Online

2 KORINTUS 9 - Toraja-Sa'dan bible

2 KORINTUS 9

¹Iatu diona untulung to masallo’ manggi’opara kupokadangkomi lan te sura’.

²Belanna kutandai tu kamasorokan penaammi tu napobannang kusattuangkomi dio tingayona to Makedonia, to kumua sangtaunmo lendu’na nanii ma’pasakka’ tu Akhaya, na iatu kamatutturammi umpatiakka’ penaanna buda tau.

³Apa kusua te mai siulu’ dikua da natang kebattuan lan iannate tu kakisattuanammi, ammi ma’pasakka’ susitu kupokadannamo,

⁴da anna saena’ manii mati’ sola to Makedonia, anna lambi’komi tae’pa mima’pasakka’, anna kami — tae’ kukua kamu — dipakasiri’ lan te kapa’rannuanan kapua iate.

⁵Iamoto kusangai melo, ke kupalakui lako te siulu’, namale mati’ umpellambi’ikomi dolo, anna pasakka’ doloi tu pamengan kamasokanan mangka miallu’, anna sakka’ butung pamengan kamasokanan tangngia pamengan diparuku.

⁶Apa pengkilalai te kada iate: Minda-minda tu manenneng mantanan, manenneng duka mepare, na minda-minda tu malabo mantanan, malabo duka mepare.

⁷Da’ito anna pantan mamengan situru’ kamatinurusan penaanna, da naturu’i katangmasorokan penaa ba’tu diparuku. Belanna iatu Puang Matua ungkamasei to masorok penaanna mamengan.

⁸Kuasa tu Puang Matua umpakabu’ikomi pa’kamaseanNa, ammi tontong tang kakurangan lan mintu’na, naurunganni kala’biangkomi lan mintu’na penggauran melo.

⁹Susitu disura’, nakua: Iatu massearan, sia Ia mamengan lako to kalala’, na iatu kamaloloanNa tontong sae lakona.

¹⁰Apa Puang tu umpa’bengan banne lako to mangambo’ sia kande la dikande. Ia duka la umpa’kamaseanni sia umpopemba’ka’i tu pangambo’mi sia umpatarri’i tu bua kamaloloammi,

¹¹anna anggenna minii dipasugi’ ammi urunganni umpogau’ mintu’ kamasokanan, tu umpabu’tui tu pa’kurre sumanga’ langngan Puang Matua tete dio pa’pakilalangki.

¹²Belanna iate pentoean kamamasean iate tangngia manna umpasitutu’ kakuranganna to masallo’, sangadinna kala’bian pole’pa diona kabudanna pa’kurre sumanga’ langngan Puang Matua.

¹³Sia belanna manassa tu kamarurusammi lan te pentoean kamamasean iate anna umpakala’bi’ Puang Matua, belanna mipengkaolai tu kapangakuammi lako Kareba-kaparannuanNa Kristus, sia belanna kamasokanammi umpaketaai tu tau iato sia mintu’ tau.

¹⁴Sia lan tu kanapassambayangammi nakamali’komi, tu belanna nakilalai tu pa’kamasean kapuaNa Puang Matua lako kalemi.

¹⁵Kurre sumanga’na langngan Puang Matua, tu diona tu pa’kamase tang dilambi’Na dipokada.