Read Toraja-Sa'dan GALATIA 1 Bible Online

GALATIA 1 - Toraja-Sa'dan bible

GALATIA 1

¹Iate sura’ lu dio mai Paulus, misa’ rasulu’ — tang lu dio mai tolino sia tang petambana duka tolino, sangadinna petambaNa Yesu Kristus sia Puang Matua Ambe’, tu mangka umpamalimbangun Yesu dio mai to’ to mate — ,

²sola mintu’ sangsiuluran tu kusisolanna, diparampoan mintu’ kombongan dio Galatia,

³narampoimorokomi kamaturu-turuan sia kamarampasan dio mai Puang Matua, Ambe’ta, sola Puang Yesu Kristus,

⁴tu mangka ussorong Kalena belanna kasalanta, kumua anna lendokangki’ dio mai te lino kadake, situru’ pa’poraianNa Puang Matua, Ambe’ta.

⁵Lu lako Kalena tu kamala’biran sae lakona. Amin.

⁶Mangngana’, tu madomi’ bangkomi memboko’ dio mai tu to untambaikomi torro lan pa’kamaseanNa Kristus, ammi lu lako kareba-kaparannuan senga’,

⁷anna iatu senga’na tangia Kareba-kaparannuan; apa den tu tau pira umpapusakomi sia la morai umbulang leko’ Kareba-kaparannuanNa Kristus.

⁸Apa iake kami te ba’tu moi misa’ malaeka’ dao mai suruga la umpa’peissananni lako kalemi tu Kareba-kaparannuan sisengaran tu mangkanna kipa’peissanan lako kalemi, nake naruai tampak ropu.

⁹Tumba tu mangkanna kipokada pirambongi’, totemo ia duka kupokada pole’, kumua iake denni misa’ tau umpa’peissanan Kareba-kaparannuan lako kalemi sisengaran tu mangkanna mitarima, nake naruai tampak ropu.

¹⁰Na totemo ussedera’ka tolino, ba’tu Puang Matua? Ba’tu undaka’ra’ka lalan kumua anna poraina’ tolino? Iake mukkunna’ undaka’ lalan kumua anna poraina’ tolino, manassa tangiana’ taunNa Kristus.

¹¹E kamu sangsiulurangku, kupaissanangkomi, kumua iatu Kareba-kaparannuan kupa’peissanan, tangia situru’ a’gan tolino.

¹²Belanna tae’ kutarima lu dioi mai tolino, sia tae’ duka angku pelada’i, sangadinna diona pa’paombo’Na Yesu Kristus lako kaleku.

¹³Belanna mirangi siamo tu diona gau’ku pirambongi’, tongku lanpa aluk Yahudi, kumua lendu’ kupakario-riona tu kombonganNa Puang Matua sia kubala’-bala’,

¹⁴sia samanakka-nakkaku lan aluk Yahudi, kusau’ nasang tu mai mintu’ sangbara’ku dio bangsaku, belanna lendu’ kupengkulleinna tu panganna nene’ to doloku.

¹⁵Apa iatonna poelo’mi Puang Matua tu umpamarimbangan tempon lanna’ mai pa’tambukanna indo’ku, sia untambaina’ diona pa’kamaseanNa,

¹⁶la umpaombo’i tu AnakNa lan kaleku, kumua angku pa’peissananNi dio lu to kapere’, ta’pa tae’ bangsiami angku timbang mandalanni tu a’gan tolino;

¹⁷sia tae’ duka kulao langngan Yerusalem umpellambi’i tu mai to dolo mendadi rasulu’ na aku, sangadinna lu lakona’ tana Arab, angku sule pole’ dio Damsyik.

¹⁸Ma’tallung taun lendu’nato malemo’ langngan Yerusalem, la lao sitandan Kefas, angku torro sola sangpulo lima allona.

¹⁹Apa iatu mai rasulu’ senga’ moi misa’ tae’ kusitiroan, ia manna tu Yakobus, siulu’Na Puang.

²⁰Iate apa kusurasangkomi te, tae’ angku mo’rang, tang la Puang Matuaraka untiroi.

²¹Undinnato malemo’ lako tana Siria sia Kilikia.

²²Apa tae’pa naperupana’ tu mai kombonganNa Kristus dio tana Yudea;

²³sangadi napekareba-reba bangri kumua iatu to umpakario-rioki’ pirambongi’, totemo te umpa’peissanammo Kareba-kaparannuan diona kapatonganan, tu nabala’-bala’ pirambongi’.

²⁴Umpakala’bi’mi Puang Matua tu diona aku.