Read Toraja-Sa'dan GALATIA 2 Bible Online

GALATIA 2 - Toraja-Sa'dan bible

GALATIA 2

¹Sangpulo a’pa’ taunna undinnato, male pole’mo’ langngan Yerusalem sola Barnabas sia kusolan tu Titus.

²Iatu kalaoangku langngan, pa’patudu-tudunNa duka Puang Matua, angku pamanassanni tau iato tu Kareba-kaparannuan kupa’peissanan dio lu to kapere’, ondonganna lako to katandan, dikua da anna torro sala tu kamara’tasangku, la iate totemona la iatu lendu’namo.

³Iatu Titus kusolan, tonganna bangsa Yunani, apa tae’ dukara nadiparuku umpogau’ sunna’.

⁴Tu belanna iatu mai siulu’ leko’ penaanna, tu tama kamama’, iamotu tama buni bang la umpenniroi tu katilendokangki dio mai panganna to dolo, tu kitoe tete dio Kristus Yesu, kumua napalutamakan kakaunanan panganna to dolo.

⁵Tae’ kimengkanorong len lako tau iato moi sattu’ duka, dikua anna tontong manda’ tu kamanapparanna Kareba-kaparannuan miallonni.

⁶Apa iatu to katandan — moi matumba kapuana pirambongi’ tae’ sisengaranna keaku, belanna tae’ Namentiro lindo lako tau tu Puang Matua — iatu to katandan tae’ misa’ apa napopa’indo’ lako kaleku.

⁷Apa sibalikanora, iatonna tiromi kumua dipakambi’imo’ tu kadipalolanganna Kareba-kaparannuan lako to tang disunna’, susi tu dipakambiran Petrus lako to disunna’,

⁸— belanna Puang tu umpalao kuasanNa dio Petrus lan toean rasulu’ lako to disunna’. Ia dukamo umpalao kuasanNa dio kaleku lako to kapere’ —

⁹iatonna kanassami tinde tau tu pa’kamasean disorong lako kaleku, sitoe limamo’ sola Barnabas tu mai sia Yakobus na Kefas na Yohanes, tu dibilang paloloan kombongan, tanda kasisanginaan, kumua angki lu lako to kapere’, anna lu lako ia to disunna’.

¹⁰Samamira diong penaanna to kumua angki kilalai tu mai to mase-mase, anna iatu iannato inang kupa’inaai bangmo.

¹¹Apa iatonna sae tu Kefas lako Antiokhia kubalimi dio tingayona tau, belanna tang salunna naola.

¹²Belanna iatonna tang saepa tu ba’tu pira-pira to malang dio Yakobus, kumandemo ma’talimbungan sola to kapere’; apa iatonna saemo, soro’mi, nauntoyangan kalena, belanna mataku’ lako to disunna’.

¹³Sia iatu mai to Yahudi senga’ menturu’ belo puduk sola, naurunganni napapusa kabelo-pudukanna tinde tau tu Barnabas.

¹⁴Apa iatongku tiroi tu gau’na tinde tau tang situru’mo kamanapparanna Kareba-kaparannuan, kukuami ungkuan Kefas dio tingayona mintu’ tau: Iake to Yahudiko, ammu ma’gau’ to kapere’, tang ma’gau’ to Yahudi, umba la mukua umparukui tu to kapere’ ma’gau’ to Yahudi?

¹⁵Kita te bati’ to Yahudiki’, tangiaki’ to kadake gau’, bati’ lu dio mai to kapere’,

¹⁶apa taissan kumua tae’ misa’ tau dibilang malolo belanna ungkaritutui tuntunan Sukaran aluk, sangadinna kapatongananri lako Kristus Yesu, tenmoto anta patonganni tu Kristus Yesu, kumua anta dibilang malolo diona kapatonganan lako Kristus, tangia kumua diona ungkaritutui tuntunan Sukaran aluk, belanna iatu ungkaritutui tuntunan Sukaran aluk, moi misa’ tau tae’ dibilang malolo.

¹⁷Apa iake kita kalena tu to umpengkali-kalii la dibilang malolo tete dio Kristus, payanan to kadake gau’, to ma’kamayanaraka pale’ kasalan tu Kristus? Inang tae’ ia to!

¹⁸Belanna iake la kupabendan pole’i tu apa mangka kurondon, manassana’ to untengkai tuntunan Sukaran aluk.

¹⁹Apa belanna Sukaran aluk angku mate, kupotilendokki dio mai Sukaran aluk, dikua angku pengkaolai Puang Matua. Mangkamo’ dia’ta’ sola Kristus.

²⁰Iatu tuoku te tangiamo aku umpoissanni, sangadinna Kristus tu tuo lan kaleku; apa iatu kupotuona lan kaleku totemo te, umpokatuoanna’ kapatonganan lako AnakNa Puang Matua, tu ungkamaseina’, sia ussorong Kalena belanna aku.

²¹Tae’ angku tumpui tu pa’kamaseanNa Puang Matua, belanna iake tete dio Sukaran aluk anna den tu kamaloloan, tae’ patunna tu Kristus mate.