Read Toraja-Sa'dan GALATIA 3 Bible Online

GALATIA 3 - Toraja-Sa'dan bible

GALATIA 3

¹E to Galatia baga, mindamora mangka umpakannaikomi issan-issan, anna iatu kadipa’peissananNa Yesu Kristus mangka dia’ta’ butung to dio bang lindomi tu rupanNa?

²Inde mannari tu la moraina’ unnissanni dio mai kalemi: Dionaraka ungkaritutui tuntunan Sukaran aluk ammi tarima Penaa, ba’tu dionaraka kadipalolanganna kapatonganan?

³Ammi bagara kamu susito? Miparanduk lenmo tu diona Penaa, anna totemo la milolokkimo mentolinona?

⁴Tae’raka bua’na miduppa tu iannato? Tae’ tonganni manii bua’na.

⁵Iatu To umpa’kamaseanni tu Penaa lako kalemi sia umpadenangkomi tanda kamatotoran, tete dioraka ungkaritutui tuntunan Sukaran aluk, anNa pogau’i tu iannato, ba’tu tete dioraka kadipalolanganna kapatonganan?

⁶Iatu iannato susi bangsia tu diona Abraham umpatongan Puang Matua, iamoto tu dibilang napomalolo;

⁷iamoto la miissan kumua mintu’na tu to umposande’ kapatonganan, iamo anakna Abraham.

⁸Belanna nakita dolomo Sura’ Madatu, kumua tete dio kapatonganan anNa bilang maloloi Puang Matua tu to kapere’, anNa pa’peissanan dolomi tu Kareba-kaparannuan lako Abraham Nakua: Bannang dio kalemu la nanii ungkabu’tui kamauparan tu mintu’ to kapere’.

⁹Iamoto anna mintu’ to umposande’ kapatonganan ungkabu’tui kamauparan sola Abraham to ma’patongan.

¹⁰Belanna samami tu to umposande’ tuntunan Sukaran aluk, samami naluang tampak ropu, belanna den disura’ nakua: Tampak ropu lako tu mintu’ to tang batta’ ungkaritutui mintu’ tu disura’na lan sura’ Sukaran aluk.

¹¹Manassa tae’ misa’ tau nabilang malolo tuntunan Sukaran aluk dio oloNa Puang Matua, belanna: Iatu to malolo la umpotuo kapatonganan.

¹²Apa iatu tuntunan Sukaran aluk tangia lu dio mai kapatonganan, sangadinna minda-minda umpogau’i la napotuo.

¹³Mangkamoki’ Nala’bak Kristus dio mai tampak ropu Sukaran aluk, apa Ia mendadi tampakan ropu belanna kita, belanna nakua lan sura’: Tampak ropu lako mintu’ to titoke’ dao kayu.

¹⁴Kumua anna rampo lako to kapere’ tu kamauparanna Abraham, tete dio Yesu Kristus, sia anta tarimai tu Penaa diallu’ diona kapatonganan.

¹⁵E sangsiulurangku, ma’kada tolino siamo’: moi anna panglampak tolino bangsiara, ke mangkami dipakatua, tae’mo tau misa’ undampai ba’tu urrangnganni.

¹⁶Mintu’na tu pangallu’ iato, Naallu’ Puang Matua lako Abraham sia lako tarukna. Tae’ Nakua kumua: Sia lako mintu’ tarukna, susito ke lako to buda, sangadinna susito ke lako Misa’ Tau, Nakua: Sia lako Tarukmu, iamotu Kristus.

¹⁷Inde sia tu kadangku: kumua iatu Sukaran aluk, tu a’pa’ratu’ tallungpulo taunna undinna namane bu’tu, tae’ nakullei undampai tu panglampak, Napakatua dolomo Puang Matua, anna diputtai tu pangallu’ iato.

¹⁸Belanna iake lu dioi mai tuntunan Sukaran aluk tu mana’, tangiamo lu dio mai pangallu’; apa mangkamo tu Puang Matua umpa’kamaseanni tu mana’ lako Abraham tete dio pangallu’.

¹⁹Apara patunna tu Sukaran aluk? ia sia nadipangrangnganan belanna diona kasalan, sae lako saeNa tu To napatu tu pangallu’; na iatu sukaran aluk naparampomo malaeka’ lako misa’ to pasumbungan.

²⁰Iatu to pasumbungan tae’ nasangbalinna manna nasumbungan, apa iatu Puang Matua inang Misa’ri.

²¹Iake susito, sisarangnga’raka pangallu’ Na Puang Matua tu Sukaran aluk? Inang tae’ ia to. Belanna iake dipa’benganmi tu Sukaran aluk, tu ma’din mepatuo, manassa bu’tu lu dio mai Sukaran aluk tu kamaloloan.

²²Apa napaalai nasangmo Sura’ Madatu tama lili’na kasalan tu mintu’na, kumua anna dipa’kamasean lako to ma’patongan tu pangallu’ umpotete kapatonganan lako Yesu Kristus.

²³Apa iatonna tang saepa tu kapatonganan, naluang nasangki’ kuasanna Sukaran aluk, butungki’ to dikurung umpeagi kapatonganan la dipaombo’.

²⁴Iamoto iatu Sukaran aluk mendadi misa’ pa’pamatota iato mepalulako Kristus, kumua anta dibilang malolo tete dio kapatonganan.

²⁵Apa iatonna saemo kapatonganan, tae’mo naonganniki’ pa’pamatota.

²⁶Belanna iatu kamu sola nasang anakNakomi Puang Matua tete dio kapatonganan lako Yesu Kristus.

²⁷Belanna pira-pirakomi tu didio’ tama Kristus, umpopakemokomi Kristus.

²⁸Tae’mo to Yahudi lan, ba’tu to Yunani, tae’mo kaunan ba’tu to makaka, tae’mo muane ba’tu baine; belanna iatu kamu sola nasang mendadi misamorokomi lan Kristus Yesu.

²⁹Belanna iake taunnakomi Kristus, kamumo tu tarukna Abraham, iamotu mana’ napatu tu pangallu’.