Read Toraja-Sa'dan GALATIA 4 Bible Online

GALATIA 4 - Toraja-Sa'dan bible

GALATIA 4

¹Inde sia tu kadangku: iatonna piapa tu to ma’mana’, tae’ bang sisengaranna misa’ kaunan, moi anna ia puangna tu mintu’na.

²Apa mengkaola lako passulle ambe’na sia to mangingko’na, sae lako nalambi’na tu attu napamanassa dolomo ambe’na.

³Ten dukamoto te kita, iatonta piapa, mengkaolaki’ lako aluk lino dolo.

⁴Apa iatonna lambi’mi kagannaranna attu, Nasuami Puang Matua tu AnakNa tu dadi dio mai misa’ baine, tu dikianakan naonganni Sukaran aluk.

⁵Kumua anNa la’bakki tu mintu’ to naonganni Sukaran aluk, sia kumua anta ala katonganan to dianak.

⁶Belanna diona kadianakammi Namangkamo Puang Matua ussua PenaanNa AnakNa tama penaanta tu metamba kumua: Abba, o Ambe’.

⁷Naten pole’to, tangiamoko kaunan, sangadinna anak, sia iake anakko, ma’mana’ dukako tete dio Puang Matua.

⁸Apa attu iato, belanna tang untandaikomi Puang Matua, umpopengkaolamokomi kalemi lako deata, tu inang tonganna tangia deata.

⁹Apa totemo, tu untandaimokomi Puang Matua, ontongpi Natandaimokomi Puang Matua, umba nakua ammi balik pole’o lako tu aluk lino dolo, tu langga’na sia kalala’na, naurunganni la umpopengkaola pole’omokomi kalemi lako?

¹⁰Mipakala’bi’ tu allo sia bulan sia attu dipakaraya sia taun.

¹¹Kukaselangangkomi, kumua iamo ke la tae’ lenni bua’na tu kamara’tasangku lako kalemi.

¹²E kamu sangsiulurangku, kupalaku lako kalemi ammi susi aku te, belanna aku te susi dukana’ kamu. Moi misa’ tae’ miposala lako kaleku.

¹³Miissan kumua mulanna angku pa’peissanan Kareba-kaparannuan lako kalemi belanna saki dio kaleku.

¹⁴Anna iatu kale susingku to, tu dadi peroso lako kalemi, tae’ ammi kagi’gi’i sia tae’ mikalinai, sangadinna mangkamo’ mitarima butung malaeka’Na Puang Matua, ontongpi Nabutung Yesu Kristus.

¹⁵Umbamira totemo tu kaussangammi kalemi to rongko’? Anna aku untonganni, kumua kenna susinna nala ma’din, inang la ussu’be’ikomi matammi ammi benna’.

¹⁶Mipoualimora’ka totemo, tu belanna umpokadana’ tonganna lako kalemi?

¹⁷Napengkullei tongan tau iato unnala penaammi, apa tae’ nalantuk, sangadinna la morai ussarakkikomi, kumua ammi birisan umpengkaolai.

¹⁸Melo duka, ke tontongi tu tau birisan umposara’ki’ diona melona, moi natae’ kudio ren misisolan.

¹⁹E kamu anakku, belanna kamu angku perasai pa’di’ butung to mangurria’, anna ma’rupa tu Kristus lan kalemi.

²⁰Iatu diongna penaangku kukua, kenta sitingayo bangsiamo totemo to, angku pasenga’ gamarangku, belanna pussakmo tu penaangku tu diona kamu.

²¹Pokadanna’, e kamu tu morainna mengkaola lako tuntunan Sukaran aluk, tae’raka mirangii tu Sukaran aluk?

²²Belanna den disura’ kumua iatu Abraham da’dua anakna, misa’ dio kaunan na misa’ dio to makaka.

²³Iatu anak diona kaunan dadi susi siamo a’gan tolino, apa iatu anak diona to makaka dadi bannang dio pangallu’.

²⁴Iatu iannato misa’ panganderan, belanna iatinde baine da’dua iamo da’dua basse: misa’ dao mai buntu Sinai, tu umpadadian bati’ kakaunanan, iamo Hagar.

²⁵Iatu Hagar iamo buntu Sinai dio tana Arab, tu dipasitinti te Yerusalem dennamo totemo, belanna iamo kaunan sola tu mai anakna.

²⁶Apa iatu Yerusalem dao, tae’ nakaunan, iamo indo’ta.

²⁷Belanna den disura’, nakua: Parannuko, e iko tu tamanangna sia tang kianakna, kumalasi-lasi sia sumapukoko, e iko tu tang untandainna kamapa’diran mangurria’. Belanna makianakammo tu to tae’ balinna anna to kemuane.

²⁸Iatu kamu e sangsiulurangku, anak pangallu’komi, susi Ishak.

²⁹Apa susi tonna attu iato napakario-rio to dikianakan a’gan tolino tu to dikianakan a’gan mempenaa, susi dukamoto te totemo.

³⁰Apa umbara nakua tu dipokadanna lan Sura’ Madatu? Rambai lao tu kaunan sola anakna, belanna iatu anakna tinde baine kaunan tae’ nala ma’mana’ sola anakna tinde baine to makaka.

³¹Iamoto e kamu sangsiulurangku, kita te tangiaki’ bati’na tu baine kaunan, sangadinna bati’naki’ tu baine to makaka.