Read Toraja-Sa'dan GALATIA 5 Bible Online

GALATIA 5 - Toraja-Sa'dan bible

GALATIA 5

¹Mangkamoki’ Natalla’i Kristus kumua anta to makaka tongan; iamoto tumanankomi, da ammi dipapassanni pole’ ayoka kakaunanan.

²Kilalai tonganni, akumo Paulus te ma’kada lako kalemi, kumua iake umpogau’komi sunna’, tae’mo gai’na lako kalemi tu Kristus.

³Sia kupamaleso pole’ lako tu to umpogau’ sunna’, kumua pato’ ungkaritutui tu mintu’ tuntunan Sukaran aluk.

⁴Ka’tumo ulangmi dio mai Kristus tu kamunna la morainna nabilang malolo Sukaran aluk; salianmokomi dio mai pa’kamaseanNa Puang Matua.

⁵Belanna tete dio Penaa anta poparandangan kapatonganan untayan kamaloloan tu tarannuananna.

⁶Belanna iake sirapumoki’ Kristus Yesu, la umpogau’ ba’tu tang umpogau’ sunna’, tae’ kuasanna, sangadinna kapatonganan tu napakedo pa’kaboro’.

⁷Dolona melomo pa’dondomi; mindamora unnampangikomi miurunganni tang mengkaola lako kamanapparan?

⁸Iate pa’naran iate tae’ nalu dio mai Puang tu mangka untambaikomi.

⁹Iatu ragi sisidi’, umpamessu’ ta’pung sanglemun.

¹⁰Iate aku te kukatappa’ikomi tete dio Puang, kumua tae’ apa senga’ mitangnga’; apa iatu tau, la minda-minda, tu umpasikaputtak penaammi, la untanggung ukunganna.

¹¹E kamu sangsiulurangku, iate aku te, ke umpa’peissanampa’ tu diona sunna’, ma’apai angku dipakario-rio siapa? Iake susito, iatu kayu pea’ta’ tae’mo anna mendadi katitumbuan.

¹²Kenna umbalianniora kalena tu mintu’ to umpatilalak penaammi.

¹³Belanna kamu te, e sangsiulurangku, mangkamokomi ditambai la dipopentorro to makaka, apa iatu katorro-tomakakan iato da mipannii pa’posanganna pa’poraian kale, sangadinna pantan sikaritutuangkomi tete dio pa’kaboro’.

¹⁴Belanna iatu mintu’ Sukaran aluk dipongo’mo lan sangbuku kada, tu nakua: La mukamasei tu padammu to lino, susi batang kalemu.

¹⁵Apa iake sikeke’ lenkomi ba’tu siampello’ lenkomi, pengkilalai da napada kamu simangsanan.

¹⁶Apa inde sia tu kadangku: La Narendenkomi Penaa lan torro ke’de’mi, manassa tae’ mitarru’i tu pa’poraian pa’kalean.

¹⁷Belanna iatu pa’poraian pa’kalean sisala Penaa, sia iatu pa’poraian Penaa sisala pa’poraian pa’kalean, apa siuali sola duai, dikua da mipogau’i tu apa mikamorainna.

¹⁸Apa iake Narendenkomi Penaa, manassa tae’ naongannikomi Sukaran aluk.

¹⁹Iatu mintu’ penggauran kamoraian pa’kalean payan bang, iamotu: gau’ sala, kamaruttakan, passulo bongi,

²⁰kamenomban lako deata, pa’pangissanan, kasisallangan, kasigagan, kapangimburuan, kamare’dekan, tuo misa, kasisalan, mangulang leko’,

²¹kamagallian, kamalangoan, ma’dadu tambuk sia susinnato. Iatu mintu’nato kupokada dolomo lako kalemi, susitu mangka kupokadangkomi pirambongi’, kumua iatu to umpogau’i tu mintu’na apa susito, tae’ nala umpomana’ ParentaNa Puang Matua.

²²Apa iatu mai buanNa Penaa, iamotu pa’kaboro’, kaparannuan, kamarampasan, pesuka’ kalando, kamasokanan, kameloan, kamarurusan,

²³sorong inaa, untaloi kale. Tae’ ia sukaran aluk umpasalai tu susinna to.

²⁴Apa iatu mintu’ taunNa Kristus Yesu mangkamo naa’ta’ tu pa’kalean sola kamoraianna sia kamailuanna.

²⁵Iake tuo bannang dioki’ Penaa, melo ke tasorong dukai tu kaleta Narenden Penaa.

²⁶Da anta tuntun kamapangkaran tang kebattuan, anna pada kitamo sipakarede-rede, sia sikabillan.