Read Toraja-Sa'dan GALATIA 6 Bible Online

GALATIA 6 - Toraja-Sa'dan bible

GALATIA 6

¹E kamu sangsiulurangku, iake denni misa’ tau diappa’ umpogau’ kasalan, kamu tu Natorroinna Penaa la umpemeloi tau iato situru’ sorong inaa, ammi kanandai kalemi, da anna kamu duka narampoi peroso.

²Situndu-tunduangkomi umpassan pamaammi, susimoto la minii ungganna’i tu atoranNa Kristus.

³Belanna iake den tau ussanga kalena den patunna, anna inang tae’ patunna, ia kalena umpakena kalena.

⁴Apa pantan la ussudi penggauranna tu tau, namane ma’din ussattuanni tu diona kalena, tangia diona to senga’.

⁵Belanna pantan la umpassan misa pamaanna tu tau.

⁶Sipatu tu to diada’i kadanNa Puang umbenni kataananna tu to mangada’i.

⁷Da mipusa: tae’ nabelai dibelle’i tu Puang Matua, belanna apa tu natanan tau, ia duka napeburai.

⁸Belanna minda-minda tu mantanan lan pa’kalean, dio duka mai pa’kalean la nanii umpeburai kasanggangan; apa minda-minda tu mantanan lan Penaa, dio duka mai Penaa la nanii umpeburai katuoan sae lakona.

⁹Da tamasorro umpogau’ melo, belanna la tapeburai duka ke attunna ke tae’i tamalilu.

¹⁰Iamoto su’ding denpi palambi’ta, la umpogau’ki’ melo lako mintu’ tau, ontongpi lako mintu’ siulu’ padanta to ma’patongan.

¹¹Tiromi tumba kapuana tu pangoki’, tu limangku kalena unnokirangkomi mati’.

¹²Sangapa budanna tu tau la morai umpa’petiroan kameloanna lan a’gan mentolinona, tu umparukukomi umpogau’ sunna’, nakua bangri da nadipakario-rio diona kayu pea’ta’Na Kristus (Yesu).

¹³Belanna ia kalena to umpogau’ sunna’, anna tae’ natoei tu tuntunan Sukaran aluk, sangadinna iari naporai ke umpogau’komi sunna’, kumua anna ma’din massattuan diona batang kalemi.

¹⁴Apa dennoupa’ da’ angku massattuan, sangadinna ke diona kayu pea’ta’Na Puangta Yesu Kristus, ia dukamo bannangnato, anna iate lino tia’ta’mo, namateammo kaleku sia susi duka kaleku to lako te lino.

¹⁵Belanna la disunna’ ba’tu tang disunna’, tae’ patunna, sangadinna iari ke dadimi panampa ba’ru.

¹⁶Narampoimira kamarampasan sia kamamasean tu mintu’ to situru’ atoran iate tu gau’na sia lako IsraelNa Puang Matua.

¹⁷Randuk te attu iate da naden tau misa’ ussussaina’, belanna dio kaleku den simembua-buanna bangkeNa Yesu.

¹⁸Narondongmira kamaturu-turuanNa Puangta Yesu Kristus tu penaammi, e, kamu sangsiulurangku. Amin.