Read Toraja-Sa'dan EFESUS 4 Bible Online

EFESUS 4 - Toraja-Sa'dan bible

EFESUS 4

¹Iamo bannangnato, anna aku te to dirante bassi belanna Puang malaku lako kalemi, kumua ammi pasitende’i gau’mi tu petamba ditambangkomi.

²Naturu’ mintu’ penaa mengkadiongan sia sorong inaa sia pesuka’ kalando, sipama’tanan penaa situru’ pa’kaboro’.

³Ammi pengkullei ungkaritutui kasisanginaan tete dio Penaa ussiulangi kamarampasan;

⁴misa’ri batang kale sia misa’ri Penaa, susi tommi mangka ditambai misa’ dukari kapa’rannuanan napabu’tu kadi- tambaiammi;

⁵misa’ Puang, misa’ kapatonganan, misa’ pa’dioran,

⁶misa’ Kapenomban tu napoAmbe’ sola nasang, Ia untongloi nasangi sia Ia napotete sola nasangi sia Nanii nasang lan.

⁷Apa iatu kita mintu’ mangkamoki’ pantan diserongi pa’kamasean, sitinaya sukaran pamenganNa Kristus.

⁸Iamoto anna kua lan Sura’ Madatu: Iatonna kendek langngan Narampa sia Nakaloli’ tu mai to dirampa, sia mangkamo umpa’kamasean ba’tu pira-pira pamengan lako tolino.

⁹Apa iatu dipokada kumua: Kendekmo langngan, tangiaraka battuananna tu kumua, dolona mangkamo mengkalao rokko inan madiongan lan te lino?

¹⁰Dadi Ia tu mangka mengkalao, Ia duka mangka kendek langngan madaoanna liu na iatu mintu’ langi’, kumua anna pasundunni tu mintu’ angge maritik.

¹¹Ia dukamo mangka unnalai rasulu’ tu mai tau pira, nabi pira, to umpalolang Kareba-kaparannuan pira, pangkambi’ pira sia guru,

¹²la umpasakka’i tu mai to masallo’, la umpogau’ pentoean ma’kamayai, la umpatulangdan batang kaleNa Kristus,

¹³taurunganni sola nasang landa’ lako kasisanginaan lan kapatonganan sia kapaissanan diona AnakNa Puang Matua sia lako kamatakkoan sae lako ma’angge kaloboranna kasundunanNa Kristus,

¹⁴kumua damo anta mapia-pia tikalulun-lulun susi bombang sia nairi’ lu lako lu dio mai ma’rupa-rupa angin pangadaran, diona pakenanna tau sia pakira-kiranna, tu mebanna lako tangnga’ mepapusa,

¹⁵sangadinna la umpentoeiki’ kamanapparan lan pa’kaboro’ anta salobo’-lobo’na lan mintu’na lako tu To tapoulu, iamotu Kristus.

¹⁶Tete diomora Kristus anna salobo’-lobo’na tu kale, umpamatoto’ kalena lan pa’kaboro’ anna sitoe-toe sia sikande-kande napasikande mintu’ lesoan situru’ patu pengkaranganna lesoan kale.

¹⁷Inde sia tu kadangku sia kukatottongi lan Puang, kumua da’mo nasusi gau’na to kapere’ tu gau’mi, unturu’i tu tangnga’ tae’na gai’na,

¹⁸tu dipamalillinmo tangnga’na sia nasarakkimo kabagan lan kalena dio mai katuoan lu dio mai Puang Matua, belanna kamakarrasanna penaanna.

¹⁹Na belanna tae’mo siri’na, naeloranni tu kalena lako kapassulo-bongian, sia kabarakanna anna pogau’i tu mintu’ gau’ maruttak.

²⁰Apa tae’ ia nasusi mipelada’i to tu diona Kristus.

²¹Iake inang mirangimi sia Naada’imokomi lan kasiturusanNa tumbai tu kamanapparan lan Yesu,

²²iamotu diona gau’ dolomi, la mitibe tu pa’kalean masaimmi, tu sanggang napobua’ kamoraian lu dio mai tangnga’ sala,

²³anna diba’rui tu penaammi lan batu ba’tengmi,

²⁴ammi angkaran kedo ba’ru, tu dipadadi situru’ pa’poraianNa Puang Matua lan kamaloloan sia kamaseroan tongan.

²⁵Iamoto la mitibe tu kamo’rangan, ammi pantan ma’kada tongan lako padammi tolino, belanna sipolesoan kaleki’.

²⁶Iake sengkekomi, da anna pabu’tu kasalan; da ammi nanna kasengkeammi sae lako lambunna allo.

²⁷Da milo’banganni inan tu deata bulituk.

²⁸Iatu to bokoan, da’mo naboko, sangadinna melo ke masara’i umpatangmari’pi limanna ungkarangi tu pengkarangan tang dipa’gagainna, anna den apa nabenni tu to tae’.

²⁹Da mipasunni dio pudukmi tu kada dipomasiri’, sangadinna iari tu melona tu la napomatoto’na kapatonganan, tu denna patunna, anna pasaeanni pa’kamasean tu to urrangii.

³⁰Sia da mipamasussai tu Penaa Masallo’Na Puang Matua, tu dinii mangka untodingkomi landa’ lako allo kadila’bakan.

³¹Toyanganni dio mai kalemi tu mintu’ kamapallan, sia kamasakiarasan sia kasengkean sia salle kada sia kapa’palelebekoan sisola mintu’ kakadakean.

³²Sangadinna pantan sikasokanangkomi sia siala mase, sia sipagarri’komi, susi Puang Matua umpa’dei tu kasalammi tete dio Kristus.