Read Toraja-Sa'dan EFESUS 5 Bible Online

EFESUS 5 - Toraja-Sa'dan bible

EFESUS 5

¹Iamoto, la dadikomi to unturu’ Puang Matua, susi anak Nakaboro’i,

²sia lolangkomi umpa’pekitanan pa’kaboro’ susi Kristus mangka ungkamaseikomi, sia mangka ussorong Kalena belanna kita, mendadi pemala’ sia pesuru’, tu busarungngu’ lako Puang Matua.

³Apa iatu gau’ sala sia mintu’ penggauran maruttak ba’tu kabasisi-inaan, da naden len disa’bu’ kumua denkomi umpogau’i, susi tu gau’ sipato’na to masallo’.

⁴Susi dukato tu apa pagi’giran sia ulelean tang kebattuan sia rongga, iamotu apa tang sielle’na, sangadinna la’bi’ ma’kurre sumanga’.

⁵Belanna iate pengkilalai tonganni, kumua tae’ ia tu to ma’pangngan buni ba’tu to maruttak ba’tu to basisi inaa — tu samanna to umpenombai deata — umpotaa mana’ lan ParentaNa Kristus sia Puang Matua.

⁶Da naden misa’ tau umpapusakomi napokadan kada tang kebattuan; belanna iamora napobannang to anna rampoi kasengkeanNa Puang Matua tu mai to battuk.

⁷Iamoto da misamaturu’ tu tau iato.

⁸Belanna dolona kalillinangkomi, apa totemo masiangmokomi lan kasiturusanNa Puang. Lolang susikomi to mangkamo dipemasiangi,

⁹— belanna iatu bua kamasiangan iamotu kameloan, kamaloloan sia kamanapparan — ,

¹⁰sia sudii tu apa Naporainna Puang.

¹¹Sia da mitamai tu mai gau’ kamalillinan, tu tang umpabu’tu melo, sangadinna sipatu la mipasala,

¹²belanna iatu mintu’ apa napogau’ buni, moi disa’bu’ manna mesirisan duka.

¹³Belanna iatu mintu’ dipasalana, napasombo masiangna. Apa iatu dipasombona, inang masiang ia.

¹⁴Iamoto anna den tu kada nakua: Millikko, e iko tu mamma’na, sia malimbangunko dio mai to’ to mate, anna Kristus unnarrangko.

¹⁵Iamoto kainga’i meloi, umba la mipakuanni tu kalemi, da misusi to tang keinaa, sangadinna la susikomi to keinaa;

¹⁶da mimatei punala allo, belanna attu iate, attu kadake.

¹⁷Iamoto, da mibaga, sangadinna la miissan umba tu pa’poraianNa Puang.

¹⁸Da mima’pelango anggoro’ tu umpabu’tu tang penggauran, sangadinna la Naponnoikomi Penaa,

¹⁹ammi sipa’kada-kada naturu’ pa’pudian sia pa’tendeng sia penanian masallo’ ammi penanianni sia umpudi-pudi Puang lan penaammi;

²⁰sia tontongkomi ma’kurre sumanga’ diona mintu’ passalan langngan Ambe’ta Puang Matua, ussa’bu’ sanganNa Puangta Yesu Kristus,

²¹ammi sisonda tunduk ungkasiri’ Kristus.

²²E kamu mintu’ baine, la tundukkomi lako muanemi susi lako Puang,

²³belanna muane ungkapalai baine, susi Kristus ungkapalai kombongan, Ia dukamo ungkarimmanni batang kaleNa.

²⁴Iamoto, umba nakua tu kombongan tunduk lako Kristus, susi dukamoto tu mintu’ baine tunduk lako muanena lan mintu’na.

²⁵E mintu’ muane, pakaboro’i tu bainemi, susi Kristus ungkamasei kombonganNa, sia ussorong Kalena belanna kombongan,

²⁶kumua anNa pemaseroi tonna mangka umbasei pa’dioran uai tete dio kadanna Puang Matua,

²⁷sia kumua anna Ia kalena umpabendanni tu kombongan dio oloNa sikambi’ kamala’biran tang den kadakena ba’tu tingkurrungna ba’tu senga’na, sangadinna masero tae’ sayuanna.

²⁸Ten dukamoto tu mintu’ muane sipato’ umpakaboro’ bainena, susi ia umpakaboro’ batang kalena. Iatu to umpakaboro’ bainena, iamo umpakaboro’ kalena.

²⁹Belanna tae’ bangpa ia tau misa’ ungkabiri’ batang kalena, sangadinna nadaranai sia nakaritutui susi Kristus anna kombongan;

³⁰belanna kita te lesoan kaleki’ lan batang kaleNa.

³¹Iamoto anna la untampe indo’ ambe’na tu tau, anna la’ka’ lako bainena, anna dadi sangbatang kale sola duai.

³²Kapua te rasia iate, apa kuala sangka’ri inde te tu diona Kristus anna kombongan.

³³Anna moi susito, sipatu tongankomi pantan la umpakaboro’ bainemi susi kamu umpakaboro’ kalemi; sia iatu baine la ungkasiri’ muanena.