Read Toraja-Sa'dan EFESUS 6 Bible Online

EFESUS 6 - Toraja-Sa'dan bible

EFESUS 6

¹E kamu mintu’ pia, turu’i tu kadanna indo’ ambe’mi tete dio Puang, belanna inang iamo sipato’na to.

²Kasiri’i tu ambe’mu sola indo’mu — iamoto tu parenta bunga’na nanii pangallu’, —

³ammu rongko’ sia malambe’ sunga’ lan te lino.

⁴E mintu’ ambe’, da mipamasaki ara’ anakmi, sangadinna ada’i situru’ peada’ sia pa’pakilala lu dio mai Puang Matua.

⁵E mintu’ kaunan, mataku’ sia ma’parondokomi unturu’ parentana puangmi diona lino, anna malambu’ penaammi susi lako Kristus,

⁶da ammi susito belo puduk, butung to ussede tau, sangadinna susikomi taunNa Kristus masorok penaanna umpogau’ pa’poraianNa Puang Matua,

⁷sia matinuru’ mengkarang susi lako Puang, tangia lako tolino,

⁸belanna miissan, kumua kameloan apa tu napogau’ tau, ia duka natarima sule dio mai Puang, la kaunan, la to makaka.

⁹E kamu mintu’ puangna, susi duka la mipogau’ lako kaunanmi to, sia torroi tu pa’pakingki-kingkimmi, belanna miissan kumua iatu Puangna sia Puangmi dao sia suruga sia tae’ Ia Namentiro lindo lako tau.

¹⁰Nama’katampakanna la bintinkomi lan Puang sia umpomatoto’ kamatotoran kuasanNa.

¹¹Pakei tu pa’buno sanda pareaNa Puang Matua, ammi batta’ untanananni tu petua’ ba’tangna deata bulituk.

¹²Belanna tangia padanta ma’rupa tau tasiean, sangadinna mintu’ to ma’parenta sia to paa sia pangulunna lino tu umparenta kamalillinan iate sia mintu’ kuasa deata masussuk dao langi’.

¹³Iamoto, toei tu pa’buno sanda pareaNa Puang Matua, ammi batta’ tumanan, ke allo kadakei sia bantang bendan, ke mangkakomi umpogau’i tu mintu’na.

¹⁴Iamoto la bendankomi umpotambeke’ kamanapparan sia umpokararran kamaloloan,

¹⁵sia iatu lentekmi umpolapik kamatinurusan umpatale’ Kareba-kaparannuan kamarampasan,

¹⁶sia tontong umpobalulang kapatonganan, iamo la mipa’deanni tu tinaran apinna deata bulituk.

¹⁷Sia tarimai tu songko’ bassi kamakarimmanan sia pa’dang Penaa, iamotu kadanNa Puang Matua.

¹⁸Tontongkomi massambayang lan mintu’ attu tete dio Penaa, umpotete mintu’ pangando sia passambayang, sia dikua ammi lambi’i tu iannato, la marea-reakomi umpengkullei sia umpassambayangan mintu’ to masallo’,

¹⁹sia aku duka, dikua angku ditadoi kada to ke tiku’bi’i pudukku, la umpa’peissanan rasianna Kareba-kaparannuan situru’ kabaranian pena- angku.

²⁰Belanna iamora tu Kareba-kaparannuan angku dadi to pasumbungan puduk tu dirante bassi, angku barani ma’kada-kada umpa’peissananni, susitu inang pato’na la kupokada.

²¹Apa dikua anna kamu duka te unnissanni tu diona aku sia tumbai torro ke’de’ku, anna siulu’tamora Tikhikus tu dipakaboro’, iamo misa’ to ma’kamaya maruru’ lako Puang, la umpokadan nasangkomi.

²²Iannamora to angku suai mati’ dikua ammi issanni tu torro ke’de’ki sia dikua la umpakatanai tu penaammi.

²³Narampoimira kamarampasan tu sangsiuluranta sia pa’kaboro’ sisola kapatonganan lu dio mai Puang Matua, Ambe’, sia Puang Yesu Kristus.

²⁴Narondongmira pa’kamaseanNa Puang Matua tu mintu’ to umpakaboro’i pa’kaboro’ tang sitiro kasanggangan tu Puangta Yesu Kristus.