Read Toraja-Sa'dan FILIPI 1 Bible Online

FILIPI 1 - Toraja-Sa'dan bible

FILIPI 1

¹Iate sura’ lu dio mai Paulus na Timotius, taunNa Kristus Yesu diparampo lako mintu’ to masallo’ lan Kristus Yesu dio Filipi sia mintu’ to ma’panundu’ sia pa’kamaya.

²Narampoimorokomi kamaturu-turuan sia kamarampasan dio mai Puang Matua, Ambe’ta sia dio mai Puang Yesu Kristus.

³Tilanta’okomi lan penaangku ma’kurre sumanga’ona’ langngan Kapenom- bangku.

⁴Tontongna’ parannu lan mintu’ passambayangku umpangandoangkomi.

⁵Tu belanna kasisanginaammi lan kadipalolanganna Kareba-kaparannuan tempon dio mai allo diparandukna sae lako te totemo.

⁶Kukatappa’i te iannate, kumua Puang Matua tu mangka umparanduk misa’ pengkarangan melo dio kalemi, Ia duka la umpasundunni sae lako alloNa Yesu Kristus.

⁷Inang sipato’na’ la ma’timbang susito tu diona kamu sola nasang, belanna kupalan ara’komi, pa kamu sola nasang pada-padaki’ unnappa’ pa’kamasean, la iatongku dirante bassi, la iatongku umpebalian sia umpamanassai tu Kareba-kaparannuan.

⁸Belanna Puang Matua ussa’biina’ kumua tumba mamali’na penaangku lako kamu sola nasang diona kamamaseanNa Kristus Yesu.

⁹Na inde sia tu kupalaku, dikua anna sakerangngan-rangnganna tu pa’kaboro’mi diona kapatandaian sia mintu’ kapaissanan.

¹⁰Miurunganni paissan ussudii umbanna tu ma’iringanna, ammi masero sia tae’ mima’pamatana’ landa’ lako alloNa Kristus.

¹¹Sia naponnoikomi bua kamalamburan tete dio Yesu Kristus, umpabu’tuan kamala’biran sia kadipudian Puang Matua.

¹²E sangsiulurangku, kuporai ke miissanni, kumua mintu’na tu apa urrampoina’ mandu umpakalua’ kalolanganna Kareba-kaparannuan,

¹³naurunganni iatu kadiranteangku nakanassai mintu’ surodadu pa’kampa tongkonan layuk sia to senga’, kumua Kristus napobannang.

¹⁴Sia buda tu mai sangsiuluranta umporannuomo Puang diona tu kaditarungkuangku, anna sabatta’-batta’na tang mataku’ umpokadai tu kadanNa Puang.

¹⁵Tonganna den siao pira tu to umpa’peissanan Kristus belanna kamagallian sia kasisalan, den pira belanna kamasorokan.

¹⁶Tau iato umpa’peissanan Kareba-kaparannuan belanna pa’kaboro’, apa naissan kumua aku dipamanassa la umpebalianni tu Kareba-kaparannuan;

¹⁷apa iatu senga’na umpa’peissanan Kristus belanna katuo-misan, tangia belanna kamalamburan, sangadinna nasanga, to kumua la nanii umpakati’tinna’ diona kaditarungkuangku.

¹⁸Elo’na iato. Moi umba nakua tu gau’, la diangga’-angga’ina, la dipatonganna, inang dipa’peissananna duka ia tu Kristus; iamo kupoparannu tu iannato; ontongpi tontongna’ la parannu.

¹⁹Belanna kuissan, kumua iatu iannato la napalulakona’ kamakarimmanan tete di passambayangmi sia pa’tunduanNa PenaanNa Yesu Kristus,

²⁰susitu kupiang-piangna sia kurannuanna, kumua tae’ kula kasirisan lan misa’ duka apa, sangadinna la batta’ tonganna’, susitu biasanna, susi dukato tu totemona, la dipakala’bi’ tu Kristus lan kaleku, la tuoku la mateku.

²¹Belanna iatu tuoku lu lako nasang Kristus, na kamatean tu kamauparangku.

²²Apa iake tuona’ lan te kale iate, den bua’na lako pengkarangangku, tae’mo kuissanni, umbanna tu la kupilei;

²³nasisukunnina’ te da’dua: mamali’ penaangku la male angku torro sisola Kristus, belanna iamo ma’iringanna melona to;

²⁴apa iake mari’pina’ lan te kale iate, la’bi kebattuan belanna kamu.

²⁵Na kamatapparan iamora te, kuissanni kumua la torrona’ sia la tontongna’ ussisolangkomi sola nasang, ammi sakerangngan-rangnganna sia parannu diona kapatonganan,

²⁶anna sakerangngan-rangnganna tu kamisattuanangku tete dio Kristus, tu belanna kasaeangku.

²⁷Samamira kumua iato katuoammi la sitondon Kareba-kaparannuanNa Kristus, dikua la iake saena’ untirokomi, la iake pa’dena’, anna rampo tama talingangku, kumua tontongkomi misa’ penaa sia sanginaa sibalian umpangeai kapatonganan diona Kareba-kaparannuan.

²⁸Da naden misa’ apa nanii umpaselangkomi to unneakomi, tu manassa lako kalena mendadi tanda kasanggangan, apa lako kamu tanda kamakarimmanan, tu lu dio mai Puang Matua.

²⁹Belanna mangkamo dipa’kamasean lako kalemi bannang dio Kristus, tangia kumua mipatongan mannai, sangadinna kumua miperasai dukai tu kamaparrisan diona Ia,

³⁰sanggundangan lan kadipakario-rioan tu mangka mitiro diona aku sia tu miranginna totemo diopa kaleku.