Read Toraja-Sa'dan KOLOSE 2 Bible Online

KOLOSE 2 - Toraja-Sa'dan bible

KOLOSE 2

¹Kuporai ke miissanni kumua lendu’ mengkulleku belanna kamu sia belanna iatu to dio Laodikia sia mintu’ tu to tang untiropa lindoku diona te a’gan kale, —

²dikua anna dipakatana penaanna sia dipasikala’ lan pa’kaboro’, napoulangi ullambi’ kasugiran kapaissanan matarru’, tu ungkanassai sia untandai tonganni, naurunganni untandai tu apa tang paanNa Puang Matua, iamotu Kristus.

³Indemoto nanii karerungan tu mintu’ kakinaan sia kapaissanan butung ianan ballo, mentirerung.

⁴Ia sia kupokadai te, dikua da naden misa’ tau umpakenakomi kada pelono’.

⁵Belanna tonganna tae’ nadio ren tu kaleku, apa iatu penaangku urrondongkomi situru’ kaparannuan, belanna untiro atorammi sia kabantanganna kapatonganammi lako Kristus.

⁶Tu belanna mitarimamo tu Kristus Yesu, tu Puang, lolangmokomi lan kasiturusanNa,

⁷mennuaka’komi sia bantangkomi lan Kalena sia batta’komi lan kapatonganan, susitu mangka diadarangkomi, ammi pabuda pa’kurre sumanga’.

⁸Pengkilalai tonganni da naden misa’ tau umpaalaikomi kapaissananna to paminnakan sia pangadaran ma’papusa tang kebattuan, situru’ panganna to dolo sia aluk lino dolo, tu tang unturu’ Kristus;

⁹belanna lan Kristus Nanii membanua sia merrupa kagannaranNa batangNa Puang Matua,

¹⁰sia kamu duka dipasundun tete dio Kalena, tu to napopangulu mintu’ to ma’parenta sia to paa.

¹¹Tete dio duka anna dipogau’ lako kalemi tu sunna’ tang naola lima, diona kauntampeanna pa’kalean kasalan, iamotu sunna’Na Kristus.

¹²Anna lan pa’dioran dinii umpasilamunkomi, sia lan duka pa’dioran iato dinii umpamalimbangunkomi sola, belanna diona umpatongan kuasanNa Puang Matua tu umpamalimbangunNi dio mai to’ to mate.

¹³Sia kamu tu mate tete dio kasalan sia tang dipogau’ sunna’ lako kalemi, mangka dukakomi dipatuo sola, tonna pa’deimi tu mintu’ kasalanta,

¹⁴sia tonna butaimi tu sura’ indan sola mintu’ atoranna, tu unno’tonniki’ sia unneaki’; anNa alai dio mai kaleta, Napakui lako kayu pea’ta’.

¹⁵Iatonna mangka ungkalosso’i tu mai to ma’parenta sia to paa, Napalaomi siri’na, anNa pakitanni tu kapataloanNa dio kayu pea’ta’.

¹⁶Iamoto da naden misa’ tau umpasalakomi tu diona kande ba’tu diiru’na ba’tu lan attu dipakaraya ba’tu bulan ba’ru ba’tu allo katorroan,

¹⁷belanna mintu’nato bayo-bayona bangri tu mintu’na apa la sae, apa iatu batangna iamotu Kristus.

¹⁸Da’ naden misa’ tau umpasisayurangkomi tanda kabilangammi, tu to unna’ga madiongan kalena sia menomba lako malaeka’, anna pamatampo punala kalena tete dio tangnga’ pa’kaleanna,

¹⁹sia tae’ namanda’ mentoe lako tu Ulu, tu nanii batang kale napasanda sia napasikande mintu’ lesokan sia ura’, nasalobo’-lobo’na Napalobo’ Puang Matua.

²⁰Iake mangkamokomi mate sola Kristus tilendok dio mai aluk lino dolo, ma’apai ammi popa’taloan kalemi lako ma’rupa-rupa atoran butung to tuopokomi lan lino? iamotu nakua:

²¹Da mutoei, da mule’i, da mukaka’i!

²²Mintu’nato apa la pa’de diona kadipakeanna; sia mintu’ to unturu’ parenta sia pepasan tolino.

²³Mintu’na tu iannato, moi anna disanga kakinaan, belanna umpogau’ kamenomban pangala penaa kalena sia umpamadiongan penaa sia umpakario-rio kale, apa mintu’nato tae’ bua’na, dinii bangri umpaliu pa’poraian a’gan lino.