Read Toraja-Sa'dan KOLOSE 4 Bible Online

KOLOSE 4 - Toraja-Sa'dan bible

KOLOSE 4

¹E mintu’ puang, pogau’i tu tonganna sia malambu’na lako kaunammi, belanna miisan den duka misa’ Puangmi dao suruga.

²La tontongkomi lan kapassambayangan sia kanandai tu iannato mima’kurre sumanga’.

³Ammi passambayangan dukakan, anNa bungkarangkan lalan Puang Matua la umpalolang Kareba-kaparannuan, angki pokadai tu rasianNa Kristus, tu kupobannang te dirante bassi.

⁴Angku pasomboi tu iannato, susitu sipato’na la kupokada.

⁵Pa’pekitanangkomi kakinaammi lako to salian sia da’ mimatei tu attu melo.

⁶La mammi’ bang tu buangan kadammi butung to disiai, ammi issanni umba la mikua umpebalii simisa’-misa’i tu tau.

⁷Mintu’na tu torro ke’de’ku la napokadangkomi Tikhikus, tu siulu’ dipakaboro’, sia to ma’kamaya maruru’, sangayokaku lan pentoeanNa Puang.

⁸Tu kusua mati’ kalemi tu belanna iannate, ammi issanni tu diona kami, sia kumua anna pakatanai tu penaammi.

⁹Sola Onesimus, siulu’ maruru’ sia dipakaboro’, tu sangtondokmi. Iamo sola duai la umpokadangkomi tu apa dadi inde.

¹⁰Salama’na Aristarkhus mati’ kalemi, padangku ditarungku, sia dio mai Markus, sampunna Barnabas — dionamo tau iato tu mangka dipasanangkomi; ianna sae mati’ tarimai — ,

¹¹sia salama’na Yesu tu diganti Yustus. Ia manna te tau iate sola duai lan mai to umpogau’ sunna’, kusolan mengkarang lan parentaNa Puang Matua, anna tau iato umpakananna’na’.

¹²Salama’na Epafras mati’ kalemi, iamo misa’ sangtondokmi sia taunNa Kristus, tu tontong mengkulle umpassambayangangkomi, kumua ammi bantang sia matakko sia unnampui kamanassan lan mintu’ pa’poraianNa Puang Matua.

¹³Kukatottongi tu tau iato kumua lendu’ mara’ta’na belanna kamu sia belanna mintu’ to dio Laodikia sia diona Hierapolis.

¹⁴Salama’na Lukas mati’ kalemi, tu to ma’dampi dipakaboro’, sia salama’na duka Demas.

¹⁵Salama’ku lako sangsiuluranta dio Laodikia, anna lako Nimfa sia kombongan lan banuanna.

¹⁶Sia iammi mangka dibasan te sura’ iate, la dibasan duka kombongan dio Laodikia, sia basan dukai kombonganmi tu sura’ lu dio mai Laodikia.

¹⁷Sia pokadanni Arkhipus kumua: Pengkilalai tonganni tu pentoean mangka mutarima tete dio Puang, ammu karitutui.

¹⁸Anna salama’ku, Paulus, tu lalan limangku kalenamo te. Palan ara’i te rante bassingku. Narondongmorokomi pa’kamaseanNa Puang Matua.