Read Toraja-Sa'dan 1 TESALONIKA 2 Bible Online

1 TESALONIKA 2 - Toraja-Sa'dan bible

1 TESALONIKA 2

¹Belanna kamu kalena unnissanni, e sangsiulurangku, kumua iatu kasaeangki ussitiroangkomi tae’ra natang kebattuan.

²Tonganna kumua dolona umperasaikan kamaparrisan sia kadipakario-rioan dio Filipi, susitu miissanna, apa tete dio Kapenombanta angki barani duka umpa’peissananni tu Kareba-kaparannuanNa Puang Matua lako kalemi, moi anna lan peatang maparrang.

³Belanna iatu pa’pakilalangki tang lu dio mai kapusan, ba’tu dio mai penaa kelok, sia tae’ naturu’i pakira-kira.

⁴Sangadinna susitu NasanganNa Puang Matua kumua sipato’mokan dipakambi’i tu Kareba-kaparannuan, susi dukamoto kipa’peissanan, tangiara butung to la umpasende tolino, sangadinna Puang Matua, tu ussudi penaanta.

⁵Belanna tae’pa kibelai ullono’komi, moi kamu miissan duka; tae’ duka angki kalemu’i kabasisi-inaan, Puang Matua untiroi!

⁶Tae’ duka kidaka’ kadipangkeran dio mai tolino, la dio mai kamu, la dio mai to senga’;

⁷moi anna den kuasangki untuntun kadipangkeran, belanna rasulu’Nakan Kristus, apa masokankan misisolan butung indo’ undaranai anakna.

⁸Na susito, tu belanna lendu’ kikamaseimmi, anna tangia manna Kareba-kaparannuanNa Puang Matua kibenkomi, sangadinna kaleki duka tu belanna lendu’ kipakaboro’mi.

⁹Tu belanna mikilalai, e sangsiulurangki, tu kamara’tasangki sia kabo’yorangki, tu keallo kebongi mengkarangkan, kumua anna da miden misa’ duka kipamatana’, anna mangkamo kipa’peissanan lako kalemi tu Kareba-kaparannuanNa Puang Matua.

¹⁰Kamu ungkanassai sia Puang Matua duka, tumba masallo’na sia malambu’na sia tang sayuanna tu gau’ki lako kamu ma’patonganna.

¹¹Susitu miissan, umba kikua umpakilala simisa’komi, butung misa’ ambe’ lako anakna;

¹²angki pabatta’i tu penaammi sia kipasan-pasan, miangkaran gau’ sipatu pa’poraianNa Puang Matua, tu mangka untambaikomi tama ParentaNa sia kamala’biranNa.

¹³Iamo bannangnato anna tae’ duka ka’tungki ma’kurre sumanga’ langngan Puang Matua, belanna iatommi tarimami tu kadanNa Puang Matua, tu kipalolang, tae’ mitarima susii kada tolino, sangadinna susitu tonganna inang den, iamotu kadanNa Puang Matua, tu mengkarang duka lan kalemi, tu kamu ma’patonganna.

¹⁴Belanna, e kamu sangsiulurangku, unnolamokomi bate lalanna mintu’ kombonganNa Puang Matua dio tana Yudea, tu lannamo Kristus. Belanna pada umperasai dukamokomi kamaparrisan dio mai bangsami, susitu mangka naperasai dio mai to Yahudi,

¹⁵tu mangka umpatei Puang Yesu sia ba’tu pira-pira duka nabi, sia mangka ullolaikanni sun. Tau iato tang Naporai Puang Matua sia unnea mintu’ tolino,

¹⁶sia nagagaikan ma’kada lako tu mai to kapere’, dikua anna kabu’tui kamakarimmanan; iatu iannato nanii to Yahudi nenne’ untompei kasalanna; apa narampoimo kasengkeanNa Puang Matua landa’ lako ma’katampakanna.

¹⁷Apa kami te, e sangsiulurangku, tu belanna sangattu’ki’ te sisarak, ta’de dio pentiro, apa tang pa’de diong penaa, ondong pissanmi kipengkulleinna sia lendu’ mamali’ki la ussitiroangkomi.

¹⁸Iamoto anna sae diong penaangki la male mati’, iamote aku Paulus pissan penduampa, apa naampangikan deata bulituk.

¹⁹Belanna mindara tu kiporannu ba’tu kiposende ba’tu kipomakota passattuan? Tang kamu dukaraka dio oloNa Puangta Yesu ke attu kasaeanNai?

²⁰Tonganna inang kamumo tu kamala’biranki sia kasendeanki.