Read Toraja-Sa'dan 1 TESALONIKA 5 Bible Online

1 TESALONIKA 5 - Toraja-Sa'dan bible

1 TESALONIKA 5

¹Apa diona mintu’ attu sia allona, e sangsiulurangku, tae’mo mimanggi’ disurasan.

²Belanna inang miissan melomo, kumua iatu alloNa Puang la susito boko sae ke mabongii.

³Ianna kua tau: Marampa’ sia salama’, pakalan to ke saemi kasanggangan urrampoi, susito baine ma’tambuk mangurria’; anna tae’ nabelai la urrampanan kalena.

⁴Apa iatu kamu, e sangsiulurangku, tae’ ammi lan kamalillinan, sae lako narampoimmi tu allo iato susi misa’ to boko.

⁵Belanna kamu te sola nasang anak kamaseroangkomi sia kamasiangan, tae’ naalaki’ bilangan lako bongi ba’tu malillinna.

⁶Iamoto dadi da tamamma’ susitu mai to senga’, sangadinna la mareaki’ sia mangingaran.

⁷Belanna iatu to mamma’, bonginna nanii mamma’, sia iatu to tarru’ pangiru’, bonginna duka nanii malango.

⁸Apa iate kita to naala bilangan lako masiangna, melo ke mangingarangki’ sia umpokararran kapatonganan sia pa’kaboro’ sia umposongko’ bassi kapa’rannuanan lako kamakarimmanan.

⁹Belanna tae’ Nalampakki’ Puang Matua la narampoi kasengkean, sangadinna la ungkabu’tui kamakarimmanan tete dio Puangta Yesu Kristus.

¹⁰Tu mangka mate belanna kita, naurunganni la pasa’dingki’, la mamma’ki’, la tontongki’ tuo sisola.

¹¹Iamoto dadi sipakilalakomi sia sipabatta’komi lan kapatonganammi, susitu mipogau’na siamo.

¹²E sangsiulurangku, kipalaku ammi bilangi tu mai to umposara’komi, sia umpanguluikomi tete dio Puang sia umpakilalakomi,

¹³sia kasiri’ tongan-tonganni sitondon pa’kaboro’ tu belanna pengkaranganna. La sikarampasangkomi.

¹⁴E sangsiulurangku, kipalaku ammi pakilalai tu mai to tang unturu’ parenta, pabatta’i tu mai to ranggang penaanna, tundui tu mai to malamma’, pama’tananni penaa tu mintu’ tau.

¹⁵Pengkilalai tonganni, da naden misa’ duka tau umpasipakkanan kakadakean, sangadinna tontongkomi sipaularan kameloan sia unnula’ melo, lako mintu’ tau.

¹⁶La tontong bang parannu penaammi;

¹⁷sia tang tore massambayang;

¹⁸sia ma’kurre’ sumanga’ diona mintu’na, belanna iamoto tu pa’poraianNa Puang Matua lako kalemi tete dio Kristus Yesu;

¹⁹Da ammi pa’dei tu Penaa;

²⁰sia da mitunai tu pa’nubua’.

²¹Sangadinna sudi tu mintu’na, na iatu melona la mitoe.

²²Toyangangkomi kalemi dio mai mintu’ sanda kadake.

²³Anna Puang Matuamora tu oto’na kamarampasan, umpamasero tangkarauangkomi; anna makalima’na penaammi sia deatammi sia batang kalemi la makarimman, naurunganni tae’ attanganna ke attu kasaeannami Puangta Yesu Kristus.

²⁴Iatu Puang Matua untambaikomi maruru’, na Ia dukamo la umpogau’i tu iannato.

²⁵E sangsiulurangku, passambayangankanni.

²⁶Parampoangkan salama’ki situru’ pangudung masero lako mintu’ sangsiuluranta.

²⁷Kupalaku tongan lako kalemi tete dio sanganNa Puang, anna dibasan mintu’ sangsiuluranta te sura’, iate.

²⁸Anna pa’kamaseannamora Puangta Yesu Kristus urrondongkomi.