Read Toraja-Sa'dan YOSUA 11 Bible Online

YOSUA 11 - Toraja-Sa'dan bible

YOSUA 11

¹Iatonna rangimi Yabin, datu Hazor, tu iannato, mesuami lako Yobab, datu Madon sia lako datu Simron, sia lako datu Akhsaf,

²sia lako mintu’ datu tu torro Daanna lu dao Buntu, sia diong Araba-Yordan lo’na lu Kinerot, diong Padang Merrantena, sia daona lu mentanetena Dor rampe Matampu’,

³lako to Kanaan tu dio rampe Matallo sia rampe Matampu’, sia lako to Amori, to Het, to Feris, to Yebus tu dao lu buntu, sia to Hewi, tu diong se’pon Hermon, dio lili’na Mizpa.

⁴Tassu’mi tu tau iato mai sola mintu’ surodadunna tu nasolan, lendu’ budanna, susito karangan dio biring tasik sia iatu mai darang sia kareta lendu’ budanna.

⁵Sirampunmi tu mintu’ datu iato napada sae ma’tenda dio to’ salu’-salu’na Merom, la urrarii to Israel.

⁶Ma’kadami tu PUANG lako Yosua, Nakua: Da mukataku’i tu tau iato mai, belanna masiang attu susite la Kusorong nasang natalo to Israel; iatu mai darang la muka’tu ura’ lentekna sia la muballa tu mintu’ karetana.

⁷Saemi tu Yosua sola mintu’ surodadu nasolan tang dikapang-kapang untu’ba’i tu tau iato mai dio to’ limbong sikandappi’ Merom, anna laoi.

⁸Nasorongmi PUANG tama limanna to Israel anna taloi sia naula’ sae lako Sidon-Kapua sia sae lako Misrefot-Maim, sia sae lako lombok Mizpa ma’palulako matallo. Napateimi tu tau iato, moi misa’ tae’ nalussuran.

⁹Napogau’mi Yosua lako tau iato mai, susitu mangka Napokada PUANG lako kalena: naka’tu tu ura’ lentekna mintu’ darangna sia pura naballa tu mintu’ karetana.

¹⁰Iatonna sulemo tu Yosua attu ia bangsiamoto, nataloi tu Hazor, sia napatei tu datunna, belanna iatonna dolona iatu Hazor indo’ tondokna mintu’ kadatuan iato.

¹¹Napatei pa’dang tu mintu’ kepenaanna lan sia nasabu’i butung pepayu; moi misa’ tu kepenaanna tae’mo torro sia iatu Hazor napurai naballa.

¹²Sia natalo Yosua tu mintu’ kotana datu iate sia mintu’ datunna, sia napatei pa’dang, sia nasabu’i butung pepayu, susitu napasan Musa, taunNa PUANG.

¹³Apa iatu kota dao lu tanetena tae’ naballai to Israel, sangadinna Hazor manna tu pura naballa Yosua.

¹⁴Na iatu mintu’ pangrampa lan mai mintu’ kota iato sia mintu’ sapi sia domba sia bembe’ pada naala to Israel; ia manna tu mai tau pura napatei pa’dang sae lako mangsan nasang, moi misa’ tu kepenaanna tae’ bang napatorro.

¹⁵Susitu mangka Napasan PUANG lako Musa, taunNa, susi dukato tu napasan Musa lako Yosua, sia napogau’mo Yosua susito; moi misa’ tae’ napasalai tu mintu’ kadanNa PUANG lako Musa.

¹⁶Susimoto tu kanataloanna Yosua tu mintu’ tondok iato, tu Tondok ma’buntunna, sia mintu’ Tondok lo’na lu, sia mintu’ Tondok Gosyen, sia Padang Merrantena, sia Araba-Yordan, sia Buntunna Israel sola Padang Merrantena;

¹⁷randuk dio mai Buntu Karing, tu ma’palulangngan Seir sae lako Baal-Gad diong lombok Libanon, diong garonto’ buntu Hermon. Natalomi tu mintu’ datunna sia napatei.

¹⁸Masai tongan nanii Yosua sirari tu mintu’ datu iato.

¹⁹Moi misa’ kota tae’ tu sikaelo to Israel, sangadinna to Hewi, tu umpa’tondokki Gibeon. Mintu’na to natalo nasang lan kapararian.

²⁰Belanna susimoto Napamanassa PUANG, kumua Ia umpamakarra’i tu penaanna tau iato mai, naurungan sae urrarii to Israel, anna disabu’i butung pepayu sia dimangsanni tang dikaturuturui, susitu Napasan PUANG lako Musa.

²¹Attu ia dukato saemi tu Yosua umpisanni to Enak dao mai buntu sia dio mai Hebron, Debir na Anab, dao mai mintu’ buntu Yehuda sia dao mai mintu’ buntu Israel. Iatu tau iato mai sia kotana nasabu’i nasang Yosua butung pepayu.

²²Moi misa’ tu to Enak tae’ bangmo torro lan lu tondok Israel, sangadinna dio mannamo Gaza sia dio Gat sia dio Asdod nanii torro.

²³Mintu’ tondok iato natalo nasang Yosua situru’ tu mintu’ Napokadannamo PUANG lako Musa, napa’benganni Yosua lako to Israel la napomana’ situru’ tu bilanganna tu mai sukunna. Marampa’mi tu tondok dio mai tananan ra’.