Read Toraja-Sa'dan YOSUA 15 Bible Online

YOSUA 15 - Toraja-Sa'dan bible

YOSUA 15

¹Iatu taana suku to Yehuda tonna diloterei unturu’ mintu’ pa’rapuanna ma’angge lili’na Edom, sae lako padang pangallaran Zin ma’palusau’na, dio iringna rampe lo’na lu.

²Iatu katonanna lo’na lu randuk dio mai iringna tasik Ma’sin, randuk dio mai tasik mengkoko, tu ma’palusau’na;

³rampo lako lo’na lu lombokna dao tanete, tu umposanga Te’tek Buku, natarru’ lako Zin, namale langngan lo’na lu Kadesh-Barnea, nalendu’i tu Hezron, namale langngan Adar, na mengkoko sule langngan Karka,

⁴sia tarru’ lako Azmon, anna tassu’ sae lako salu’-salu’ Mesir, naurungan iatu anggenna sumpu lako tasik. Iamote tu angge lili’ padangmu rampe sau’na.

⁵Iatu angge padangna dio rampe matallo iamotu tasik Ma’sin sae lako minanga Yordan. Iatu angge padangna daanna lu randuk dio mai tasik mengkoko dio minanga Yordan;

⁶iatu angge padangna ma’palulangngan Bet-Hogla, tarru’ rekkena Bet-Araba, anna tarru’ langngan tu anggena dao buntu batu Bohan, anakna muane Ruben.

⁷Inde to dio mai iatu anggenna ma’palulangngan Debir, tassu’ diong mai lombok Akhor, namane tibalik dio mai lu lako Gilgal, tu sitingoan lombok dao tanetena Adumim, lo’na lu salu’-salu’. Na iatu anggenna tarru’ lako to’ uainna En-Semes na iatu tampakna dio En-Rogel.

⁸Inde to dio mai iatu anggenna ma’palulangngan lombok Ben-Hinom, sipeupu’ mennaa’na buntu Yebus lo’na lu, iamo tu Yerusalem; namane iatu anggenna tarru’ langngan botto buntu, tu sitingoan lombok Hinom, rampe matampu’, tu dio biring daanna lu lombok to Refaim.

⁹Namane tilekko tu anggenna dao mai botto buntu iato lako to’ kalimbuang dio Me-Neftoah, namane rampo lako mintu’ kota dao lu buntu Efron; namane iatu anggenna tilekko lako Baala, iamo tu Kiryat-Yearim.

¹⁰Namane tilekko tu anggenna dio mai Baala rampe matampu’ lako buntu Seir, namane ma’palurekke lako buntu ma’borongna Yearim, iamo tu Kesalon; namane ma’palurokko Bet-Semes, natarru’ lako Timna.

¹¹Iatu anggenna tassu’ ma’palurekke sae lako buntu mennaa’na Ekron; namane tilekko lako Sikron, tarru’ lako buntunna Baala, sia tarru’ sae lako Yabneel; na iatu tampak katonanna sae lako tasik rampe matampu’.

¹²Iatu anggenna dio rampe matampu’ iamotu tasik Kapua sia biringna. Iamoto tu mintu’ angge padangna to Yehuda tiku lao unturu’ pa’rapuanna.

¹³Na iatu Kaleb, anakna Yefune, napaketaa Yosua misa’ mana’ dio lu to Yehuda, iamo tu Kiryat-Arba, susitu kadanNa PUANG lako Yosua; iatu Arba iamo ambe’na Enak. Iamote tu Hebron.

¹⁴Inde to dio mai nanii Kaleb urrambai tu to Enak sola tallui, iamotu Sesai, Ahiman na Talmai, anakna muane Enak.

¹⁵Inde to dio mai nanii ke’de’ la ullaoi to umpa’tondokki Debir. Iatu Debir dolona disanga Kiryat-Sefer.

¹⁶Ma’kadami tu Kaleb nakua: Minda-minda untaloi tu Kiryat-Sefer anna alai, la kuben tu Akhsa, anakku baine, anna pobainei.

¹⁷Natalomi Otniel, anakna Kenas, siulu’na Kaleb, tu kota iato, anna benni tu Akhsa, anakna, napobaine.

¹⁸Iatonna rampomo tu baine lako, nanaranni tu muanena la lao umpalaku pa’pa’lakan lako ambe’na. Anna mengkalao dao mai keledainna. Nakutanaimi Kaleb nakua: Apara mutungkanan?

¹⁹Mebalimi nakua: La mitekkennina’ angki pokasibalianni; mangkamo’ miben padang rangke, la miben dukamo’ ba’tu pira-pira kalimbuang. Nabenmi tu kalimbuang daona lu sia iatu kalimbuang diongna lu.

²⁰Inde sia tu taa mana’na suku to Yehuda unturu’ mintu’ pa’rapuanna.

²¹Iatu mai kota mambelanna liu suku to Yehuda, sikandappi’ anggenna Edom dio Padang Lo’na lu iamotu: Kabzeel, Eder, Yagur,

²²Kina, Dimona, Adada,

²³Kedesy, Hazor, Yitnan,

²⁴Zif, Telem, Bealot,

²⁵Hazor-Hadata, Keriot-Hezron, iamo tu Hazor,

²⁶Amam, Sema, Molada,

²⁷Hazar-Gada, Hesmon, Bet-Pelet,

²⁸Hazar-Sual, Bersyeba sia mintu’ lili’na,

²⁹Baala, Iyim, Ezem,

³⁰Eltolad, Kesil, Horma,

³¹Ziklag, Madmana, Sansana,

³²Lebaot, Silhim, Ain na Rimon, mintu’ tu kota iato duangpulo ngkasera sola kampongna.

³³Diong Padang Merrantena: iamotu mai kota Estaol, Zora, Asna,

³⁴Zanoah, En-Ganim, Tapuah, Enam,

³⁵Yarmut, Adulam, Sokho, Azeka,

³⁶Saaraim, Aditaim, Gedera na Gederotaim; mintu’ tu kota iato sangpulo a’pa’ sola kampongna;

³⁷Zenan, Hadasa, Migdal-Gad,

³⁸Dilean, Mizpa, Yokteel,

³⁹Lakhis, Bozkat, Eglon,

⁴⁰Kabon, Lahmas, Kitlis,

⁴¹Gederot, Bet-Dagon, Naama sia Makeda; mintu’ tu kota iato sangpulo annan sola kampongna;

⁴²Libna, Eter, Asan,

⁴³Yiftah, Asna, Nezib.

⁴⁴Kehila, Akhzib sia Maresa; mintu’ tu kota iato kasera sola kampongna.

⁴⁵Sia Ekron sola lili’na sia kampongna.

⁴⁶Randuk dio mai Ekron ma’palulako tasik mintu’ kota tu sisa’de Asdod sia kampongna;

⁴⁷Asdod sola lili’na sia kampongna, Gaza sola lili’na sia kampongna, sae lako salu’-salu’na Mesir, tasik Kapua sia biringna.

⁴⁸Na dao Ma’buntunna iamo tu Samir, Yatir, Sokho;

⁴⁹Dana, Kiryat-Sana, iamo tu Debir;

⁵⁰Anab, Estemo, Anim,

⁵¹Gosyen, Holon sia Gilo; mintu’ tu kota iato sangpulo misa sola kampongna;

⁵²Arab, Duma, Esan,

⁵³Yanum, Bet-Tapuah, Afeka,

⁵⁴Humta, Kiryat-Arba, iamo tu Hebron, sia Zior; mintu’ tu kota iato kasera sola kampongna;

⁵⁵Maon, Karmel, Zif, Yuta,

⁵⁶Yizreel, Yokdeam, Zanoah,

⁵⁷Kain, Gibea sia Timna; mintu’ tu kota iato sangpulo sola kampongna;

⁵⁸Halhul, Bet-Zur, Gedor,

⁵⁹Maarat, Bet-Anot sia Eltekon; mintu’ tu kota iato annan sola kampongna;

⁶⁰Kiryat-Baal iamo tu Kiryat-Yearim sia Raba; da’dua tu kota iato sola kampongna.

⁶¹Sia lan padang pangallaran, iamo tu Bet-Araba, Midin, Sekhakha,

⁶²Nibsan, Ir-Hamelakh sia En-Gedi; mintu’ tu kota iato annan sola kampongna.

⁶³Apa tae’ nakulle to Yehuda unnula’i tu to Yebus, tu umpa’tondokki Yerusalem; iamoto natorro ma’tondok tu to Yebus sola to Yehuda dio Yerusalem sae lako allo iate.