Read Toraja-Sa'dan YOSUA 16 Bible Online

YOSUA 16 - Toraja-Sa'dan bible

YOSUA 16

¹Mangkato napamanassami loterei tu taa mana’na bati’na Yusuf: randuk dio mai Yordan sikandappi’ Yerikho, rampe matallona to’ uainna Yerikho, nalendu’i tu padang pangallaran, tu randuk dio mai Yerikho ma’palulangngan dao lu buntu rampo langngan Betel,

²sia tarru’ dio mai Betel lako Lus; na mane tarru’ lako lili’na to Arkhi, lako Atarot,

³anna ma’palurokko matampu’ lako lili’na to Yaflet sae lako lili’na Bet-Horon diongna lu sia tarru’ lako Gezer, na iatu tampak katonanna sae lako to’ tasik.

⁴Den duka tu taa mana’na Manasye sola Efraim, anakna Yusuf.

⁵Inde sia tu lili’na to Efraim unturu’ pa’rapuanna, iamotu: dio rampe matallo tu anggenna taa mana’na Atarot-Adar sae lako Bet-Horon daona lu.

⁶Iatu anggenna ma’palulako rampe matampu’ daanna lu Mikhmetat, namane tilekko ma’palutama rampe matallo lako Taanat-Silo, natarru’ inde to dio mai lako rampe matallona Yanoah;

⁷dio mai Yanoah ma’palurokko Atarot sia Naharat, untu’tun lili’na Yerikho, na iatu tampakna sae lako Yordan.

⁸Iatu anggenna dio mai Tapuah ma’palulako rampe matampu’ lako salu’-salu’ Kana, na iatu tampakna sae lako to’ tasik. Iamoto tu taa mana’na rapu to Efraim unturu’ pa’rapuanna.

⁹Sia ia duka tu kota dipasengaran to Efraim lan lu taa mana’na Manasye, iamotu mai kota sola kampongna.

¹⁰Apa iatu to Kanaan tu umpa’tondokki Gezer tae’ naula’i, naurungan ma’tondok tu to Kanaan dio lu to Efraim sae lako allo iate, apa napotoma’diama.