Read Toraja-Sa'dan YOSUA 19 Bible Online

YOSUA 19 - Toraja-Sa'dan bible

YOSUA 19

¹Napamanassami loterei ma’penduan tu taa mana’na Simeon, iamotu suku to Simeon unturu’ pa’rapuanna. Iatu taa mana’na naparitangnga taa mana’na to Yehuda.

²Iatu taa mana’ napotaa, iamotu Bersyeba, Syeba, Molada,

³Hazar-Sual, Bala, Ezem,

⁴Eltolad, Betul, Horma,

⁵Ziklag, Bet-Hamarkabot, Hazar-Susa.

⁶En-Rimon na Saruhen. Mintu’na to sangpulo tallu kota sola kampongna.

⁷Ain, Rimon, Eter na Asan. Mintu’na to a’pa’ kota sola kampongna.

⁸Sia mintu’ kampong untikui tu kota sae lako Baalat-Beer, iamotu Rama lo’na lu. Iamoto tu taa mana’na suku to Simeon unturu’ pa’rapuanna.

⁹Iatu taa mana’na to Simeon diala lan mai taa mana’na to Yehuda. Belanna iatu to Yehuda tarru’ buda napotaa, iamoto naketaa tu to Simeon dio lu tau iato mai.

¹⁰Napamanassami loterei ma’pentallun tu taa mana’na to Zebulon unturu’ pa’rapuanna. Iatu anggenna taa mana’na sae lako Sarid.

¹¹Iatu anggenna dio rampe matampu’ ma’palulangngan Marala, natu’tun lako Dabeset, anna sae sikandappi’ biring salu’-salu’ sitingoan Yokneam.

¹²Sule dio mai Sarid natarru’ lako matallo urrundu’ lili’na Kislot-Tabor, natassu’ dio Dobrat, namane male langngan Yafia.

¹³Inde to dio mai tarru’ lako matallo, lako Gat-Hefer sia lako Et-Kazin anna tassu’ dio Rimon, tu ma’palulako Nea.

¹⁴Tilekkko male ullendu’i tu kota iato daanna lu Hanaton sia iatu tampakna diong lombok Yiftah-El.

¹⁵Sia Katat, Nahalal, Simron, Yidala na Betlehem. Mintu’na to sangpulo dua kota sola kampongna.

¹⁶Iamote tu taa mana’na to Zebulon unturu’ pa’rapuanna, iamotu kota iato sola kampongna.

¹⁷Napamanassami loterei ma’penna’pa’ tu taa mana’na Isakhar, iamotu to Isakhar unturu’ pa’rapuanna.

¹⁸Iatu mai lili’na, iamotu Yizreel, Kesulot, Sunem,

¹⁹Hafaraim, Sion, Anaharat,

²⁰Rabit, Kisyon, Ebes,

²¹Remet, En-Ganim, En-Hada na Bet-Pazes.

²²Iatu anggenna tu’tun sae lako Tabor, Sahazima na Bet-Semes; iatu tampak katonanna iamotu Yordan. Mintu’na to sangpulo annan kota sola kampongna.

²³Iamote tu taa mana’na to Isakhar unturu’ pa’rapuanna iamotu kota iato sola kampongna.

²⁴Napamanassami loterei ma’pellima tu taa mana’na to Asyer, unturu’ pa’rapuanna.

²⁵Iatu mai lili’na, iamotu Helkat, Hali, Beten, Akhsaf,

²⁶Alamelekh, Amad na Misal; dio rampe matampu’ tu’tun sae lako Karmel sia biring salu’-salu’ Libnat.

²⁷Namane sule (tu anggenna) ma’palutama matallo lako Bet-Dagon, tu’tun sae lako Zebulon sia lombok Yiftah-El daanna lu, Bet-Emek sia Nehiel, natassu’ daanna lu Kabul;

²⁸sia Ebron, Rehob, Hamon na Kana sae lako Sidon-Kapua.

²⁹Namane sule tu anggenna lako Rama sia sae lako kota ditambakukunna Tirus, nasule ma’palulako Hosa, na iatu tampakna sae lako tasik, dio mai Mahalab sae lako Akhzib;

³⁰sia Uma, Afek na Rehob. Mintu’na to duangpulo ndua kota sola kampongna.

³¹Iamote tu taa mana’na suku to Asyer unturu’ pa’rapuanna iamotu kota iato sola kampongna.

³²Napamanassami loterei ma’pennannan tu taa mana’na to Naftali, iamotu to Naftali unturu’ pa’rapuanna.

³³Iatu lili’na randuk dio mai Helef dio mai Tarpin dio Zaananim, Adami-Nekeb na Yabneel sae lako Lakum, na iatu tampakna sae lako Yordan.

³⁴Nasule tu anggenna ma’palurokko matampu’ lako Aznot-Tabor, inde to nanii tassu’ lako Hukok, tu’tun sae lako Zebulon lo’na lu, sae lako Asyer dio rampe matampu’ sia sae lako Yehuda dio randan salu Yordan dio rampe matallo.

³⁵Inde sia tu mintu’ kota ditambakuku, iamotu Zidim, Zer, Hamat, Rakat, Kineret,

³⁶Adama, Rama, Hazor,

³⁷Kedesy, Edrei, En-Hazor,

³⁸Yiron, Migdal-El, Horem, Bet-Anat na Bet-Semes. Mintu’na to sangpulo kota sola kampongna.

³⁹Iamote tu taa mana’na suku to Naftali unturu’ pa’rapuanna, iamotu kota iato sola kampongna.

⁴⁰Napamanassami loterei ma’pempitu tu taa mana’na suku to Dan.

⁴¹Iatu mai lili’na taa mana’na, iamotu Zora, Estaol, Ir-Semes,

⁴²Saalabin, Ayalon, Yitla,

⁴³Elon, Timna, Ekron,

⁴⁴Elteke, Gibeton, Baalat,

⁴⁵Yehud, Bene-Berak, Gat-Rimon,

⁴⁶Me-Yarkon na Rakon sola lili’na tu nasitingoan Yafo.

⁴⁷Belanna iatu lili’na to Dan dio si’pi’ napa’tondokki, iamoto nake’de’ tu to Dan urrarii Lesem. Natalomi sia napatei pa’dang tu tau lan sia naalamo nanii ma’tondok, nasangaimi Dan tu Lesem napasikona sanganna Dan, ambe’na.

⁴⁸Iamote tu taa mana’na suku to Dan unturu’ pa’rapuanna, iamotu kota iato sola kampongna.

⁴⁹Iatonna upu’mo tu to Israel untaa-taai tu padang unturu’ patu borongna, naben duka taa mana’ tu Yosua, anakna muane Nun, lan tangngana tau iato mai.

⁵⁰Unturu’mi parentaNa PUANG, tu tau iato mai nabenni Yosua tu kota mangka napalaku, iamotu Timnat-Serah, tu dao lu buntu Efraim. Nabangun pole’mi tu kota iato, anna ma’tondok dio.

⁵¹Iamoto tu taa mana’ mangka naloterei anna pamanassai to minaa Eleazar sola Yosua, anakna muane Nun, sia pangulu rapu lako mintu’ suku to Israel dio Silo dio oloNa PUANG, dio tingayo lalan tama Tenda Kasitammuan. Susimoto nanii tu tau iato mai umpaupu’i untaa-taa padang iato.