Read Toraja-Sa'dan YOSUA 20 Bible Online

YOSUA 20 - Toraja-Sa'dan bible

YOSUA 20

¹Ma’kadami tu PUANG lako Yosua, Nakua:

²Pokadai lako to Israel te: Pamanassai tu ba’tu pira-pira kota pentilindungan tu mangkamo Kupokada lako kalemi nalopian Musa,

³kumua minda-minda tu papatean tang naangga’i sia tang nakapang-kapang la mallai lako umpopentilindunganni dio mai to mangala puli.

⁴Ianna mallai tu tau iato lako sala umbannai tu kota iato, la torro bendan dio tingayo babangan kota, anna pa’peissananni tu a’ganna lako pekaamberanna kota iato; manassa la natarima tu tau iato tama kota, anna patiroanni inan pa’bongian, nanii torro sola.

⁵Iake naula’i to mangala puli, tae’ nama’din tau iato mai ussorongi tu to papatean tama limanna, belanna tae’ naangga’i umpatei tu solana sia tae’ duka nakabiri’i dolona.

⁶La torro ia lan kota iato sae lako mangkanna umpennoloi kombongan la urra’ta’i tu kara-karana, sae lako matena tu tominaa kapua, tu den to attu iato. Namane iatu to papatean la sule lako kotana sia lako banuanna, iamotu lako kota mangka nanii mallai lan mai.

⁷Napamarimbangan tau iato mai tu Kedesy dio Galilea dao buntu Naftali sia Sikhem dao buntu Efraim sia Kiryat-Arba, iamotu Hebron, dao buntu Yehuda.

⁸Iatu sambalinna lu Yordan, dio matallona Yerikho, napamanassa tau iato mai tu Bezer, lan padang pangallaran, dao padang rante membuntunna dio mai lili’na suku Ruben, sia Ramot dio Gilead dio mai lili’na suku Gad sia Golan lan Basan dio mai lili’na suku Manasye.

⁹Iamote tu mintu’ kota dipamanassan mintu’ to Israel sia mintu’ to sae tu torro mempue dio lu tau iato mai, dikua nama’din mallai inde to lako tu mintu’ to tang unnangga’i papatean, da napatei to mangala puli, ke tae’pi nara’ta’i kombongan tu kara-karana.