Read Toraja-Sa'dan YOSUA 21 Bible Online

YOSUA 21 - Toraja-Sa'dan bible

YOSUA 21

¹Saemi tu pangulu rapu to Lewi umpennoloi to minaa Eleazar sia Yosua, anakna muane Nun, sia pangulu rapu suku to Israel,

²anna ma’kada lako tau iato mai dio Silo dio tondok Kanaan, nakua: Mangkamo mepasan tu PUANG nalopian Musa la umbenkan kota la kinii ma’tondok sia padang kariuan tu untikui la nanii sapingki sia dombaki sia bembe’ki.

³Napa’benganmi to Israel unturu’ parentaNa PUANG dio mai taa mana’na te mai kota sola padang kariuanna lako to Lewi.

⁴Napamanassami loterei tu pa’rapuanna to Kehat. Iatu bati’na to minaa Harun, dio lu to Lewi unnappa’ sangpulo tallu kota tonna diloterei, iamotu dio mai pa’rapuanna suku Yehuda sia dio mai suku Simeon sia dio mai suku Benyamin.

⁵Iatu to Kehat torronapa, unnappa’ sangpulo kota tonna diloterei, dio mai pa’rapuanna suku Efraim sia dio mai suku Dan sia dio mai sesena suku Manasye.

⁶Iatu to Gerson unnappa’ sangpulo tallu kota tonna diloterei, dio mai pa’rapuan suku Isakhar sia dio mai suku Asyer sia dio mai suku Naftali sia dio mai sesena suku Manasye dio Basan.

⁷Iatu to Merari unnappa’ sangpulo dua kota tonna diloterei unturu’ pa’rapuanna, dio mai suku Ruben sia dio mai suku Gad sia dio mai suku Zebulon.

⁸Iate mai kota sola padang kariuanna napa’bengan to Israel lako Lewi tonna diloterei susitu mangka Napasan PUANG nalopian Musa.

⁹Napa’benganmi dio mai suku to Yehuda sia dio mai suku to Simeon te kota iate, tu nasa’bu’ tau:

¹⁰lako to Harun, dio mai pa’rapuanna to Kehat sangbilangan to Lewi, belanna napamanassa bunga’ pa’loterei,

¹¹iamoto napa’benganmi tu Kiryat-Arba, — Arba iate iamo ambe’na Enak — , iamotu Hebron, dao buntunna Yehuda, sia padang kariuan tiku lao.

¹²Apa iatu pa’pa’lakanna kota iato sia iato mai kampongna mangkamo napa’bengan lako Kaleb, anakna muane Yefune, anna pomana’i.

¹³Susito napa’benganmi tau iato mai lako bati’na to minaa Harun tu Hebron, kota pentilindunganna to papatean sola padang kariuanna sia Libna sola padang kariuanna,

¹⁴Yatir sola padang kariuanna, Estemoa sola padang kariuanna,

¹⁵Holon sola padang kariuanna, Debir sola padang kariuanna,

¹⁶Ain sola padang kariuanna, Yuta sola padang kariuanna, na Bet-Semes sola padang kariuanna: kasera tu kota dio mai te da’dua suku.

¹⁷Sia dio mai suku Benyamin iamotu Gibeon sola padang kariuanna, Geba sola padang kariuanna,

¹⁸Anatot sola padang kariuanna na Almon sola padang kariuanna: a’pa’ kota.

¹⁹Iatu mintu’ kotana to Harun, iamotu mai to minaa, den sangpulo tallu sola padang kariuanna.

²⁰Na iatu pa’rapuanna to Kehat, iamotu to Lewi tu torronapa dio lu to Kehat, naappa’mo tu mai kota dio mai suku Efraim tonna diloterei.

²¹Napa’benganmi tu Sikhem, kota pentilindunganna to papatean sola padang kariuanna dao lu buntu Efraim, Gezer sola padang kariuanna.

²²Kibzaim sola padang kariuanna na Bet-Horon sola padang kariuanna: a’pa’ kota;

²³dio mai suku Dan, iamotu Elteke sola padang kariuanna, Gibeton sola padang kariuanna;

²⁴Ayalon sola padang kariuanna, na Gat-Rimon sola padang kariuanna: a’pa’ kota.

²⁵Sia dio mai sesena suku Manasye iamotu Taanakh sola padang kariuanna na Gat-Rimon sola padang kariuanna: da’dua kota.

²⁶Iatu mintu’ kota pa’rapuanna to Kehat torronapa, den sangpulo sola padang kariuanna: a’pa’ kota.

²⁷To Gerson, iamotu pa’rapuanna to Lewi, unnappa’ dio mai sesena suku Manasye, iamotu Golan, kota pentilindunganna to papatean dio Basan sola padang kariuanna na Beestera sola padang kariuanna: da’dua kota;

²⁸sia dio mai suku Isakhar, iamotu Kisyon sola padang kariuanna, Dobrat sola padang kariuanna,

²⁹Yarmut sola padang kariuanna, na En-Ganim sola padang kariuanna: a’pa’ kota;

³⁰sia dio mai suku Asyer, iamotu Misal sola padang kariuanna, Abdon sola padang kariuanna,

³¹Helkat sola padang kariuanna na Rehob sola padang kariuanna: a’pa’ kota.

³²Sia dio mai suku Naftali, iamotu Kedesh, kota pentilindunganna to papatean, dio Galilea sola padang kariuanna, Hamot-Dor sola padang kariuanna na Kartan sola padang kariuanna: tallu kota.

³³Iatu mintu’ kotana to Gerson unturu’ pa’rapuanna den sangpulo tallu sola padang kariuanna.

³⁴Na iatu pa’rapuanna to Merari, iamotu to Lewi torronapa, naappa’mo dio mai suku Zebulon tu Yokneam sola padang kariuanna, Karta sola padang kariuanna,

³⁵Dimna sola padang kariuanna na Nahalal sola padang kariuanna: a’pa’ kota.

³⁶Sia dio mai suku Ruben, iamotu Bezer sola padang kariuanna, Yahas sola padang kariuanna,

³⁷Kedemot sola padang kariuanna na Mefaat sola padang kariuanna: a’pa’ kota.

³⁸Sia dio mai suku Gad, iamotu Ramot, kota pentilindunganna to papatean, dio Gilead sola padang kariuanna, Mahanaim sola padang kariuanna,

³⁹Hesbon sola padang kariuanna na Yaezer sola padang kariuanna. Mintu’na to a’pa’ kota.

⁴⁰Iatu mintu’ kota iato tu naappa’ to Merari unturu’ pa’rapuanna, iamotu to tang ketaapa dio pa’rapuanna to Lewi. Dipamanassammi tonna diloterei tu kota sangpulo dua.

⁴¹Iatu mintu’ kotana to Lewi dio lu taa mana’na to Israel den patangpulo ngkarua sola padang kariuanna.

⁴²Mintu’ tu tondok iato pantan unnampui kota sola padang kariuanna. Susimoto tu a’ganna mintu’ kota iato.

⁴³Susimoto tu PUANG ungkamasean to Israel mintu’ padang, tu umpalao sumpa unnallu’i lako nene’ to dolona; naalami napomana’ tau iato mai sia nanii ma’tondok.

⁴⁴Nakamaseimi PUANG karapasan tiku lao tu tau iato mai, susitu mintu’na mangka Naallu’ Napalaoi sumpa lako nene’ to dolona; moi misa’ ualinna tae’ unnattai bendan, dio tingayona; iatu mintu’ ualinna Nasorong PUANG tama kuasanna.

⁴⁵Tae’ misa’ tang dadi tu mintu’ kada melo tu Naallu’ PUANG lako to Israel, sangadinna dadi nasang.