Read Toraja-Sa'dan YOSUA 23 Bible Online

YOSUA 23 - Toraja-Sa'dan bible

YOSUA 23

¹Iatonna masaimo mangkanna Nakamasei karapasan PUANG tu to Israel dio mai mintu’ ualinna tiku lao sia matuamo tu Yosua sia matessekmo,

²natambaimi Yosua sirampun tu mintu’ to Israel, iamotu mai pekaamberanna, pangulunna, to mangra’ta’ kara-karana, sia to ma’parentana, na ma’kada lako, nakua:

³Iate aku matuamo’ sia matessekmo’. Mitiro kalenamo tu mintu’ apa Napogau’ PUANG, Kapenombammi, lako te mintu’ bangsa iate, tu belanna kamu. Belanna PUANG, Kapenombammi kalena untunduikomi parari.

⁴Kupamanassamo pa’loterei te bangsa torronapa la napotaa mana’ sukummi randuk dio mai Yordan, — susitu mintu’ bangsa mangka kusabu’i — sae lako tasik Kapua rampe matampu’.

⁵Sia PUANG, Kapenombammi, kalenamo la urrambai dio tingayomi sia la unnula’i dio tingayomi sia kamumo la unnalai mipomana’ tu padangna, susitu Naallurangkomi PUANG, Kapenombammi.

⁶Iamoto la mipabatta’ tongan tu penaammi ungkaritutui sia unturu’i tu mintu’ apa disura’ lan sura’ Sukaran alukna Musa, da misepang lako kanan ba’tu kairi.

⁷Da misikadamak tu bangsa torropa misisolan sia da misa’bu’i tu sanganna deatanna sia da mipalao sumpa tete dio sanganna sia da mipengkaolai ba’tu tukku umpenombai.

⁸Sangadinna la la’ka’komi lako PUANG, Kapenombammi, — susi penggaurammi sae lako allo iate — .

⁹Belanna Narambaimo PUANG dio mai tingayomi tu ba’tu pira-pira bangsa kapua sia mawatang; na iatu kamu moi misa’ tau tae’ unnattai ma’patanan dio olomi sae lako allo iate.

¹⁰Misa’komi tu mangka unnula’ tau sangsa’bu, belanna PUANG, Kapenombammi, Ia kalena untunduikomi parari, susitu Naallu’ lako kalemi.

¹¹Palan tonganni penaammi, sia kamali’i tu PUANG, Kapenombammi.

¹²Belanna iammi sorong boko’ sia sikalute te mai bangsa torropa, tu misisolan, sia sipoipa’ sia sipobaisen sia sikadamak tu tau iato,

¹³la miissan tongan, kumua iatu PUANG, Kapenombammi, tae’mo nala urrambai te bangsa iate dio tingayomi; sangadinna tau iato mai la dadi poya sia pepurru’ lako kalemi, sia pebamba dio aakmi sia duri lan matammi, miurungan sanggang lan te tondok ballo tu Napa’kamasean PUANG, Kapenombammi, lako kalemi.

¹⁴Manassa aku te la sulena’ umpolalan lalan malute, tu naola mintu’ to lino; iamoto la kalebu penaammi sia deatammi unnakui, kumua moi sangbuku kada tae’ tang dadi tu mintu’ pangallu’ melo tu Napokadangkomi PUANG Kapenombammi. Mintu’na to dadi nasangmo lako kalemi. Iatu mintu’nato moi misa’ tae’ tang dadi.

¹⁵Apa susitu mintu’ apa melo urrampoikomi tu Naallu’ PUANG, Kapenombammi, lako kalemi, la susi dukato la Naparampoikomi PUANG mintu’ kakadakean, Naurunganni ussabu’ikomi lan mai te tondok ballo, tu Nakamaseangkomi PUANG, Kapenombammi.

¹⁶Iake milendai tu basse, tu Naallurangkomi PUANG, Kapenombammi, ammi male umpengkaolai sia tukku umpenombai kapenomban senga’, manassa la ma’lulu-lulu tu kasengkeanNa PUANG lako kalemi sia la madomi’komi disanggangi lan mai tondok ballo tu Nakamaseangkomi Puang.