Read Toraja-Sa'dan YOSUA 6 Bible Online

YOSUA 6 - Toraja-Sa'dan bible

YOSUA 6

¹Iatu babangan Yerikho disalli’; manda’ tongan disalli’ belanna to Israel; moi misa’ tau tae’ nama’din tassu’ sia tama.

²Ma’kadami tu PUANG lako Yosua, Nakua: Manassa la Kusorong tama limammu tu Yerikho sola datunna sia mintu’ pa’barani lalongna.

³Inang la mililingi tu kota iato; iatu mintu’ surodadu pissanri la ullilingi tu kota iato; la mupogau’ susito lan annan allona.

⁴La pitu to minaa untangke pitu napiri tanduk domba sia lumingka dio tingayo patti. Apa ianna allo ma’pempitu la pempitukomi ullilingi tu kota, namukkun tu mintu’ to minaa umpannoni napiri tanduk domba.

⁵Iake narittinganni tau tu oni napiri tanduk domba, ammi rangi tu oni iato, la siarrakan tu mintu’ to buda, anna ro’pok tu rinding tembo’ kota, napada ungkendekki mintu’ to buda, tu natingayoinna.

⁶Natambaimi Yosua, anakna Nun, tu mintu’ to minaa, anna ma’kada lako, nakua: Angka’i tu patti basse, napitu to minaa untangke pitu napiri tanduk domba lumingka dio tingayo pattinNa PUANG.

⁷Sia ma’kada tu Yosua lako to buda, nakua: Ke’de’komi mimale ullilingi kota na to ma’pa’buno la lumingka dio tingayo pattinNa PUANG.

⁸Iatonna mangkamo to Yosua ma’kada lako to buda, malemi tu pitu to minaa tu untangke pitu napiri tanduk domba dolo dio oloNa PUANG, sia umpannoni napiri tanduk domba, na iatu patti basseNa PUANG menturu’ dio boko’na tau iato mai.

⁹Sia iatu mai to ma’pa’buno male undoloanni tu mai to minaa, tu umpannoni napiri tanduk domba, sia iatu surodadu dio boko’ undi unturu’i tu patti iato, natontong tu to minaa umpannoni napiri tanduk domba.

¹⁰Napakaintinmi Yosua tu to buda, nakua: Tae’ mima’din unnarrak-arrak sia tae’ nama’din dirangi tu gamarammi, ondongpi moi sangbuku kada da nasun dio pudukmi sae lako allo kunii ungkuangkomi, kumua: Unnarrakkomi! — mimane siarrakan.

¹¹Malemi dibaa tu pattinNa PUANG ullilingi kota, pissan male lumiling. Namane sule tu tau iato mai lako to’ tenda, anna ma’bongi inde to dio.

¹²Millik kale’mi tu Yosua tonna melambi’, naangka’i to minaa tu pattinNa PUANG.

¹³Iatu pitu to minaa tu untangke pitu napiri tanduk domba dio tingayo pattinNa PUANG, marassan sia lumingka marassan duka umpannoni napiri tanduk domba, sia iatu to ma’pa’buno lumingka dio tingayona, sia iatu surodadu dio boko’, undi unturu’i tu pattinNa PUANG dio mai boko’, natontong tu to minaa umpannoni napiri tanduk domba.

¹⁴Susito malemi tu tau iato mai tonna allo ma’penduan ullilingi kota pissan, nasule lako to’ tenda. Susimo napogau’ to lan annan allona.

¹⁵Apa iatonna allo ma’pempitu millik kale’mi tu tau iato mai, tonna berre’ allo, anna male ullilingi kota iato susito mangkannamo; apa ia manna to allo iato namale tu tau iato mai ullilingi kota pempitu.

¹⁶Iatonna ma’pempitunnamo napannonimi to minaa tu napiri tanduk domba, ma’kadami tu Yosua lako to buda, nakua: Unnarrakkomi, belanna Nasorongmo PUANG lako kalemi tu kota.

¹⁷Apa iate kota iate sola mintu’ tu apa lan la disabu’i belanna dipemalian PUANG; sangadinna Rahab, tu baine bualang la dipatuo, la ia la mintu’ tau nasolan la banuanna, belanna nabuni tu pesua mangka tasua.

¹⁸Apa iatu kamunna la mipatoyang tongan tu kalemi dio mai tu apa pepayu, da mialai tu apa pepayu ke marassankomi ussabu’i, miurungan umpapepayuan mintu’ to’ tenda to Israel anna ruai kasanggangan.

¹⁹Mintu’ bulaan sia salaka sia mintu’ pareanan tambaga sia bassi la dipamaindanan PUANG, inang la dipatama pangannan iananNa PUANG.

²⁰Iatonna marassan tau umpannoni tu napiri tanduk domba, unnarrak-arrakmi tu to buda; iatonna rangimi to buda tu oni napiri tanduk domba, pakalan siarrakanmi umpekapuai gamaranna. Tuanmi tu rinding tembo’, anna pada unteka’i to buda langngan natama kota, tu natingayoinna, anna taloi tu kota.

²¹Nasabu’imi pa’dang tu mintu’ apa lan tondok iato, la muane la baine la to mangura la to matua, sae lako mintu’ sapi sia domba sia keledai.

²²Ma’kadami Yosua lako tu tau sola duai tu mangkamo usserre’i tondok iato, nakua: Malekomi tama banuanna tu baine kadake gau’, ammi patassu’i tu baine iato sola mintu’ to lan banuanna, susitu mipalaoan sumpa unnallu’i lako kalena.

²³Malemi tu to mangura ma’serre’i sola duai tama, anna patassu’i tu Rahab sola indo’ ambe’na, mintu’ siulu’na sia mintu’ to lan banuanna — ondongpi mintu’ sangdadianna napatassu’ nasang; anna patiroanni misa’ inan dio salianna to’ tenda to Israel.

²⁴Apa iatu kota iato sola mintu’ apa lan naballa api; sangadinna salaka, bulaan sia mintu’ pareanan tambaga sia bassi napatama pangannan iananna banuanNa PUANG.

²⁵Susimoto tu Yosua umpatuo Rahab, tu baine bualang, sia sangdadianna sia mintu’ to lan banuanna; torromi dio lu mintu’ to Israel sae lako allo iate, belanna nabuni tu to disua da’dua, tu nasua Yosua male usserre’i Yerikho.

²⁶Allo iato umpalaomi sumpa Yosua, nakua: La ditampakki ropu dio olona PUANG minda-minda tu ke’de’ umpabendan pole’i te kota Yerikho; iake naparandanganni la sanggang tu anak pa’bunga’na, sia iake napabendanni tu babanganna la sanggang tu anak tampakna.

²⁷Narondongmi PUANG tu Yosua sia kalelean tu sanganna lan lu mintu’ tondok.