Read Toraja-Sa'dan YOSUA 7 Bible Online

YOSUA 7 - Toraja-Sa'dan bible

YOSUA 7

¹Apa nalendai to Israel tu parenta diona apa dipemalii, belanna iatu Akhan, anakna Karmi, anakna Zabdi, anakna Zerah, dio mai suku Yehuda, unnalamo apa dipemalii. Iamoto nare’dek ara’Na PUANG lako to Israel.

²Nasuami Yosua tu ba’tu pira-pira tau dio mai Yerikho lako Ai, tu sikandappi’ Bet-Awen, rampe matallona Betel, sia ma’kada lako, nakua: Malekomi usserre’i tu tondok iato. Malemi tu tau iato usserre’i Ai.

³Sulemi tu tau iato lako Yosua anna ma’kada lako, nakua: Da namale nasang te mintu’ tau lako, sangadinna agi-agi bangmo duangsa’bu ba’tu tallungsa’bu tau male untalo Ai; da nadita’ka’i tu mintu’ tau male lumingka lako, belanna iatu to dio sidi’ri.

⁴Iamoto ke’de’mi dio mai tu bangsa iato agi-agi tallungsa’bu tau; apa mallai tu tau iato mai dio mai tingayona to Ai.

⁵Belanna napatei to Ai agi-agi tallungpulo nnannan tu tau iato mai sia naula’, dio salian babangan sae lako patuang dinii umpa’ batu sia natalo dio se’pon tanete. Attu iato raangmo penaanna tu bangsa iato, sia pa’de’ deatamo.

⁶Naserek-serekmi Yosua tu pakeanna, anna lumbang rokko padang dio tingayo pattinNa PUANG sae lako makaroeanna, la ia la mintu’ pekaamberanna to Israel, sia naambo’i barra’-barra’ tu ulunna.

⁷Ma’kadami Yosua nakua: O Puangki PUANG, ma’apai Misuai te bangsa iate ullambanni Yordan. Mikuaraka kidisorong tama limanna to Amori, kiurunganni sanggang? A’a, melo kengki popa’ga’taran bangmi torro sambalinna lu Yordan!

⁸O Puang, apapara la kupokada namemboko’mo tu to Israel dio mai ualinna?

⁹Ianna rangi to Kanaan sia mintu’ to lan tondok iate, manassa la napatama limbukan sia naputtai tu sangangki dao mai kuli’na padang. Na apamora la Mipogauranni tu sanga pasareongamMi?

¹⁰Ma’kadami PUANG lako Yosua, Nakua: Ke’de’ko; ma’apari mulumbang susito?

¹¹Umpogau’mo kasalan tu to Israel sia nalendaimo tu pangallu’Ku, tu Kupasan lako kalena, sia naala dukamo tu apa dipemalii, sia naboko duka, sia napasola bunimo pareanan banuanna.

¹²Iamoto natae’ naattai tu to Israel bendan unnea ualinna, memboko’mo dio mai ualinna, belanna pepayuammo. Iake tae’i misabu’i tu pepayu dio lu kalemi, tae’mo Kula urrondongkomi.

¹³Ke’de’moko, mupamaseroi te bangsa iate, sia la mukua: Pamaseroi tu kalemi sae lako masiang, belanna inde sia tu kadanNa PUANG, Kapenombanna to Israel, Nakua: Den tu pepayu dio lu kalemi, e to Israel, iamoto natae’ muattai bendan unnea ualimmu, ke tae’pi mipatoyangi dolo dio mai kalemi tu pepayu.

¹⁴Iamoto ianna melambi’ la saekomi mennolo situru’ mintu’ sukummi, na iatu suku Nadullu PUANG la mennolo situru’ mintu’ pa’rapuanna na iatu pa’rapuan Nadullu PUANG la mennolo situru’ rapunna, na iatu rapu Nadullu PUANG la mennolo tu mintu’ muane.

¹⁵Na iatu to didullu ullendai tu atoran dipemalinna la diballa api la ia la mintu’ tu apanna, belanna nalendai tu basseNa PUANG sia napogau’ tu kabagan megi’giran lan lu Israel.

¹⁶Iatonna tibangka’mo masiang nasuami Yosua tu to Israel sae mennolo situru’ sukunna, na suku Yehuda nakanna.

¹⁷Nasuai tu pa’rapuanna Yehuda sae mennolo, na pa’rapuanna Zerah Nadullu Puang, na iatonna suai tu mintu’ muane dio mai pa’rapuanna Zerah sae mennolo, Zabdi nakanna.

¹⁸Nasuai tu mintu’ muane dio mai rapunna, sae mennolo, na Akhan nakanna, anakna Karmi, anakna Zabdi, anakna Zerah, dio mai suku Yehuda.

¹⁹Ma’kadami tu Yosua lako Akhan, nakua: E anakku, pangke’i tu PUANG, Kapenombanna to Israel, ammu mangaku lako; pokadanna’ tu apa mupogau’, da mubunianna’.

²⁰Mebalimi tu Akhan lako Yosua, nakua: Tonganna akumo tu umpogau’ kasalan lako PUANG, Kapenombanna to Israel, belanna susite tu penggaurangku:

²¹Belanna kutiro lan to apa dirampa sanglamba’ bayu lamba’ Sinear, lendu’ melona, sia dua ratu’ sikele’ salaka[1] sia sanglongki’ bulaan,[2] tu limangpulo sikele’ magasanna, kukamoraimi, angku alai. Mintu’na to kubuni diong padang lan tangnga-tangnga tendaku sia iatu salakana diongna lu.

²²Nasuami Yosua tu pesua male lako tenda, anna tikara male; na iatu apa iato dibuni lan tendana, sia iatu salaka diongna lu.

²³Naala nasangmi tau lan mai tendana, nabaai lako Yosua sia mintu’ to Israel, nabarrakan dio oloNa PUANG.

²⁴Mangkato naalami Yosua sia mintu’ to Israel tu Akhan, anakna Zerah, sia iatu salaka sia bayu lamba’ sia bulaan sanglongki’ sia iatu mintu’ anakna muane sia anakna baine, sia mintu’ sapinna sia keledainna sia dombana sia bembe’na sia tendana sia mintu’ tu apa dio kalena, anna baai tau iato mai rokko lombok Akhor.

²⁵Ma’kadami tu Yosua, nakua: Susitu kami muparampoi kamandasan susi dukato la Naparampoiko PUANG kamandasan allo iate. Nasileba’-leba’imi batu mintu’ to Israel, sia naballa api, namane ullolinni batu dao.

²⁶Mangkato napabendannimi tau misa’ tombonan batu daona lu, tu tontong sae lako allo iate. Namane PUANG umparapa’i tu kare’dekanna ara’Na. Iamoto nasangai tau tu inan iato lombok Akhor sae lako allo iate.