Read Toraja-Sa'dan 2 TESALONIKA 1 Bible Online

2 TESALONIKA 1 - Toraja-Sa'dan bible

2 TESALONIKA 1

¹Iate sura’ lu dio mai Paulus sia Silwanus anna Timotius diparampo lako kombongan to Tesalonika, tu lanna Puang Matua, Iamotu Ambe’ta sia Puang Yesu Kristus.

²Narampoimorokomi pa’kamasean sia kamarampasan dio mai Puang Matua, Ambe’, sia dio mai Puang Yesu Kristus.

³E sangsiulurangku, sipatukanni tontong ma’kurre sumanga’ langngan Puang Matua diona kamu, susitu sielle’na siamo, belanna sakendek-kendekna tu kapatonganammi sia iatu kasialamaseammi tang dikemba’mo lako kamu simisa’-misa’mi sola nasang,

⁴naurunganni kami duka te massattuan diona kamu dio lu mintu’ kombonganNa Puang Matua, belanna kabantangammi sia kapatonganammi lan mintu’ kadipakario-rioan sia kamaparrisan miperasai.

⁵Iamo misa’ tanda pangra’ta’ malambu’Na Puang Matua to, kumua disanga sielle’komi tama ParentaNa Puang Matua, ia dukamo bannangna to ammi perasai kamaparrisan:

⁶Apa Nasanga Puang Matua malambu’ ke dipabala’i kadipakario-rioan lako tu to umpakario-riokomi,

⁷anna iatu kamu dipakario-riona diben kamanamanan sisola kami, to ke dipasomboi tu Puang Yesu dao mai suruga sola mintu’ malaeka’ matoto’Na,

⁸situang api ma’lana-lana, anNa pabala’i tu to untumpu Puang Matua sia iatu to manoka umpengkaolai Kareba-kaparannuanNa Puangta Yesu.

⁹Tau iato la dipakario-rio kasanggangan sae lakona, dipatoyang dio mai oloNa Puang sia dio mai kamala’biran kuasanNa,

¹⁰ke attu kasaeanNa Puang Yesu la dipakala’bi’ lan mintu’ to masallo’Na, sia la dipudi mangnga lan mintu’ to ma’patongan ke allo iato; belanna iatu kikatottongi lako kalemi, dipatongan.

¹¹Iamoto angki tontong umpassambayangankomi, dikua anNa sangakomi Kapenombanta sielle’ ditambai sia Napasundunni tu mintu’ pa’poraiammi lako melona sia pengkarangan kapatonganan situru’ kuasanNa,

¹²anna dipakala’bi’ tu sanganNa Puangta Yesu lan kalemi sia kamu duka lan Kalena, situru’ pa’kamaseanNa Kapenombanta sia Puang Yesu Kristus.