Read Toraja-Sa'dan 2 TESALONIKA 2 Bible Online

2 TESALONIKA 2 - Toraja-Sa'dan bible

2 TESALONIKA 2

¹Iatu diona kasaeanNa Puangta Yesu Kristus, sia iatu diona kasipulunganta sola, kipalaku lako kalemi, e sang siulurangku,

²da anna madomi’ tu penaammi saling sia tigiang, la tete dio pa’paombo’na penaa, la tete dio kada, ba’tu tete dio sura’, tu disanga lu dio mai kaleki, butung to saemo tu alloNa Puang.

³Da naden misa’ tau umpapusakomi moi umba nakua, belanna tae’pa nala dadi, ke tae’pi nasorong boko’ dolo tu to buda dio mai kapatonganan, anna dipasombo tu to umparri-parri kasalan, iamo anak ranaka,

⁴to pabali-bali sia ussanga madao kalena na iatu mintu’na disanganna kapenomban sia dipenombainna, naurunganni unnesung lan banuanNa Puang Matua sia ungganti kalena kumua iamo deata.

⁵Tae’raka mikilalai kumua iatonta sisolapa inang mangkamokomi kupokadan tu mintu’nato?

⁶Dadi totemo miissan tu apa unnampangipi, kumua anna dipasombo ke attu dipamanassa lako kalena.

⁷Belanna lalomo tu rasia kakelokan; iamira tu to unnampangi sae lako totemo la dipa’dei dolo.

⁸Attu iapito namane dipasombo tu to umparri-parri kasalan, anna sanggangi penaa sun dio pudukNa Puang (Yesu) sia nasabu’i arrang kasaeanNa.

⁹Iatu kasaeanna tu to umparri-parri kasalan iato unturu’ pengkaranganna deata bulituk sitonda mintu’ kamatotoran sia tanda kalle-kallean sia tanda mangnga tang tongan,

¹⁰sia sitonda tangnga’ kakadakean lako tu mai to la sanggang, belanna natumpu tu pa’kaboro’ sanda tonganna, kumua anna kabu’tui kamakarimmanan.

¹¹Iamo bannangnato anNa pasaeanni Puang Matua tu kuasa ma’papusa, naurunganmi umpatonganni tu kamo’rangan,

¹²kumua anna mintu’ to tang umpatonganni tu kamanapparan sia to umporai kakadakean, diukung.

¹³Apa iate kami te sipatukanni tontong ma’kurre sumanga’ langngan Puang Matua diona kamu, e sangsiulurangku to Napakaboro’ Puang, tu belanna tempon diopa mai mulanna Natonno’komi Puang Matua la ungkabu’tui kamakarimmanan diona kaNapamasallorammi Penaa sia kaumpatonganammi kamanapparan.

¹⁴Mangkamokomi Natambai Puang lako tu iannato tete dio Kareba-kaparannuan, la ungkabu’tui tu kamala’biranNa Puangta Yesu Kristus.

¹⁵Iamoto, e sangsiulurangku, bantangkomi bendan sia toei tu mintu’ pangadaran mangka dipa’pangadaran lako kalemi, la sunna dio pudukki, la iatu kisura’na.

¹⁶Na iamora tu Puangta Yesu Kristus, sia Puang Matua, Ambe’ta, tu mangkamo ungkamaseiki’ sia umpa’kamasean pa’pakatana matontongan sia kapa’rannuanan maelo tete dio kamaturu-turuanNa,

¹⁷umpakatana penaammi sia umpabatta’komi lan mintu’ penggauran sia kada maelo.