Read Toraja-Sa'dan 2 TESALONIKA 3 Bible Online

2 TESALONIKA 3 - Toraja-Sa'dan bible

2 TESALONIKA 3

¹Ma’katampakanna, e sang siulurangku, lamipassambayangankan, anna kalelean tu kadanNa Puang sia dipakala’bi’, susitu lalonamo lako kamu,

²sia angki dirampanan dio mai mintu’ to toro sia to kadake, belanna tae’ na ia nasang tau umpotaa kamarurusan.

³Apa maruru’ sia tu Puang, Ia dukamo la umpabatta’komi sia urrinding pala’komi dio mai tu to kadake.

⁴Kirannuan tete dio Puang, kumua ammi pogau’i, sia la mipogau’ tu apa kipasan lako kalemi.

⁵Anna Puangmora umpalulakoi pa’kaboro’Na Puang Matua sia kama’tanan penaanNa Kristus tu penaammi.

⁶E sangsiulurangku, kipasan lako kalemi tete dio sanganNa Puang Yesu Kristus, ammi toyangan kalemi dio mai mintu’ siulu’ tang ma’rundunan gau’na, sia tang unturu’ atoran mangka natarima dio mai kaleki.

⁷Belanna miisan kalena, kumua umba tu sipatunna la mikua unturu’ sangka’ki, belanna iatu gau’ki dio lu kamu tae’ natang ma’rundunan;

⁸sia tae’ duka kikande punalai tu mai kandena tau, sangadinna keallo kebongi mara’ta’kanni sia boyo’kanni mengkarang dikua da ammi den misa’ kipamatana’.

⁹Tangia kumua belanna tae’ kipato’, sangadinna angki padadi kaleki misa’ sangka’ sipatu la mituru’.

¹⁰Belanna iatonta sisolapa, mangkamo kipasan lako kalemi te ianna te, kumua: iake den tau manoka mengkarang, da nakumande.

¹¹Belanna den kareba kirangi kumua denkomi ba’tu pira-pira tu tang ma’rundunan gau’na, tu tang mengkarang sangadinna umpatangma’rundunan tau.

¹²Lako tau susito kipasan sia kipakilala tete dio Puang Yesu Kristus, namukkun mengkarang sia ungkande kandena.

¹³Apa iatu kamu te, e sangsiuluran, da mimasorro umpogau’ melo.

¹⁴Iake den tau tang unturu’i susite kadangki lan te sura’ tandai to tau iato, sia da misikadamak len, anna masiri’.

¹⁵Da mitiro ualii, sangadinna pakilala susii misa’ siulu’.

¹⁶Anna Iamora tu Puang, oto’na mintu’ kamarampasan, tontong ungkamaseangkomi kamarampasan lan mintu’-mintu’na. Anna rondongmorokomi Puang sola nasang.

¹⁷Salama’ dio mai aku Paulus, tu kuoki’ kalena, napotanda mintu’ sura’ku, susimote tu pangoki’ku.

¹⁸Narondongmorokomi pa’kamaseanNa Puangta Yesu Kristus sola nasang.